انگلياعا جۇمىسقا ورنالاستىرۋدى ۋادە ەتكەن بلوگەر 92 ادامنىڭ اقشاسىن جىمقىرعان

وسى ءىس بويىنشا ول سوت الدىندا جاۋاپ بەردى، دەپ حابارلايدى Kazinform اگەنتتىگىنىڭ ءتىلشىسى.

كوكشەتاۋ قالالىق سوتىنىڭ مالىمەتىنشە، كوكشەتاۋ تۇرعىنىنا قاتىستى ق ر قىلمىستىق كودەكسىنىڭ 190-بابى 4-بولىگىنىڭ 2-تارماعى بويىنشا اقپاراتتىق جۇيە مەن ينتەرنەت جەلىسىن پايدالانۋشىلاردى الداۋ جانە ولاردىڭ سەنىمىن تەرىس پايدالانۋ ارقىلى اسا ءىرى مولشەردە الاياقتىق جاساعانى ءۇشىن قىلمىستىق ءىس قارالعان.

- 2024-جىلدان باستاپ كوكشەتاۋ قالاسىنىڭ تۇرعىنى، جەكە كاسىپكەر ب. ازاماتتارعا شەتەلدە جۇمىس ىستەۋگە قاجەتتى قۇجاتتاردى راسىمدەۋ قىزمەتىن كورسەتكەن. الەۋمەتتىك جەلىدە ءوزىن بلوگەر رەتىندە تانىستىرىپ، كورسەتەتىن قىزمەتتەرى تۋرالى اقپارات جاريالاعان. ازاماتتاردى الداپ، ولارمەن شەتەلگە جۇمىسقا ورنالاستىرۋ تۋرالى كەلىسىمشارتتار جاساعان، ۆيزا مەن مەديتسينالىق ساقتاندىرۋدى راسىمدەگەن، انگلياعا ۇشۋ ۋاقىتىن تالقىلاعان جانە قىزمەتى ءۇشىن اقشا العان. الايدا ول قۇجاتتاردى جالعان راسىمدەگەنى ءۇشىن ءار كليەنتتەن 250 مىڭنان 1 ميلليون تەڭگەگە دەيىن اقشا الىپ، كەيىن ءوز مىندەتتەمەلەرىن ورىنداماعان. جاۋاپكەرشىلىكتەن جالتارىپ، كەزدەسۋدەن قاشقان جانە تەلەفون قوڭىراۋلارىنا جاۋاپ بەرمەي قويعان،- دەپ حابارلادى سوتتان.

وسىلايشا ايەل كوكشەتاۋ، استانا، قاراعاندى قالالارىنان جانە اقمولا، قاراعاندى، قوستاناي، سولتۇستىك قازاقستان، قىزىلوردا وبلىستارىنان 92 ادامنىڭ جالپى سوماسى شامامەن 70 ميلليون تەڭگە بولاتىن اقشاسىن يەمدەنگەن.

سوت جازا تاعايىنداۋ كەزىندە سوتتالۋشىنىڭ كامەلەتكە تولماعان بالالارى بار ەكەنىن جەڭىلدەتەتىن ءمان-جاي رەتىندە ەسكەردى.

سوت ۇكىمىمەن ايەل 6 جىل 8 ايعا باس بوستاندىعىنان ايىرىلدى. سونىمەن قاتار وعان ازاماتتاردىڭ قاراجاتىن كوممەرتسيالىق جانە وزگە دە قىزمەتكە تارتۋعا بايلانىستى قىزمەتپەن اينالىسۋعا 5 جىلعا تىيىم سالىندى.

ق ر قىلمىستىق كودەكسىنىڭ 74-بابىنىڭ 1-بولىگىنە سايكەس، اسىراۋىندا ەكى كامەلەتكە تولماعان بالاسى بولۋىنا بايلانىستى سوتتالعان ايەلدىڭ باس بوستاندىعىنان ايىرۋ جازاسىن وتەۋى ءبىر جىلعا كەيىنگە قالدىرىلدى.

- سوتقا 28 جابىرلەنۋشى بەرگەن ازاماتتىق تالاپ ارىزدار قاناعاتتاندىرىلدى. جابىرلەنۋشىلەردىڭ ءارقايسىسىنا كەلتىرىلگەن ماتەريالدىق شىعىن 200 مىڭ تەڭگەدەن 1 ميلليون تەڭگەدەن استام سوماعا دەيىن ءوندىرىلدى، - دەپ قورىتىندىلادى ۆەدومستۆو.