ۆاليۋتا باعامىنا اپتالىق شولۋ: 500 تەڭگەلىك باعام قايتا ورالا ما
استانا. قازاقپارات – 23-قازانداعى KASE ساۋداسىنىڭ قورىتىندىسىندا دوللاردىڭ ورتاشا باعامى 452,11 تەڭگە بولىپ، ءبىر كۇندە 4,02 تەڭگەگە كوتەرىلدى. ەۋرونىڭ ورتاشا باعامى 506,55 تەڭگەگە جەتىپ، 3,36 تەڭگەگە ءوستى. يۋاننىڭ ورتاشا باعامى 67,428 تەڭگە بولسا، ال رۋبل اپتانى 5,6045 تەڭگەمەن تۇيىندەدى.
ءبىر كۇندىك بۇرىلىس
23-قازاندا دوللار بويىنشا T+1 رەجيمىندە 1314 مامىلە جاسالىپ، ساۋدا كولەمى 502,328 ميلليون دوللارعا باردى. ەسەپ ايىرىسۋ رەجيمىندەگى ورتاشا باعامى 452,11 تەڭگە بولدى. ءبىر كۇن بۇرىن ورتاشا باعام 448,09 تەڭگە بولعان.
ەۋروعا قاتىستى 129 مامىلە جاسالىپ، كولەمى 24,083 ميلليون ەۋروعا جەتتى. ەۋرونىڭ ورتاشا باعامى 506,55 تەڭگەگە جەتىپ، الدىڭعى كۇنمەن سالىستىرعاندا 3,36 تەڭگەگە ءوستى. ساۋدا بارىسىندا باعام 503,64-512,17 تەڭگە ارالىعىندا قۇبىلدى.
يۋاننىڭ T+0 جانە T+1 رەجيمدەرىندەگى ساۋدا كولەمى تيىسىنشە 139,3 ميلليون جانە 84,36 ميلليون يۋان بولدى. T+0 رەجيمىندەگى ورتاشا باعام - 67,428 تەڭگە، T+1 رەجيمىندەگى ورتاشا باعام - 67,6773 تەڭگە.
رۋبل بويىنشا وسى ەكى رەجيمدەگى كولەم جيىنتىعىندا شامامەن 3,91 ميلليارد رۋبلگە جەتتى (ورتاشا باعامى 5,6045 تەڭگە). 19-23-قازان ارالىعىندا تەڭگە باعامى ءتورت نەگىزگى ۆاليۋتاعا قاتىستى ءارتۇرلى باعىتتا وزگەردى. دۇيسەنبىدە دوللاردىڭ رەسمي باعامى 452,12 تەڭگە بولسا، جۇماعا قاراي 447,94 تەڭگەگە دەيىن تومەندەدى. وسىلايشا، اپتا ىشىندە دوللار 4,18 تەڭگەگە نەمەسە شامامەن 0,9 پايىز ارزاندادى.
الايدا بيرجاداعى جۇما كۇنگى ساۋدادا دوللاردىڭ ورتاشا سارالانعان باعامى الدىڭعى كۇنمەن سالىستىرعاندا 4,02 تەڭگەگە ءوسىپ، 452,11 تەڭگە بولىپ شىعا كەلدى.
بازالىق مولشەرلەمە
وسىلايشا اپتا سوڭىندا تەڭگە السىرەدى. سونداي-اق 23-قازاندا ۇلتتىق بانك بازالىق مولشەرلەمەنى 0,5 پايىزدىق تارماققا تومەندەتىپ، جىلدىق 15,75 پايىز دەڭگەيىندە بەلگىلەدى.
