ۆاليۋتالىق دەپوزيتتەر كىمدەرگە ءتيىمدى
استانا. KAZINFORM - قازاقستاندا ۆاليۋتالىق دەپوزيتتەر بويىنشا جاڭا ۇسىنىستار وسى ايدىڭ سوڭىنا دەيىن پايدا بولۋى مۇمكىن.
بۇل تۋرالى ۇلتتىق بانكى ءتوراعاسىنىڭ ورىنباسارى اقىلجان بايماعامبەتوۆ ايتتى.
ونىڭ مالىمەتىنشە، قازىر بارلىق بانكتەرگە ۆاليۋتالىق دەپوزيتتەر بويىنشا جاڭا شارتتار ۇسىنۋعا مۇمكىندىك بەرىلگەن. بانكتەر قازىرگى ۋاقىتتا ءوز ۇسىنىستارىن باعالاپ جاتىر.
- ايدىڭ سوڭىنا دەيىن بانك نارىعىندا قانداي دا ءبىر ۇسىنىستاردى كورەمىز دەپ ويلايمىن. قازىر ناقتى ءبىر بانكتى نەمەسە بىرنەشە بانكتى اتاپ، جارنامالاعىم كەلمەيدى. مۇنى نارىقتان كورۋگە بولادى،-دەدى بايماعامبەتوۆ.
ونىڭ ايتۋىنشا، بانكتەر ۆاليۋتالىق دەپوزيتتەر بويىنشا مولشەرلەمەنى قانداي شارتتارمەن ۇسىناتىنىن وزدەرى انىقتايدى. ماسەلەن، دەپوزيتتىڭ ەڭ تومەنگى سوماسى، بارلىق دەپوزيتتەرگە قولدانىلۋى نەمەسە شوتتا بەلگىلى ءبىر مولشەردەگى قاراجاتتىڭ ساقتالۋىنا قويىلاتىن تالاپتار بەلگىلەنۋى مۇمكىن.
- جاڭا ەرەجە بويىنشا مولشەرلەمەسى جوعارى بولۋى مۇمكىن ونىمدەر مەرزىمى 12 ايدان اساتىن جيناق دەپوزيتتەرىنە قاتىستى. قازىر بانكتەر وسى ماسەلە بويىنشا شەشىم قابىلداپ جاتىر. بالكىم، كەيبىر بانكتەر مۇنداي ۇسىنىستاردى كليەنتتەرىنە جاساپ قويعان شىعار. ءبىراق ايدىڭ سوڭىنا دەيىن نارىقتا وسىنداي بىرنەشە ۇسىنىس پايدا بولادى دەپ ويلايمىن،-دەدى ول.
ۇلتتىق بانك وكىلى ازاماتتارعا جيناقتى نەگىزىنەن تابىس تاۋىپ، شىعىن جاسايتىن ۆاليۋتادا ساقتاۋدى ۇسىندى.
- ءبىز جالپى العاندا جيناقتى تەڭگەمەن جانە شىعىن جاسايتىن ۆاليۋتادا ساقتاۋعا كەڭەس بەرەمىز. ەگەر ادام قازاقستاندا تۇرىپ، تابىسىن تەڭگەمەن الىپ، شىعىنىن دا تەڭگەمەن جاساسا، وندا تەڭگەلىك دەپوزيتتەر جيناق ءۇشىن ىڭعايلى قۇرال دەپ ويلايمىن،-دەدى بايماعامبەتوۆ.
سونىمەن قاتار ونىڭ ايتۋىنشا، شەتەل ۆاليۋتاسىندا قاراجات جيناۋ كەيبىر ازاماتتار ءۇشىن ءتيىمدى بولۋى مۇمكىن.
- مىسالى، بالالارى شەتەلدە وقيتىن ادامدار بار. ولار قاراجاتىن شەتەل ۆاليۋتاسىندا جيناۋى مۇمكىن. سونداي-اق الداعى ۋاقىتتا ۆاليۋتالىق تاۋەكەلى بار ءىرى شىعىنداردى جوسپارلاپ وتىرعان ازاماتتار ءۇشىن دە بۇل ىڭعايلى بولۋى مۇمكىن،-دەدى ول.
سپيكەردىڭ ايتۋىنشا، ۆاليۋتالىق دەپوزيتتەر بويىنشا جاڭا مۇمكىندىك بانكتەرگە كليەنتتەردىڭ سۇرانىسىنا قاراي ونىمدەر ۇسىنۋ ءۇشىن بەرىلىپ وتىر.
- بۇل نارىقتىق ماسەلە. رەتتەۋشى تاراپىنان بانكتەرگە دەپوزيت مولشەرلەمەسىن مىندەتتى تۇردە كوتەرۋ تۋرالى تالاپ جوق. مۇندا سۇرانىس پەن ۇسىنىس ءوز ورنىن تابادى. ەگەر سۇرانىس بولسا جانە بانكتەردىڭ قىزىعۋشىلىعى بايقالسا، ءتيىستى ۇسىنىستار پايدا بولادى،-دەپ اتاپ ءوتتى ۇلتتىق بانك وكىلى.
بۇعان دەيىن الەۋمەتتىك تولەم، جۇمىس ىزدەۋ جانە دەپوزيتتەرگە قاتىستى جاڭا ەرەجەلەر تۋرالى جازعان ەدىك.
