باقىت سۇلتانوۆ «Amanat» - تىڭ قوعامدىق قابىلداۋىندا ازاماتتاردىڭ جەكە ماسەلەلەرىن تىڭدادى
قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.
ەكى ساعاتتان استام ۋاقىتقا سوزىلعان قابىلداۋدا پرەمەر-ءمينيستردىڭ ورىنباسارى 6 ازاماتتىڭ ماسەلەسىن قارادى.
استانا، الماتى، قىزىلوردا جانە پەتروپاۆل قالالارىنىڭ، شىعىس قازاقستان جانە اقتوبە وبلىستارىنىڭ تۇرعىندارى وزدەرىن تولعاندىراتىن ماسەلەلەرىن جەتكىزدى.
كەزدەسۋدە قوسىلعان قۇن سالىعى بويىنشا تىركەۋ شەگىن تومەندەتۋدى ەسكەرە وتىرىپ، قوعامدىق تاماقتانۋ سالاسىنداعى سالىق ساياساتى، كوكشەتاۋ قالاسى مەن وبلىستى گازداندىرۋ جوباسىن جۇزەگە اسىرۋ جانە قارجىلاندىرۋ تەتىگىن انىقتاۋ، سونداي-اق الماتىدا قىتايدان كەلەتىن تەحنيكا مەن قوسالقى بولشەكتەردىڭ كورمەسىن وتكىزۋ جانە تاعى باسقا ماسەلەلەر تالقىلاندى.
باقىت سۇلتانوۆ ش ق و اكىمدىگىنە وسكەمەن قالاسى تۇرعىندارىنا ارنالعان، جەكە بيزنەس سالىپ جاتقان قىسقى ويىن-ساۋىق كەشەنىنە وندىرىستىك ينفراقۇرىلىم جۇرگىزۋ جانە ەلەكتر بەرۋ جەلىسىن مونتاجداۋ ماسەلەسىن قاراۋ مەرزىمىن سوزباۋدى تاپسىردى.
قارجى مينيسترلىگىنە «Amanat» پارتياسىنىڭ قوعامدىق قابىلداۋلارىندا قوعامدىق تاماقتانۋ كاسىپورىندارى (ق ر م ك ك) ءۇشىن سالىق سالۋ (ارنايى سالىق رەجيمى جانە ق ق س بويىنشا ەسەپكە قويۋ) ماسەلەلەرى بويىنشا اۋقىمدى ءتۇسىندىرۋ جۇمىستارىن جۇرگىزۋدى تاپسىردى.
سونداي-اق ول جۇمىسقا «اتامەكەن» ۇ ك پ تارتۋ قاجەتتىگى ايتىلدى.
«ءبىزدىڭ كاسىپكەرلەر ق ق س رەجيمى قوعامدىق تاماقتانۋ سالاسىنىڭ بارلىق قاتىسۋشىلارىنا اسەر ەتەدى دەپ قاۋىپتەنەدى. بۇگىن قارجى مينيسترلىگىنەن بىرنەشە كاسىپكەر ققس- قا كوشۋ شارتتارى بويىنشا تولىق تۇسىنىكتەمە الدى. ەندى مۇنى نارىقتىڭ بارلىق قاتىسۋشىلارىنا مىندەتتى تۇردە ءتۇسىندىرۋ قاجەت. وعان سالالىق قاۋىمداستىقتارىن، ءبىرىنشى كەزەكتە مەيرامحانا بيزنەسى قاۋىمداستىعىن تارتۋ قاجەت»، — دەدى ب. سۇلتانوۆ.
سونداي-اق، ۆيتسە-پرەمەر اقتوبە اكىمدىگىنە قالا تۇرعىنى كوتەرگەن ماسەلەنى شەشۋ بويىنشا (ورىندالعان جۇمىستىڭ اكتىلەرىنە قول قويۋ بيۋروكراتيا سالدارىنان ۇزاپ جاتىر دەپ شاعىمداندى) بەرگەن تاپسىرماسىن پارتيالىق باقىلاۋعا الۋعا شاقىردى.
باقىت سۇلتانوۆ بارلىق وتىنىشتەرگە تولىق جاۋاپ بەردى. «Amanat» پارتياسىنىڭ قابىلداۋ بولمەسىندە كوتەرىلگەن بارلىق ماسەلەلەر پرەمەر-مينيستر ورىنباسارىنىڭ جەكە باقىلاۋىنا الىندى. جاۋاپتى تۇلعالارعا ءتيىستى تاپسىرمالار بەرىلدى.
