الەمدىك ب ا ق-تاعى قازاقستان: الماتىداعى جەر سىلكىنىسى، روبوت وپەراتسياسى جانە ستارلينك موبيلدى قىزمەتى

Reuters: قازاقستان قاشاعان كەن ورنىن يگەرۋشى وپەراتوردان 5,2 ميلليارد دوللار ايىپپۇل وندىرمەكشى

قازاقستان NCOC كونسورتسيۋمىنان 2,3 تريلليون تەڭگە (5,2 ميلليارد دوللار) كولەمىندەگى ايىپپۇلدى ماجبۇرلەپ ءوندىرىپ الۋ ءراسىمىن قايتا باستادى. داۋلى سوت ىسىنە قاتىستى اقپاراتتى Reuters تاراتقان.

NCOC قۇرامىنا Shell, TotalEnergies, ExxonMobil جانە قىتايلىق CNPC كومپانياسى كىرەدى. قازاقستان بيلىگى كونسورتسيۋمدى كۇكىرتتى ساقتاۋ تالاپتارىن بۇزدى دەپ ايىپتاپ، بۇرىننان ايىپپۇل ءوندىرۋ بويىنشا داۋلاسىپ كەلەدى. ال كونسورتسيۋم تاعىلعان ايىپتى مويىندامايدى جانە ايىپپۇلعا بارلىق قولجەتىمدى تاسىلمەن شاعىمدانىپ جاتقانىن مالىمدەگەن.

قاشاعان - كەيىنگى ونجىلدىقتا اشىلعان الەمدەگى ەڭ ءىرى مۇناي كەن ورىندارىنىڭ ءبىرى. ونىڭ بولجامدى قورى 13 ميلليارد باررەلدى قۇرايدى.

Deutsche Welle: ايماقتاعى باستى سەرىكتەس

نەمىستىڭ Deutsche Welle باسىلىمى قاسىم- جومارت توقايەۆتىڭ گەرمانياعا ساپارىنا وراي ەكى ەلدىڭ ەكونوميكالىق بايلانىسىنا ارنالعان ماتەريال جاريالادى.

2026 -جىلدىڭ ەكىنشى توقسانىندا قازاقستان ەۋروپالىق وداقتاعى مۇناي يمپورتتايتىنىڭ شامامەن 13,4%- ىن، كومىردىڭ 9%- دان استامىن قامتاماسىز ەتكەن. ال وتكەن جىلى گەرمانياعا 10,3 ملن توننا مۇناي جەتكىزىلدى.

ەكى ەل ساۋدا- ساتتىقتى ءارتاراپتاندىرۋعا، ينۆەستيتسيا تارتۋعا جانە ءوندىرىستى لوكاليزاتسيالاۋعا ۇمتىلىپ وتىر. بىرلەسكەن دەكلاراتسيادا مەتاللۋرگيا، مۇناي- حيميا، تاماق ونەركاسىبى، تەمىرجول، ماشينا جاساۋ باعىتتارىنا باسىمدىق بەرىلدى.

تاسس: Starlink mobile ىسكە قوسىلدى

Starlink Mobile كومپانياسى قازاقستاندا سپۋتنيكتىك موبيلدى بايلانىستى ىسكە قوستى. ول جەرۇستى موبيلدى جەلىسىنىڭ قامتۋ ايماعىنان تىس جەرلەردە سمارتفون ارقىلى بايلانىس ورناتۋعا مۇمكىندىك بەرەدى. جاڭالىقتى رەسەيلىك تاسس اقپارات اگەنتتىگى حابارلاعان.

Starlink Mobile جەرۇستى موبيلدى ينفراقۇرىلىمىن تولىقتىرىپ، شالعاي اۋدانداردا، قالا سىرتىنداعى جولداردا جانە تاۋلى جەرلەردە بايلانىستى ارتتىرماق.

- قازاقستان - Direct to Cell تەحنولوگياسىن سىناقتان وتكىزىپ، ونى پايدالانۋشىلارعا ارنالعان سەرۆيس دەڭگەيىنە شىعارعان ورتالىق ازياداعى العاشقى ەل. ءبىز ءۇشىن وزىق تەحنولوگيالار حالىقارالىق كەلىسىمنىڭ ءبىر بولىگى بولىپ قانا قويماي، قازاقستاندا ناقتى جۇمىس ىستەپ، ادامدارعا پايدا اكەلۋى ماڭىزدى، - دەدى جاساندى ينتەللەكت جانە سيفرلىق دامۋ ءمينيسترى جاسلان مادييەۆ.

Report: ءبىر كۇندە ءۇش جەر سىلكىنىسى بولدى

قازاقستاندا ءبىر كۇندە ءۇش جەر سىلكىنىسى ورىن الدى. جەر استى دۇمپۋلەرى الماتى وبلىسىندا سەزىلگەن.

Report اگەنتتىگىنىڭ جازۋىنشا، جەر سىلكىنىسىنىڭ وشاعى الماتى قالاسىنان وڭتۇستىك- شىعىسقا قاراي 254 شاقىرىم جەردە ورنالاسقان. ءبىر كۇندە نارىنقول اۋىلىندا - 2-3 بالل، كەگەن اۋىلىندا - 2 بالل دەڭگەيىندەگى جەر سىلكىنىسى تىركەلدى.

توتەنشە جاعدايلار مينيسترلىگىنىڭ ماماندارى جەر سىلكىنىسىنەن كەيىن وزەن ارنالارىن، گيدروتەحنيكالىق نىساندارى، كوشكىن مەن سەل ءقاۋپى بار ۋچاسكەلەردى تەكسەرگەن. ءبىراق ەشبىرىنە زاقىم كەلمەگەن، قازىرگى ۋاقىتتا اتالعان نىساندار شتاتتىق رەجيمدە جۇمىس ىستەپ تۇر.

Jiji Press: روبوتتىڭ كومەگىمەن كۇردەلى وپەراتسيا جاسالدى

الماتى ونكولوگيا ورتالىعىندا دارىگەرلەر العاش رەت اسقازاننىڭ بولىگىن حيرۋرگيالىق تىلىكسىز الدى. ماماندار مۇنى روبوتتىڭ كومەگىمەن جاساعان. اقپاراتتى Jiji Press ءبولىستى.

وپەراتسيا بارىسىندا ICG- ناۆيگاتسياسى - اعزانى انىق كورۋگە مۇمكىندىك بەرەتىن تەحنولوگيا قولدانىلعان. سونداي-اق ليمفا ءتۇيىنىن الۋعا ارنالعان D2 ليمفوديسسەكتسياسى جاسالىپتى.

- روبوتتاندىرىلعان جۇيە جوعارى دالدىكپەن جۇمىس ىستەۋگە جول اشتى. روبوتتىڭ كومەگىمەن اعزانى ۇلكەيتىلگەن ءۇش ولشەمدى كەسكىن ارقىلى ەگجەي- تەگجەيلى كورەمىز ءارى كۇردەلى مانيپۋلياتسيا جاساي الامىز. جۇيە حيرۋرگ قولىنىڭ تابيعي ميكرودىرىلىن دە سەزەدى، - دەدى PhD دوكتورى نۇرلان بالتايەۆ.

اۆتورلار

ەرسىن شامشادين