الپىس اتقا تاتيتىن ساۋكەلە

استانا. KAZINFORM - سانكت-پەتەربۋرگتەگى انتروپولوگيا جانە ەتنوگرافيا مۋزەيىندە تۇرعان كونە ساۋكەلەنى ⅩⅨ عاسىردىڭ ەكىنشى جارتىسىندا بۇرىنعى تورعاي وبلىسى قوستاناي ۇيەزىنەن شىققان ايگىلى يمانبايەۆتار اۋلەتىنىڭ وكىلى حاسان يمانبايەۆ اپارىپ تاپسىرعان.

سالماعى اناۋ-مىناۋ ەمەس 2,7 كەلى بولاتىن بيىك ساۋكەلەنى تىگۋگە بارقىت، جىبەك، شۇعا، كيىز، كامشات تەرىسى پايدالانىلىپ، التىنداتقان ويۋ-ورنەكپەن اسەمدەلگەن، التىن، كۇمىس، اقىق، جاۋھار سىندى نەشە ءتۇرلى اسىل تاسپەن ارلەنگەن.

ساۋكەلەنىڭ انىقتاماسىندا «مۋزەيگە العاش كەلىپ تۇسكەن باس كيىمدەردىڭ ءبىرى. قازاق حالقىنىڭ ءداستۇرلى ونەرىنىڭ بىرەگەي ۇلگىسى. اسا باي كوركەمدىگىمەن ەرەكشەلەنەدى. قازاق ساۋكەلەسى ءبىر-بىرىنە ەشقاشان ۇقسامايدى: سىرتقى ءپىشىنى مەن ءداستۇرلى ويۋ-ورنەك قۇرىلىمى ساقتالعانىمەن، ءار باس كيىمنىڭ بەزەندىرىلۋىندە وزىندىك ەرەكشەلىك بار. قالىڭدىق كوبىنە ءوز اناسى مۇراعا بەرگەن ساۋكەلەنى كيەدى دە، ءبىر جىلدان كەيىن عانا تۇرمىسقا شىققان ايەلدىڭ باس كيىمىن كيۋ قۇقىنا يە بولادى. وسىلايشا، ايەل زاتىنىڭ باسىنداعى ساۋكەلە ونىڭ قىز كەزىندەگى قىزىق داۋرەنىنەن قول ءۇزىپ، ەندى انا بولۋعا اياق باسقان وتپەلى كەزەڭدە جۇرگەنىن بىلدىرەدى»، دەپ جازىلعان.

ساۋكەلەنى مۋزەيگە تاپسىرار ساتتە 600 رۋبلگە باعالانعان. بۇل سول كەزدە شامامەن 60 اتتىڭ قۇنىمەن پارا-پار كەلگەن.

egemen.kz