پاۆلودارلىق مۇمكىندىگى شەكتەۋلى ازامات شەبەرحانا قۇرىپ، كاسىپ باستادى
پاۆلودار. KAZINFORM - باياناۋىلدىق تاسقايرات جەڭىسوۆ - Ⅲ توپتاعى مۇگەدەكتىگى بار جان. جىگەرلى جاس جۋىقتا بيزنەس-جوسپارىن ءساتتى قورعاپ، مەملەكەتتەن بولىنگەن قايتارىمسىز گرانتتى ۇتىپ الدى. اعاش شەبەرحاناسىن اشىپ، جەرگىلىكتى تۇرعىنداردىڭ تاپسىرىستارىن قابىلداي باستادى.
جاس كاسىپكەر بىلتىر «بيزنەس باستاۋ» كۋرسىنان ءوتىپ، 1 ميلليون 380 مىڭ تەڭگە قايتارىمسىز گرانت ۇتىپ الىپتى. ول قاراجاتقا اعاش شەبەرحاناسىنا ارنالعان قۇرال-جابدىقتاردى الدىرىپ، ءداستۇرلى جينالمالى دوڭگەلەك ۇستەلدەر، ورىندىقتار، ەسىكتەر جانە ت. ب. ونىمدەر جاساۋعا كىرىسىپ كەتكەن.
«رەسەيدەن اعاش كەسەتىن، جوناتىن، سۇرگىلەيتىن، ورنەك سالاتىن 5 ستانوكتى تاپسىرىسپەن الدىردىم. بۇل كاسىپتى باستاعاندا اۋەل باستا قورقىنىش بولعان. دەيتۇرعانمەن، بۇعان دەيىن استانا قالاسىندا اعاش شەبەرحاناسىندا جيناعان ەڭبەك تاجىريبەم ماعان كوپ كومەك بولدى. ستانوكتار مەن قۇرال-اسپاپتاردى يگەرگەنىمنىڭ ناتيجەسىن ەندى كورىپ جاتىرمىن. بالا كەزىمدە ءۇي قوياندارى مەن كوگەرشىندەر وسىرەتىنبىز. ولارعا ارناپ تورلار، ۇيشىكتەر جاسادىق. اعاشتان بۇيىم جاساۋ ونەرى سول كەزدەن قالىپتاسىپ قالعان سىندى. قازىر اعاشتان جانە فانەر كەسىكتەرىنەن ءتۇرلى بۇيىمدار جاساپ جاتىرمىن. ەڭ اۋەلى جينالمالى دوڭگەلەك ۇستەلدىڭ جەڭىل ءتۇرىن شىعارعىم كەلەدى. كوپتەگەن نۇسقالاردى جاساپ كوردىم، ازىرشە ءتيىستى ناتيجەگە جەتكەن جوقپىن. ۇستەل الىپ جۇرۋگە قولايلى، ساپالى ءارى جىلدام قۇرىلاتىن بولۋى كەرەك»، - دەپ ءوز كاسىبى جايىندا اڭگىمەلەدى تاسقايرات جەڭىسوۆ.
ول ءوز كاسىبىن قاراپايىم عانا گاراج قويماسىندا باستاعان. قاراجاتقا قول جەتكىزگەن سوڭ گاراجدىڭ توبەسىن جوندەپ، ەدەنىنە بەتون قۇيعان. ەلەكتر جەلىسى مەن جىلۋ تارتىپ، قابىرعالارىن جىلۋ ۇستاعىش ماتەريالدارمەن قاپتاپتى. ەندى ءوز تىرلىگىنە الاڭسىز كىرىسىپ جاتىر.
ازىرشە شەبەرحانادا جالعىز ءوزى جۇمىس ىستەيدى. ايتۋىنشا، ساپالى ماتەريالداردى تابۋ قيىن. جەرگىلىكتى جەردە اعاش وڭدەيتىن سەحتار جوقتىڭ قاسى، ال سىرتتان كەلەتىن بۇيىمنىڭ ساپاسىن تاپ باسۋ قيىن. ەلەكتر قۇرالدارى مەن ۇساق فۋرنيتۋرالاردى كوبىنە پاۆلودار قالاسىنا بارىپ اكەلىپ ءجۇر.
«ەڭ اۋەلى اۋىل ادامدارىن كۇندەلىكتى ومىرىنە قاجەت بۇيىمدارمەن قامتاماسىز ەتۋدى ۇيعارىپ وتىرمىن. قازىر تۇرعىنداردان دالا دارەتحانالارى، دوڭگەلەك ۇستەلدەر، جۇمساق ورىندىقتارعا تاپسىرىستار ءتۇسىپ جاتىر. كوپتەن جوسپارلاپ جۇرگەن جۇمىستارىمنىڭ العاشقى كەزەڭىن ەڭسەردىم، ەندى كەلەشەكتە بۇيىمدارىمنىڭ اسسورتيمەنتىن كوبەيتۋ كەرەك»، - دەپ وي ءبولىستى.
تاسقايرات ءسوز سوڭىندا قايتارىمسىز گرانت اۋىلداعى ءوزى سياقتى جاستار ءۇشىن كاسىپ اشۋدا مول كومەك بولىپ وتىرعانىن جەتكىزدى. شەبەرحانا يەسى الداعى ۋاقىتتا قولىنان ءىس كەلەتىن ازاماتتاردى جۇمىسقا قابىلداپ، كاسىبىنىڭ اۋقىمىن كەڭەيتۋدى جوسپارلاپ وتىر.
اۆتور
مۇرات اياعان
