الپىس جاستان اسقاندا پوديۋمدى باعىندىردى: اجەلەر قازاقى كيىمدى الەمگە تانىتىپ ءجۇر
استانا. KAZINFORM - جاسى 60 تان اسقان ولار ءسان كورسەتىلىمدەرىنە بيىك وكشەمەن شىعىپ، ۇلتتىق كيىمدى زاماناۋي ۇلگىدە تانىستىرادى. اجەلەردىڭ ايتۋىنشا، شەتەلدىك كورەرمەندەر قازاقى كيىمگە قىزىعىپ، ونىڭ «قاي ۇلتتىڭ مادەنيەتى؟» دەپ سۇرايدى. El.kz ءتىلشىسى «الەمدى تاڭعالدىرعان قازاق اجەلەرى» توبىنىڭ مۇشەلەرىمەن جانە ولاردىڭ جاتتىقتىرۋشىسىمەن سويلەستى.
توپ مۇشەلەرى ءتۇرلى ەلدەردە وتكەن ءسان كورسەتىلىمدەرىنە قاتىسىپ، قازاقى كيىم ۇلگىلەرىن تانىستىرىپ ءجۇر. نازكەن جيرەنتايەۆانىڭ سوزىنشە، كورەرمەندەر ولاردى توقتاتىپ، سۋرەتكە ءتۇسىپ، كيىمدەرى تۋرالى سۇرايدى.
شەتەلدە ءتىپتى جاس بالالار دا كەلىپ، «مىناۋ قانداي ۇلتتىڭ كيىمى؟» دەپ سۇرايدى. ستامبۇلدا دا ءبىزدى ەرەكشە قارسى الدى. تۇركى حالىقتارى - تۋىسقان ەلدەر عوي، سوندىقتان قۇرمەتى بولەك، - دەيدى ول.
اجەلەر ءۇشىن پوديۋمعا شىعۋ - ءسان كورسەتىلىمىنە قاتىسۋمەن شەكتەلمەيدى. ولار قازاق حالقىنىڭ مادەنيەتىن، ۇلتتىق كيىمىن جانە ايەلدەرگە ءتان سۇلۋلىقتى تانىتۋدى ماقسات ەتەدى.
بيىك وكشەمەن ءجۇرۋىمىزدىڭ ءوزى - بويىمىزدى تىك ۇستاپ، حالقىمىزدىڭ مادەنيەتى مەن كوركەمدىگىن تانىتۋدىڭ ءبىر جولى. ءبىز ەسىل اۋدانىنداعى بەلسەندى ۇزاق ءومىر ءسۇرۋ ورتالىعىندا دايىندالامىز. جاتتىقتىرۋشىمىز توميريس حانىمنىڭ ارقاسىندا وسىلاي ادەمى ءجۇرىپ، ءوزىمىزدى سەنىمدى ۇستاۋدى ۇيرەندىك، - دەيدى نازكەن جيرەنتايەۆا.
توپ مۇشەلەرى جاسىن جاسىرمايدى: «60-تان اسقانبىز» دەيدى. ال 70 جاستاعى ورازكۇل دايرابايەۆا بۇل ورتاعا قوسىلعالى ومىرگە دەگەن كوزقاراسى وزگەرگەنىن ايتادى.
ورتالىققا كەلگەلى ادەمى قارتايۋدى ۇيرەنىپ، بەلسەندى ءومىر ءسۇرىپ جاتىرمىز. ۇزاق ءومىر ءسۇرۋ ءۇشىن ومىرگە جانە اينالاڭداعى ادامدارعا ماحابباتپەن قاراۋ كەرەك. قازىر جاستارعا ۇلگى بولا الامىز دەپ ويلايمىن، - دەيدى ول.
«نەمەرەلەرگە كىم قارايدى؟» دەگەن ساۋالعا اجەلەر كۇلىپ جاۋاپ بەردى: نەمەرەلەرى ەسەيگەن، ەندى شوبەرە كۇتىپ ءجۇر. جاقىندا دا ولاردىڭ باستاماسىن قولدايدى.
بالالارىمىز دا، جولداستارىمىز دا قولدايدى. نەمەرەلەرىمىز بار، ءبىراق بارىنە ۇلگەرەمىز، - دەيدى گۇلنار ايتمۇقانوۆا.
توپتىڭ جاتتىقتىرۋشىسى توميريس باتيانوۆا قازاقستاندا جاسى ۇلكەن مودەلدەرگە ارنالعان باعىت كەيىنگى جىلدارى دامي باستاعانىن ايتادى. ونىڭ سوزىنشە، العاشقى توپتار 2021 -جىلى قۇرىلعان. قازىر بۇل باعىتقا قىزىعۋشىلىق ارتىپ كەلەدى.
ءار ايەل ءومىر جولىنان ءوتىپ، بالا ءوسىرىپ، وتباسىنا دا، جۇمىسىنا دا ۋاقىت بولەدى. بەلگىلى ءبىر جاسقا كەلگەندە وزىنە كوڭىل ءبولىپ، جارقىراپ كورىنگىسى كەلەدى. ءبىزدىڭ مودەلدەر ساحناعا شىعىپ، وزدەرىن تانىتۋعا مۇمكىندىك الىپ وتىر، - دەيدى جاتتىقتىرۋشى.
باتيانوۆانىڭ ايتۋىنشا، مودەلدەرمەن جۇمىس ىستەۋ ءۇشىن تۇراقتى دايىندىق قاجەت.
قيمىل- قوزعالىستى، دەنە قالپىن جانە ءجۇرىس مانەرىن قالىپتاستىرۋعا ۋاقىت كەرەك. ال جاسى ۇلكەن مودەلدەردىڭ باستى ارتىقشىلىعى - تارتىپتىلىگى مەن جاۋاپكەرشىلىگى.
