پاۆلودارلىق ارحەولوگتەر قولا داۋىرىنە جاتاتىن تاريحي جادىگەرلەردى تاپتى
پاۆلودار. KAZINFORM - ارحەولوگيالىق زەرتتەۋلەر ينستيتۋتى كوكتاس-2 ارحەولوگيالىق كەشەنىنە جۇرگىزگەن ەكسپەديتسيا بارىسىندا سيرەك كەزدەسەتىن جادىگەرلەردى تاپتى. سونىڭ ءبىرى - ءبىزدىڭ زامانىمىزعا دەيىنگى 13-8-عاسىرلاردىڭ ورتاسىنداعى سارگارين- الەكسەيەۆ مادەنيەتىنە جاتاتىن نايزانىڭ ۇشى.
ماي اۋدانىنداعى كوكتاس ارحەولوگيالىق كەشەنىندە ەكىنشى جىل قاتارىنان زەرتتەۋ جۇمىستارى جۇرگىزىلىپ جاتىر. بيىل مۇندا 3,5 مىڭ جىلدىق تاريحى بار بىرەگەي عيماراتتار، مىس كەنى وندىرىلگەن جانە وڭدەلگەن كونە شاحتالار تابىلدى. بۇل ايماقتا 20 دان استام قورعان بار، ولاردىڭ كەيبىرەۋى ساق كەزەڭىنە جاتادى. جەرلەۋ ورىندارىن زەرتتەۋ بارىسىندا ادام سۇيەكتەرى، جانۋارلار، كەراميكادان جاسالعان اس ءۇي ىدىستارىنىڭ سىنىقتارى، قولادان جاسالعان جەبەلەردىڭ ۇشى تابىلدى. ەندى تابىلعان جادىگەرلەر قاجەتتى زەرتحانالىق وڭدەۋدەن وتەدى.
«بۇل - پاۆلودار ءوڭىرى ءۇشىن بىرەگەي ولجا. نايزانىڭ ۇشى ءبىزدىڭ زامانىمىزعا دەيىنگى 13-8-عاسىرلاردىڭ ورتاسىنداعى سارگارين- الەكسەيەۆ مادەنيەتىنە جاتادى. جالپى مارعۇلان ۋنيۆەرسيتەتىنە قاراستى ارحەولوگيالىق زەرتتەۋلەر ينستيتۋتىنىڭ عالىمدارى ەرتىس- بايان ءوڭىرىنىڭ تاريحي-مادەني مۇراسىن ساقتاۋ جانە زەردەلەۋ بويىنشا ۇلكەن جۇمىس جۇرگىزىپ وتىر»، - دەيدى ارحەولوگيالىق زەرتتەۋلەر ورتالىعىنىڭ عىلىمي قىزمەتكەرى اسقار ءابىلدين.
كوكتاس ارحەولوگيالىق كەشەنىندە قازىرگى ۋاقىتتا ينستيتۋتتىڭ عىلىمي قىزمەتكەرلەرى اسقار ءابىلدين، ەلەنا تۋشەۆا، تالعات ايلىبايەۆ باستاعان ارحەولوگيالىق ەكسپەديتسيا جۇمىس جۇرگىزىپ جاتىر. ارحەولوگيالىق زەرتتەۋلەر ينستيتۋتىنىڭ وكىلى ەڭلىك ابەۋوۆانىڭ ايتۋىنشا، ماي اۋدانىنداعى تاريحي جەرلەر نەگىزىنەن كەيىنگى قولا جانە ەرتە تەمىر داۋىرلەرىنە جاتادى.
«عالىمدارىمىزبەن بىرگە ول جەرلەردە ۋنيۆەرسيتەتىمىزدىڭ 50 دەن اسا ستۋدەنتى قازبا جۇمىستارىمەن شۇعىلدانىپ جاتىر. ءبىر جاعىنان جاستار ءۇشىن ۇلكەن تاجىريبە بولادى. تابىلعان نايزانىڭ ۇشى - ەڭ جاقسى ساقتالعان جادىگەردىڭ ءبىرى. كەزىندە عۇلاما عالىم الكەي مارعۇلان پاۆلودار وبلىسىنداعى كوپتەگەن جەرلەرگە عىلىمي تۇرعىدان سيپاتتاما بەرىپ كەتكەن. سونىڭ ىشىندە باياناۋىل اۋدانى اۋماعىندا قانشاما ارحەولوگيالىق ورىندار بار. تورايعىرداعى ساق قورعاندارى، «كەمپىرتاس» ماڭايى ءبىزدىڭ قىزمەتكەرلەرىمىز تۇراقتى زەرتتەۋ جۇرگىزەتىن اۋماقتار. شىلدە ايىنىڭ سوڭىندا ماي اۋدانىنداعى جۇمىستارىمىزدى ءتامامداپ، باياناۋىلعا قاراي ويىسامىز. ەكسپەديتسيا مۇشەلەرى ول جاقتان دا ولجالى قايتادى دەگەن ءۇمىتىمىز زور. مۇندا اشىق اسپان استىندا مۇراجاي قۇرۋ جانە اينالىمعا جاڭا قىزىقتى تاريحي-مادەني كورنەكتى ورىن ەنگىزۋ كوزدەلىپ وتىر. پاۆلودار قالاسى ماڭىندا بايدالا قورىمىن زەرتتەۋ جالعاسىپ جاتىر. وندا قيماق كەزەڭىنە قاتىستى قىزىقتى جەرلەۋ ورىندارى تابىلعان بولاتىن»، دەيدى ەڭلىك ابەۋوۆا.
ەسكە سالا كەتەيىك، كەرەكۋدەن تابىلعان «قيماق كۇيمەسى» قالپىنا كەلتىرىلىپ جاتىر.
اۆتور
مۇرات اياعان
