پاۆلودارلىق جاس ءوسپىرىم ساياباقتا سىرا ىشكەن
استانا. قازاقپارا - يۋۆەنالدى پوليتسيانىڭ قىزمەتكەرلەرى جازعى دەمالىس كەزىندە بالالار نەمەن اينالىساتىنىن انىقتادى، - دەپ حابارلايدى pavlodarnews.kz.
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، «تۇنگى قالاداعى بالالار» جەدەل پروفيلاكتيكالىق ءىس-شاراسى اياسىندا ەكى كۇن ىشىندە وبلىس ورتالىعىنىڭ كوشەلەرىندە كامەلەتكە تولماعان بالا 38 ۇستالعان. ونىڭ ىشىندە ءبىر جاس ءوسپىرىم ماس كۇيىندە بولعان.
«ماسەلەن، 14 جاستاعى جاس ءوسپىرىم كەشكى ۋاقىتتا استانا - تولستوي كوشەلەرىنىڭ قيىلىسىنداعى ساياباقتا سىرا ىشكەن. تۇنگى ۋاقىتتا ساعات 23.00-دەن كەيىن ورتالىق جاعالاۋدا كامەلەتكە تولماعان سەگىز بالا زاڭدى وكىلدەرىسىز جالعىز جۇرگەن. اتالعان بۇزۋشىلىقتار ءۇشىن بارلىق زاڭدى وكىلدەر جاۋاپقا تارتىلدى»، - دەدى پاۆلودار قالاسى پوليتسيا باسقارماسى جەرگىلىكتى پوليتسيا قىزمەتىنىڭ باستىعى قانات دۇيسەكەنوۆ.
