الىس جولدى اتپەن ەڭسەرگەن اتا- بابامىزدىڭ جانىندا ءبىزدىڭ ساپار تۇككە تۇرمايدى -تۇرىك ساياحاتشىلارى
استانا. KAZINFORM - تۇركيانىڭ انكارا قالاسىنان استاناعا اۆتوبۋسپەن شىققان بۋراك پەن يديل ەسىمدى ەرلى-زايىپتى 5400 شاقىرىم جولدى ارتقا تاستاپ، دىتتەگەن جەرگە جەتتى. جاندارىندا گۇنەش ەسىمدى بالاسى جانە انادولى اگەنتتىگىنىڭ ءتىلشىسى بار.
استاناعا تابانى تيە سالا مەيماندار «جەتتىك-اۋ» دەپ كەڭ تىنىستاپ، اۋانى قايتا- قايتا جۇتا بەردى. تۇرلەرىنەن شارشاعانى سەزىلىپ-اق تۇردى.
ارينە، الىس جولدى اۆتوبۋسپەن ەڭسەرۋ وڭاي شارۋا ەمەس. جولدا قيىندىقتار دا از بولماعان.
«قازاقستاننىڭ دالاسى بايتاق ەكەن. ءبىر قالادان كەلەسى قالاعا جەتۋدىڭ ءوزى اجەپتاۋىر ۋاقىت الدى. دەسە دە، دالاعا كوز تاستاپ، جولدا كەزدەسكەن اڭ-قۇسقا قاراپ قازاق حالقىنىڭ ەركىندىگىن، قوناقجايلىلىعىن سەزىنە تۇسكەنىمىز راس. جاسىراتىنى جوق، كەيبىر جولداردىڭ ساپاسى سىن كوتەرمەيدى. ويقى- شويقى جولدار كەزدەسىپ جاتتى. ءبىراق، اۆتوبۋس سىنىپ، وزگە دە قيىندىقتار تۋىنداعان كەزدە سول جەردىڭ اكىمدىگى جەدەل جەتىپ، قاجەتتى كومەكتى كورسەتتى»، -دەدى يديل دۋران.
بۋراك بۇل ساپار ومىرلەرىندە ەڭ ۇزاق ساياحات رەتىندە تىركەلگەنىن ايتتى.
كوشپەندىلەر ويىنىن تاماشالاعان سوڭ قازاقستاننىڭ ءار قالاسىن اسىقپاي ارالاپ شىعۋدى ماقسات ەتىپ وتىرعانىن دا جەتكىزدى.
«بۇل ساپاردىڭ ماڭىزى زور. ءبىزدىڭ اتا- بابامىز كوشپەندى بولعان، قانشاما شاقىرىم جولدى اتپەن ءجۇرىپ وتكەن. ونىڭ قاسىندا ءبىزدىڭ اۆتوبۋسپەن جولعا شىعۋىمىز تۇككە دە تۇرمايدى. كوشپەندى حالىقتىڭ ۇرپاعى بولعان سوڭ ارنايى ساياحات ۇيىمداستىرىپ، پاتريوتتىق رۋحىمىزدى كوتەرگىمىز كەلدى»، - دەدى بۋراك دۋران.
ساياحاتشىلاردى كۇتىپ العان استانا قالاسى اكىمدىگىنىڭ وكىلدەرى سىي-سياپات كورسەتىپ، دۇنيەجۇزىلىك كوشپەندىلەر ويىندارىنىڭ اشىلۋىنا ارنالعان بيلەتتەردى تابىستادى.
سونداي- اق، ءدۇبىرلى دودا بويى جول كورسەتىپ وتىراتىن ارنايى مامانداردىڭ بەكىتىلگەنىن اتاپ ءوتتى.
اۆتور
ورالحان قوجانوۆ
