«امەڭگەر» فيلمى ۇلكەن ەكرانعا شىقتى

 «امەڭگەر» پسيحولوگيالىق دراماسى كونە ءداستۇردى بۇگىنگى قوعاممەن بايلانىستىرا سۋرەتتەيدى. ادامنىڭ ىشكى تراگەدياسى، جالعىزدىق پەن ۇرپاق ءۇشىن كۇرەسكە تولى كارتينانىڭ رەجيسسەرى - ماقسات وسپانوۆ.

«امەڭگەر. اعاما امانات» دراماسىنىڭ پرەمەراسى Halyk IMAX Kinopark 16 كينوتەاترىندا ءوتتى. العاشقى كورسەتىلىمگە اكتەرلەر، شىعارماشىلىق ۇجىم مەن ونەر سالاسىنىڭ مايتالماندارى قاتىستى. فيلمدەگى باستى ءرولدى اكتەر ەلدوس شايكەنوۆ وينايدى. ونىڭ كەيىپكەرى- جانات ءبىر اۋلەتتىڭ تىرەگىنە اينالعان ازامات.

ەلدوس شايكەنوۆ، اكتەر:

 - مەن جاناتتىڭ ءرولىن سومدايمىن. بۇل ءبىر اۋلەتتىڭ اعاسى، ءبىر سەبەپتەرگە بايلانىستى تۇرمىس قۇرماي ءجۇر. ول ازىرگە وزىنە عانا ايان. ءبىراق كينونىڭ سوڭىندا سەبەبى اشىلادى. بۇل جەردە تەك امەڭگەرلىك قانا قوزعالمايدى، ادامنىڭ تاعدىرى قوزعالادى. ءار ادامنىڭ تاعدىرى، ءار كەيىپكەردىڭ لينياسى اشىلا بىلگەن. سپورت شەبەرى ارحاتتىڭ ءولىمى ءالى انىقتالعان جوق. پسيحولوگيالىق دراما جاناتتىڭ ءىنىسى ارحاتتىڭ قازاسىنان كەيىن شيەلەنىسە تۇسەدى. باستى كەيىپكەر بابالار ءداستۇرىن جاڭعىرتىپ، امەڭگەرلىككە قادام جاسايدى. مۇنداي شەشىمگە ءىنىسىنىڭ ولىمىنەن باسقا تاعى بىرنەشە سەبەپ ىقپال ەتەدى.

 قانات رامازان، «امەڭگەر» فيلمىنىڭ سەناري اۆتورى:

- فيلم تۇسىرگەننەن كەيىن كوبىنەسە كاسسالىق تۇسىمىنە نەمەسە اۋلەۋەتىنە، پوتەنتسيالىنا نازار اۋدارىپ جاتادى عوي. سول تۇرعىدان العاندا ءبىز بۇل تاقىرىپتى زەرتتەي كەلە، جاستارعا دا، ەرەسەكتەرگە دە بىردەي قىزىق بولاتىن كونتەنت ەكەنىنە كوزىمىز جەتتى. سوندىقتان وسى باعىتتا تۇسىردىك. فيلم 18 جاستان اسقان كورەرمەنگە ارنالعان. ەكى ساعاتتىق درامادا ماحاببات، پارىز بەن ءتوزىم قاتار باياندالادى. ءداستۇر ماحابباتتان بيىك پە؟ بۇل سۇراقتىڭ جاۋابىن كارتينانى كورگەن سوڭ تابا الاسىزدار.

 https://24.kz