امەريكالىق كوۆبويلار قازاقتارمەن كوكپار وينايدى
استانا. KAZINFORM - ەلوردا تورىندە 8-14-قىركۇيەك ارالىعىندا وتەتىن V دۇنيەجۇزىلىك كوشپەندىلەر ويىنىندا امەريكالىق كوۆبويلار كوكپاردان سايىسقا تۇسەدى.
بۇل تۋرالى تۋريزم جانە سپورت ءمينيسترى ەرمەك مارجىقپايەۆ ايگىلى امەريكالىق كوۆبوي كەيسي فيلد پەن كوكپاردان ا ق ش قۇراماسىنىڭ كاپيتانى لەدد حوۋەللدەن قۇرالعان ا ق ش دەلەگاتسياسىمەن كەزدەسۋىنەن كەيىن بەلگىلى بولدى.
كەزدەسۋ بارىسىندا تاراپتار ات سپورتى تۇرلەرىن دامىتۋدى، ەكى ەلدە كوكپار مەن امەريكالىق رودەونى كەڭىنەن ناسيحاتتاۋدى، سونداي-اق بيىل ەلىمىزدە وتەتىن 5-دۇنيەجۇزىلىك كوشپەندىلەر ويىندارىن تالقىلادى.
امەريكالىق دەلەگاتسيا 5-دۇنيەجۇزىلىك كوشپەندىلەر ويىندارىنىڭ كوكپار جارىسىنا قاتىسۋعا دايىن ەكەنىن جەتكىزدى. بۇعان دەيىن ا ق ش-تىڭ كوكپاردان ۇلتتىق قۇراماسى 2018 جانە 2022 -جىلدارى دۇنيەجۇزىلىك كوشپەندىلەر ويىندارىنا قاتىسقان بولاتىن.
«كوكپار - ەجەلگى كوشپەندىلەر ويىنىنىڭ ءبىرى. اتالعان سپورت ءتۇرى بىرنەشە ءجۇز جىلدان بەرى وينالىپ كەلەدى. ارينە، بۇل - وتە اسەرلى ويىن. قازاقستاندا «كوكپار» فەدەراتسياسى جۇمىس ىستەيدى. ەلىمىزدىڭ كوپتەگەن قالاسى مەن اۋىلىندا جىل سايىن كوكپاردان جارىستار وتكىزىلىپ تۇرادى. ەڭ كەيىنگى دۇنيەجۇزىلىك كوشپەندىلەر ويىندارىندا قازاقستان كوكپارشىلارى باس جۇلدەنى جەڭىپ الدى. سوندىقتان ءبىز بيىل دا سپورتشىلارىمىزعا زور سەنىم ارتامىز. ءبىز سىزدەردى وسى سپورت ءتۇرى بويىنشا الدىڭعى قاتارلى كوماندا دەپ بىلەمىز. سونىمەن قاتار سىزدەر ورتالىق ازياداعى كوشپەلى حالىقتارىنىڭ ات سپورتى ويىندارىنا بەلسەندى ارالاسىپ، ونى ا ق ش اۋماعىندا ناسيحاتتاپ جۇرگەندەرىڭىز ءبىزدى قۋانتادى. ا ق ش كومانداسىنىڭ كوكپاردا ونەر كورسەتۋى ەستە قالارلىق وقيعا بولادى دەپ ويلايمىز»، - دەدى ەرمەك مارجىقپايەۆ.
كەزدەسۋ بارىسىندا تۋريزم جانە سپورت ءمينيسترى ا ق ش-تان كەلگەن قوناقتاردى 5-دۇنيەجۇزىلىك كوشپەندىلەر ويىندارىنىڭ كەرى ساناق تاقتاسىن ىسكە قوسۋ راسىمىنە قاتىسۋعا شاقىردى. ءوز كەزەگىندە دەلەگاتسيا وكىلدەرى رودەو سپورتىن 5-دۇنيەجۇزىلىك كوشپەندىلەر ويىندارىنىڭ كورمە قويىلىمدارى باعدارلاماسىنا ەنگىزۋدى ۇسىندى.
