گامبۋرگ اۋەجايى بارلىق دەرلىك رەيستى توقتاتتى

استانا. KAZINFORM - گەرمانيانىڭ Ver.di كاسىپوداعى دۇيسەنبى كۇنى ەلدەگى 13 ءىرى اۋەجايدا ەرەۋىل ۇيىمداستىرۋعا شاقىردى. الايدا گامبۋرگ اۋەجايى ونى ءبىر كۇن بۇرىن باستاۋعا شەشىم قابىلدادى، دەپ حابارلايدى euronews.

گەرمانياداعى گامبۋرگ اۋەجايى جەكسەنبى كۇنى كەنەتتەن جۇمىسىن توقتاتتى. بۇعان قىزمەتكەرلەردىڭ جاريالانباعان ەرەۋىلى سەبەپ بولدى.

جوسپارلانعان 144 قونۋ مەن 139 ۇشۋدىڭ تەك 10 ى عانا ورىندالدى.

بۇل رەتتە Ver.di كاسىپوداعىنىڭ باستاماسىمەن گەرمانيانىڭ ءىرى اۋەجايلارىندا جاپپاي ەرەۋىل دۇيسەنبىگە جوسپارلانعان ەدى.

قاتتى اشۋلانعان جولاۋشىلار بولعان جاعدايدى «شەكتەن شىققاندىق» دەپ اتادى.

كاسىپوداق حاتشىسى لارس شتۋببە جاريالانباعان ەرەۋىلدىڭ ماقساتى - ۇلكەن اسەرگە قول جەتكىزۋ ەكەنىن ءتۇسىندىردى.

- ءبىز ەرەۋىلدى الدىن الا ەسكەرتۋسىز ۇيىمداستىردىق، ويتكەنى تاجىريبەمىز كورسەتكەندەي، جۇمىس بەرۋشى الدىن الا بىلسە، ونى كەز كەلگەن جولمەن بولدىرماۋعا تىرىسادى. ارينە، بۇل جولاۋشىلارعا اۋىرتپالىق تۇسىرەدى جانە ءبىزدىڭ ارىپتەستەرىمىز مۇنى تۇسىنەدى. سوعان قاراماستان، ولار %100 ەرەۋىلگە قوسىلدى، - دەدى شتۋببە.

قىزمەت كورسەتۋ سالاسى قىزمەتكەرلەرىنىڭ Ver.di كاسىپوداعى اۆياتسيالىق قاۋىپسىزدىك قىزمەتكەرلەرىن 24 ساعاتتىق ەسكەرتۋ ەرەۋىلىن وتكىزۋگە شاقىردى.

ولار دۇيسەنبى كۇنى تاڭەرتەڭ ەلدىڭ 13 اۋەجايىندا، سونىڭ ىشىندە فرانكفۋرت پەن ميۋنحەندە باستالۋى ءتيىس.

گەرمانيا اۋەجايلارى قاۋىمداستىعىنىڭ (ADV) مالىمەتىنشە، بۇل ەرەۋىل 500 مىڭنان استام جولاۋشىعا اسەر ەتىپ، 3400 دەن استام رەيس توقتاتىلادى دەپ كۇتىلۋدە.

كاسىپوداقتىڭ مالىمدەمەسىندە ەرەۋىل «شامامەن 25000 قىزمەتكەردىڭ ەڭبەك جاعدايىن جاقسارتۋ» ءۇشىن قاجەت ەكەنى ايتىلعان.

- ەرەۋىل گامبۋرگ، برەمەن، گاننوۆەر، بەرلين، ديۋسسەلدورف، ۆيزە، دورتمۋند، كەلن/بونن، لەيپتسيگ/گاللە، فرانكفۋرت، شتۋتگارت، كارلسرۋە/بادەن- بادەن جانە ميۋنحەن اۋەجايلارىندا وتەدى، - دەپ راستادى Ver.di.

ايتا كەتەلىك گەرمانيادا قوعامدىق كولىك جۇمىسشىلارى جاپپاي ەرەۋىلگە شىعاتىنى تۋرالى جازعان ەدىك.