اليمەنت قارىزى 12 ميلليون تەڭگەگە جەتكەن قىزىلوردالىقتىڭ باس بوستاندىعى شەكتەلدى
قىزىلوردا. KAZINFORM - قىزىلوردا وبلىستىق پروكۋراتۋراسى اليمەنت تولەۋدەن قاساقانا جالتارعان بورىشكەرلەرگە قاتىستى قىلمىستىق كودەكستىڭ 139-بابىمەن 32 قىلمىستىق ءىستى تىركەدى.
مۇنداي قىلمىس ءۇشىن 600 ساعاتقا دەيىن قوعامدىق جۇمىسقا تارتۋ نەمەسە ەكى جىلعا دەيىن باس بوستاندىعىن شەكتەۋ جازاسى كوزدەلگەن. ول بولماسا سول مەرزىمگە باس بوستاندىعىنان ايىرىلۋى مۇمكىن.
- اتالعان قىلمىستىق ىستەر بويىنشا 12 بورىشكەرگە قاتىستى ايىپتاۋ ۇكىمدەرى شىقتى. 5 قىلمىستىق ءىس تاراپتاردىڭ تاتۋلاسۋىمەن توقتادى. 3 قىلمىستىق ءىس سوتتا قارالىپ جاتىر، قالعان 12 ءىس قىلمىستىق قۋدالاۋ ورگاندارىنىڭ وندىرىسىندە. مىسالى، بورىشكەرلەردىڭ ءبىرى 2023 -جىلدان بەرى اليمەنت تولەمەي كەلگەن. قالىپتاسقان قارىز 12 ميلليون تەڭگەگە جەتكەن. قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى ونىڭ باس بوستاندىعىن 1 جىلعا شەكتەدى، - دەلىنگەن حابارلامادا.
