پاۆلودارلىق كاسىپكەرلەر زاڭسىز ماينينگتەن 100 ميلليون تەڭگەگە جۋىق پايدا تاپقان
پاۆلودار. KAZINFORM - پاۆلوداردا كريپتوۆاليۋتامەن اينالىسىپ، زاڭسىز داۋلەتكە كەنەلگەن كاسىپكەرلەر انىقتالدى. ولار جالپى سوماسى 100 ميلليون تەڭگەگە جۋىق پايدا تاپقان.
بۇل تۋرالى وڭىرلىك ەكونوميكالىق تەرگەۋ دەپارتامەنتىنىڭ وكىلدەرى - باسشىنىڭ ورىنباسارى قامبار قابدۋللين مەن دەپارتامەنتتىڭ ءبىرىنشى جەدەل باسقارماسىنىڭ باستىعى جولامان قينالبەكوۆ حابارلادى.
«زاڭسىزدىقتىڭ ءبىرى پاۆلوداردىڭ يندۋستريالىق ايماعىنداعى بازالاردىڭ بىرىندە تىركەلدى. بۇل جەردە زاڭسىز ماينينگ ۇيىمداستىرىلىپ، كريپتوۆاليۋتا وندىرىلگەن. ارنايى رۇقساتى جوق، ءتيىستى سالىق تولەمەگەن كاسىپكەر 39 ميلليون تەڭگەگە جۋىق تابىس تاپقان. بارلىق ماينينگ تەحنيكاسى تاركىلەندى. ال ەكىنشى جاعدايدا كۇدىكتى كريپتواميان ارقىلى تاۋاردى ساتۋدان تۇسكەن پايدانى قولما- قول اقشاعا اينالدىرىپ، زاڭسىز ايىرباستاۋ وپەراتسيالارىن جۇرگىزگەن. ەر ادام قازاقستاندا دا، رەسەيدە دە زاڭسىز قىزمەتپەن اينالىسقان. ونىڭ تابىسى شامامەن 60 ميلليون تەڭگەگە جۋىقتاعان»، - دەپ مالىمدەدى دەپارتامەنت وكىلدەرى
ەكى دەرەك بويىنشا دا ق ر قىلمىستىق كودەكسىنىڭ 214-بابى «زاڭسىز كاسىپكەرلىك، زاڭسىز بانكتىك، ميكروقارجىلاندىرۋ نەمەسە كوللەكتورلىق قىزمەت» بويىنشا قىلمىستىق ءىس قوزعالدى.
