الىسقا ۇشادى، قىسقا جولاققا قونادى: ەلگە جاڭا اسكەري ۇشاق كەلدى
استانا. KAZINFORM - يسپانيادان الماتى قالاسىنا ق ر قارۋلى كۇشتەرىنىڭ اۋە قورعانىسى كۇشتەرىنە ەكىنشى اۋىر اسكەري-كولىك Airbus A400M Atlas ۇشاعى جەتكىزىلدى، دەپ حابارلايدى قورعانىس مينيسترلىگىنىڭ باسپا ءسوز قىزمەتى.
مينيسترلىك مالىمەتىنشە، ەكىنشى A400M ۇشاعىنىڭ كەلۋى قازاقستاننىڭ اسكەري-كولىك اۆياتسياسىنىڭ مۇمكىندىكتەرىن كەڭەيتەدى.
A400M ۇشاقتارى قورعانىس مىندەتتەرىن ورىنداۋمەن قاتار، توتەنشە جاعدايلاردىڭ سالدارىن جويۋ، حالىقتى ەۆاكۋاتسيالاۋ جانە گۋمانيتارلىق كومەك جەتكىزۋ ماقساتىندا دا پايدالانىلۋى مۇمكىن.
اسكەري-كولىك اۆياتسياسىن قولدانۋدىڭ تاعى ءبىر ماڭىزدى باعىتى قازاقستاندىق اسكەري قىزمەتشىلەردىڭ حالىقارالىق بىتىمگەرلىك ميسسيالارعا قاتىسۋىن قامتاماسىز ەتۋ بولماق. مۇنداي ساناتتاعى ۇشاقتاردىڭ بولۋى ۇلتتىق بىتىمگەرلىك كونتينگەنتتى ءوز كۇشىمەن تاسىمالداۋ مۇمكىندىگىن كەڭەيتەدى.
جاڭا اۆياتسيالىق تەحنيكانى پايدالانۋعا قازاقستاندىق ەكيپاجدار مەن ينجەنەرلىك-تەحنيكالىق پەرسونال دايىندالدى. ولار يسپانيانىڭ سيەۆيليا قالاسىنداعى Airbus وقۋ ورتالىعىندا تەوريالىق جانە پراكتيكالىق دايارلىقتان ءوتىپ، اۋە كەمەلەرىن باسقارۋ، پايدالانۋ جانە تەحنيكالىق قىزمەت كورسەتۋ ەرەكشەلىكتەرىن مەڭگەردى.
- Airbus A400M اسكەري-كولىك ۇشاعى قازاقستان، تۇركيا، گەرمانيا، مالايزيا، يندونەزيا، فرانتسيا، ۇلىبريتانيا، يسپانيا، بەلگيا جانە ليۋكسەمبۋرگپەن قوسا، ون ەلدىڭ قارۋلى كۇشتەرىندە قولدانىلادى. بۇل ۇشاق اۋىر اسكەري تەحنيكانى الىس قاشىقتىققا تاسىمالداۋمەن قاتار، قىسقا ءارى ارنايى جابىن توسەلمەگەن ۇشۋ-قونۋ جولاقتارىنا دا قونۋعا مۇمكىندىك بەرەدى. وسىلايشا، قازاقستان قارۋلى كۇشتەرىنىڭ مۇمكىندىكتەرىن كەڭەيتۋگە ىقپال ەتەدى، - دەلىنگەن ۆەدومستۆو تاراتقان اقپاراتتا.
وسىعان دەيىن ەلىمىزدە اۋەجايلار جاڭعىرتىلىپ، ۇشاقتار پاركى جاڭاراتىنىن جازدىق.