رەتتەۋشىنىڭ شەشىمىنە جىلدىق ينفلياتسيانىڭ باياۋلاۋى نەگىز بولدى. 2026 -جىلعى قىركۇيەكتە ينفلياتسيا 9,3 پايىز دەپ تىركەلدى. ازىق-تۇلىك ينفلياتسياسى 8,5 پايىزعا، ازىق-تۇلىككە جاتپايتىن تاۋارلار ينفلياتسياسى 11 پايىزعا دەيىن تومەندەدى. قىزمەتتەر باعاسىنىڭ جىلدىق ءوسىمى 8,9 پايىز دەڭگەيىندە قالدى.
ۇلتتىق بانك ءتوراعاسى تيمۋر سۇلەيمەنوۆ ينفلياتسيانىڭ تومەندەۋىنە تەڭگەنىڭ نىعايۋى، تۇتىنۋشىلىق سۇرانىستىڭ ورنىعۋى جانە ۇكىمەتپەن بىرلەسكەن ينفلياتسياعا قارسى شارالار ىقپال ەتكەنىن ايتتى. دەگەنمەن ينفلياتسيا نىسانالى دەڭگەيدەن ءالى جوعارى، ال تاۋەكەلدەر تەڭگەرىمى پروينفلياتسيالىق ايماقتا قالىپ وتىر.
سونداي- اق ول بازالىق مولشەرلەمەنى 2026 -جىلدىڭ سوڭىنا دەيىن قايتا وزگەرتۋ ىقتيمالدىعى تومەن ەكەنىن مالىمدەدى. كەلەسى جوسپارلى شەشىم 4-جەلتوقساندا جاريالانادى.
500 تەڭگەلىك باعام قايتا ورالا ما؟
ۇلتتىق بانكتىڭ قازان ايىنداعى كاسىبي قاتىسۋشىلار ساۋالناماسىندا 2026 -جىلدىڭ سوڭىنا ارنالعان ينفلياتسيا بولجامى 9,5 پايىزعا دەيىن تومەندەدى. 2027 -جىلعا بولجام 8,3 پايىز، ال 2028 -جىلعا 6,9 پايىز بولدى.
ساۋالناماعا قاتىسۋشىلاردىڭ بولجامى بويىنشا، دوللاردىڭ ورتاشا جىلدىق باعامى 2026 -جىلى 479 تەڭگە، 2027 -جىلى 499,6 تەڭگە، 2028 -جىلى 527,1 تەڭگە بولۋى مۇمكىن. بۇل - ۇلتتىق بانكتىڭ ناقتى باعامعا قاتىستى مىندەتتەمەسى ەمەس، كاسىبي نارىق قاتىسۋشىلارى كۇتەتىن بولجام.
ۇلتتىق بانكتىڭ الدىنا ينفلياتسيانى 2027 -جىلى 6,5-8,5 پايىز ارالىعىنا ءتۇسىرىپ، 2028 -جىلى 5 پايىزعا جاقىنداتۋ مىندەتى قويىلعان. رەتتەۋشى اقشا- كرەديت شارتتارىن ۇستامدى قاتاڭ دەڭگەيدە ساقتاپ، باعا تۇراقتىلىعىنا باسىمدىق بەرەتىنىن اتاپ ءوتتى.
قىركۇيەككە ارنالعان ۆاليۋتالىق شولۋىندا ۇلتتىق بانك ۇلتتىق قوردان 200 ميلليون دوللار ساتقانىن حابارلادى. ال التىن ساتىپ الۋدى تەڭەستىرۋ اياسىندا قىركۇيەكتە شامامەن 374 ميلليارد تەڭگە اينالىمنان الىنعان. 2026 -جىلدىڭ ءتورتىنشى توقسانىندا وسى تەتىك شەڭبەرىندە 907 ميلليارد تەڭگەگە بالاما شەتەل ۆاليۋتاسىن ساتۋ جوسپارلانعان.
اپتا سوڭىنداعى دەرەكتەر دوللار مەن ەۋرونىڭ قىمباتتاعانىن، يۋان مەن رۋبلدىڭ دە تەڭگەگە شاققانداعى باعامى كوتەرىلگەنىن كورسەتەدى.
