«اۋماقتىق قورعانىس تۋرالى» زاڭ قارۋلى كۇشتەرگە جۇكتەمەنى ازايتۋعا مۇمكىندىك بەرەدى
استانا. قازاقپارات – 30-ماۋسىم استانا – ق ر پرەزيدەنتى قاسىم-جومارت توقايەۆ «اۋماقتىق قورعانىس تۋرالى» زاڭعا جانە وعان ىلەسپە تۇزەتۋلەرگە قول قويدى. قۇجات اۋماقتىق قورعانىستىڭ ءتيىمدى جۇيەسىن قالىپتاستىرۋعا، جۇمىلدىرۋ دايىندىعىن ارتتىرۋعا جانە توتەنشە جاعدايلاردا حالىقتىڭ قاۋىپسىزدىگىن قامتاماسىز ەتۋگە باعىتتالعان.
بۇل تۋرالى ق ر قورعانىس مينيسترلىگى ءمالىم ەتتى.
ۆەدومستۆونىڭ مالىمەتىنشە، نەگىزگى زاڭ اۋماقتىق قورعانىستى مەملەكەتتىڭ ىشكى مىندەتتەرىن شەشۋدىڭ جەكە سالاسى رەتىندە قاراستىرادى. ونىڭ ماقساتتارىن، جۇمىس ىستەۋ پرينتسيپتەرىن جانە ءىس-شارالارىن انىقتايدى. قۇجات سونىمەن قاتار قارجىلاندىرۋدىڭ ءتيىستى تاسىلدەرىن ايقىندايدى.
«اۋماقتىق قورعانىس تۋرالى» زاڭ ق ر قارۋلى كۇشتەرىنە جۇكتەمەنى ازايتۋعا مۇمكىندىك بەرەدى. بۇل ءتاسىلدىڭ ءبىرقاتار ارتىقشىلىقتارى بار.
قازاقستان كولەمى بويىنشا الەمدە توعىزىنشى ورىندا تۇر. بۇل رەتتە ونىڭ حالقى 20 ميلليوننان استام ادامدى قۇرايدى. وسىلايشا، توتەنشە جاعداي تۋىنداعان جاعدايدا اۋماقتىق قورعانىس ۇلكەن ەكونوميكالىق شىعىنداردى تالاپ ەتپەستەن مىندەتتەردى ءتيىمدى شەشۋگە مۇمكىندىك بەرەدى.
بۇل رەتتە، ت ج جويۋ كەزىندە اۋماقتىق قورعانىستى ىسكە قوسۋ مۇمكىندىگى قارۋلى كۇشتەردى الاڭداتپاي، تابيعي ەلەمەنتتەردىڭ سالدارىن جويۋعا مۇمكىندىك بەرەدى.
اۋماقتىق قورعانىس كۇشتەرى - دامىعان مەملەكەتتەردىڭ كوپشىلىگىندە كەزدەسەتىن نەگىزگى قاۋىپسىزدىك كەشەنى. مىسالى، اۋماقتىق قورعانىس جۇيەسى رەسەي، بەلارۋس، اۆستريا، بەلگيا، دانيا، يتاليا، نيدەرلاندى، نورۆەگيا، شۆەتسيا، فينليانديا جانە باسقالارىندا بار.
ق ر ق ك اۋماقتىق قورعانىس جۇيەسىن قۇرۋ جونىندەگى جۇمىس 2017-جىلى اۋماقتىق قورعانىستىڭ العاشقى بولىمشەلەرى قۇرىلعان كەزدە باستالدى. COVID-19 پاندەمياسى كەزەڭىندە ولاردى قولدانۋدىڭ پراكتيكالىق تاجىريبەسى بار. وندا جالپى اۋدانى 10 ميلليون شارشى مەترگە جۋىق 14 مىڭنان استام الەۋمەتتىك ماڭىزى بار نىساندار دەزينفەكتسيالانىپ، وڭدەلدى.
سونداي-اق، 2020-جىلى وزبەكستانداعى ساردوبا سۋ قويماسىنداعى بوگەتتىڭ بۇزىلۋ سالدارىن جويۋعا اۋماقتىق قورعانىس قۇرىلىمدارى تارتىلدى. توتەنشە جاعداي سالدارىنان تۇركىستان وبلىسىنىڭ ماقتاارال اۋدانىنداعى 10 اۋىل سۋ استىندا قالىپ، قازاقستاندىق اۋىلداردىڭ 31 مىڭنان استام تۇرعىنى ەۆاكۋاتسيالاندى.
2022-جىلى اۋماقتىق اسكەرلەر قوستاناي وبلىسىنداعى ورمان ءورتىن سوندىرۋگە جۇمىلدىرىلدى. 2024-جىلى قازاقستاننىڭ سولتۇستىك-باتىسىنداعى سۋ تاسقىنى سالدارىن جويۋعا قاتىستى.
وسىلايشا، اۋماقتىق قورعانىستىڭ نەگىزگى ماقساتى داعدارىس جاعدايىندا حالىقتى جانە ەلدىڭ ينفراقۇرىلىمىن قولداۋ تەتىكتەرىن جەتىلدىرۋ بولىپ تابىلادى.
ەسكە سالا كەتەيىك، بۇعان دەيىن مەملەكەت باسشىسى «قازاقستان رەسپۋبليكاسىنىڭ اۋماقتىق قورعانىسى تۋرالى» زاڭىنا قول قويعانىن جازعان ەدىك.
