الەمدەگى ەڭ ءدامدى ىرىمشىك انىقتالدى

استانا. KAZINFORM - فرانسيادا وندىرىلگەن Comté ىرىمشىگى الەمدەگى ەڭ ۇزدىك ىرىمشىك اتاندى. ول 45 ەلدەن ۇسىنىلعان 5330 ءونىمنىڭ اراسىنان وزىپ شىعىپ، World Cheese Awards 2026 حالىقارالىق بايقاۋىندا باس جۇلدەنى جەڭىپ الدى. بۇل تۋرالى Euronews جازدى.

ірімшік
Фото: turkystan.kz

بيىلعى بايقاۋ يسپانيانىڭ كوردوۆا قالاسىندا وتكەن. وعان 51 ەلدەن كەلگەن 270 ساراپشى قاتىسىپ، ىرىمشىكتەردى ءدامى، ءيىسى، قۇرىلىمى جانە سىرتقى كورىنىسى بويىنشا باعالاعان.

جەڭىمپاز - فرانسيانىڭ يۋرا تاۋلارىندا ورنالاسقان Fromageries Arnaud كاسىپورنى JuraFlore برەندىمەن وندىرەتىن، 24 اي بويى جەتىلدىرىلگەن Comté ىرىمشىگى.

ءبىر قىزىعى، بۇل ىرىمشىك بۇرىن اسكەري قامال بولعان Fort des Rousses عيماراتىنىڭ جەرتولەلەرىندە ەكى جىل بويى ساقتالعان. ءدال وسى ۋاقىت ىشىندە ونىڭ ەرەكشە ءدامى مەن حوش ءيىسى قالىپتاسقان.

قازىلار القاسىنىڭ مۇشەسى رافا دومينگەس گونسالەس ىرىمشىكتىڭ جاڭعاققا ۇقسايتىن ءدامى مەن اۋىزدا ۇزاق ساقتالاتىن حوش ءيىسىن ەرەكشە اتاپ وتكەن.

«ماعان ونىڭ ەرەكشە ءدامى ۇنادى. اۋىزدا بىرتىندەپ وزگەرىپ، جاڭا قىرىنان اشىلادى. العاش تاتىپ كورگەن ساتتە-اق وسى ىرىمشىكتى تاڭدايتىنىمدى ءبىلدىم»، - دەيدى ساراپشى.

جەڭىس وڭاي كەلمەگەن. فينالدا فرانسۋزدىڭ Ossau-Iraty جانە شۆەيتساريانىڭ Le Gruyère ىرىمشىكتەرى دە 81 ۇپاي جيناعان. جەڭىمپاز قوسىمشا باعالاۋ ناتيجەسىندە انىقتالعان.

ەكىنشى ورىنعا فرانسيانىڭ باسك وڭىرىندە قوي سۇتىنەن جاسالاتىن Ossau-Iraty ىرىمشىگى، ءۇشىنشى ورىنعا شۆەيتساريانىڭ Le Gruyère AOP Réserve ىرىمشىگى يە بولدى.

Comté ىرىمشىگىنىڭ تاريحى ورتا عاسىرلاردان باستالادى. XIII عاسىردا يۋرا ءوڭىرىنىڭ شارۋالارى سۇتتەرىن بىرىكتىرىپ، قىستا ۇزاق ساقتاۋعا بولاتىن ۇلكەن ىرىمشىك دوڭگەلەكتەرىن وندىرە باستاعان.

بۇگىندە Comté تەك فرانسيانىڭ بەلگىلى ءبىر وڭىرىندە، قاتاڭ وندىرىستىك تالاپتارعا سايكەس دايىندالادى. ونىڭ شىققان جەرى مەن ءوندىرىس ءتاسىلى ارنايى ەۋروپالىق بەلگىمەن قورعالعان.

وسىلايشا عاسىرلار بويعى داستۇرمەن دايىندالىپ، ەكى جىل اسكەري قامالدىڭ جەرتولەسىندە جەتىلدىرىلگەن فرانسۋز ىرىمشىگى بيىل الەمنىڭ ەڭ ۇزدىك ءونىمى اتاندى.