امەريكالىق جاستار قالاي ءومىر سۇرەدى؟
استانا. Kazinform - بىزدە 18 جاسقا تولعان امەريكالىق اتا-اناسىنان بولەك، تاۋەلسىز ءومىر سۇرەدى دەگەن ستەرەوتيپ قالىپتاسقان. ءبىراق ول قانشالىقتى شىندىققا جاقىن؟ امەريكالىق اتا-انالاردىڭ شامامەن 60 پايىزى ەرەسەك بالالارىنا قارجىلىق قولداۋ كورسەتەتىنىن Quartz سايتى جازادى. وسى ماقالاعا سۇيەنگەن Aikyn.kz مۇنىڭ ەكونوميكالىق سەبەپتەرىن تۇسىندىرەدى.
جاڭا ساۋالناماعا سايكەس، اتا-انالار ەرەسەك بالالارىنا وزدەرىنىڭ زەينەتاقى جيناقتارىنا قاراعاندا ەكى ەسە كوپ قارجى ارنايتىنى بەلگىلى بولعان.
قارتايۋ جاراتىلىستىڭ زاڭدىلىعى بولسا ءسوزسىز، ەسەيۋ مەن ءوزىن-ءوزى قارجىلىق تۇرعىدا قامتاماسىز ەتەتىن ازامات بولۋ باسقا اڭگىمە. جاڭا زەرتتەۋ امەريكالىق اتا-انالاردىڭ جارتىسىنا جۋىعى (%47) ەرەسەك بالالارىنا قانداي دا ءبىر قارجىلىق قولداۋ كورسەتەتىنىن كورسەتكەن.
اي سايىن اتا-انالار وزدەرىنىڭ ەرەسەك بالالارىنىڭ كەم دەگەندە بىرەۋىنە شامامەن 1384 دوللار كومەك بەرەدى ەكەن. زەرتتەۋ كورسەتكەندەي، بۇل ورتاشا ەسەپپەن جۇمىس ىستەيتىن اتا- انالاردىڭ وزدەرىنىڭ زەينەتاقى جيناقتارىنا اي سايىن اۋداراتىن $609 دوللارمەن سالىستىرعاندا ەكى ەسە كوپ.
تەحنولوگيالار مەن كۋپوندارعا ماماندانعان Savings.com ونلاين كومپانياسى جۇرگىزگەن زەرتتەۋگە ا ق ش-تاعى 1000 عا جۋىق اتا-انا قاتىسقان. ولاردىڭ %50 ەرلەر جانە %50 ايەلدەر بولعان. جانە دە بۇل زەرتتەۋگە مۇمكىندىگى شەكتەۋلى ەرەسەك بالالاردى قولدايتىن اتا-انالار قاتىسپاعان.
«قۇراما شتاتتاردا ەكونوميكانىڭ كەيبىر بولىكتەرىندە جاقسارۋ بەلگىلەرىنىڭ بىلىنە باستاۋى، جۇمىسسىزدىق پەن ينفلياتسيانىڭ تومەندەۋى سياقتى فاكتورلار جاس امەريكالىقتارعا ءالى اسەر ەتپەۋى مۇمكىن» ەكەنىن ايتادى زەرتتەۋشىلەر.
اتاپ ايتقاندا، Z بۋىنى، ياعني 18 بەن 27 جاس ارالىعىنداعى ادامدار قارجىلىق قولداۋعا كوبىرەك مۇقتاج بولعان. دەگەنمەن ءار وتباسى ءۇشىن قارجىلىق جاعداي ءارتۇرلى بولۋى مۇمكىن. زەرتتەۋ كورسەتكەندەي، اتا-انالار ورتا ەسەپپەن Z جاسىنداعى ەرەسەك بالالارىنا كەمىندە ءۇش شوت تولەۋگە كومەكتەسكەن.
اتا-انالار ەرەسەك بالالارىنا ازىق-تۇلىك، ۇيالى تەلەفون شوتتارىن، جالعا الۋ مەن مەديتسينالىق ساقتاندىرۋ، وقۋ اقىسى، ءتىپتى دەمالىس پەن ساياحاتتارىنىڭ شىعىندارىن دا تولەگەن. اتا-اناسىمەن بىرگە تۇراتىن كامەلەتكە تولعان بالالاردىڭ ورتاشا ەسەپپەن %61 ى پاتەر اقىسىن قوسا العاندا، ءۇي شارۋاشىلىعىنىڭ ەشقانداي شىعىندارىنا ۇلەس قوسپاعان.
ەكونوميكا تۇراقتى وسە باستاعانىمەن، ازىق-تۇلىك پەن تۇرعىن ءۇي باعاسىنىڭ قىمباتتاۋى سياقتى كوپتەگەن الەۋمەتتىك-ەكونوميكالىق فاكتورلار اتا-انالاردىڭ وزدەرىنىڭ قارجىلىق بولاشاعىنا الاڭداۋشىلىعىن كۇشەيتكەن.
زەرتتەۋشىلەردىڭ قورىتىندى تۇجىرىمى دا ءبىزدىڭ ۇكىمەتكە جاقسى وي سالادى: امەريكالىق اتا-انالاردىڭ بالالارىنىڭ بولاشاعىنا الاڭداماي، وزدەرىنىڭ زەينەتكە شىققاننان كەيىنگى لايىقتى ءومىر سۇرەتىنىنە دەگەن سەنىمىن كۇشەيتۋ ءۇشىن قازىرگى ەڭبەك نارىعى مەن باعانىڭ وسۋىمەن كۇرەسۋ كەرەك.
امەريكالىق جاستاردا دا ومىرلىك قۇندىلىقتار، وتباسى مەن ەلىنە دەگەن سەزىم بار. ءبىراق ولاردا باسقاشا. بىزدە، اباي اتامىز ايتقانداي، باسقاشا: «جىگىتتەر، ويىن - ارزان، كۇلكى - قىمبات؛ ەكى ءتۇرلى نارسە عوي سىر مەن سىمبات!».
