پاۆلوداردا ۇيلەرىن سۋ باسقان وتباسىلارعا جاڭا باسپانا تۇرعىزىلا باستادى
پاۆلودار. KAZINFORM - دەمەۋشىلەر قاراجاتى ەسەبىنەن جالاۋلى اۋىلىندا 5 جەكە ءۇيدىڭ قۇرىلىسى باستالىپ تا كەتتى. تاعى 9 ءۇيدىڭ يەلەرى باسپانالارىن جوندەۋگە اقشالاي وتەماقى الدى.
مەملەكەت باسشىسى قاسىم-جومارت توقايەۆ سۋ تاسقىنىنان زارداپ شەككەن ازاماتتارعا كەلتىرىلگەن زالالدى جەدەل تۇردە وتەۋدى جانە ولاردىڭ تۇرعىن ۇيلەرىن قالپىنا كەلتىرۋدى تاپسىرعانى ءمالىم. پاۆلودار وبلىسىندا سۋ تاسقىنى بويىنشا جاعداي تۇراقتالىپ، ەلدى مەكەندەرگە كەلتىرىلگەن زالالدى ەسەپتەۋ، رەتكە كەلتىرۋ جۇمىستارى جۇرگىزىلىپ جاتىر.
بۇعان دەيىن توپان سۋدىڭ الەگىنەن اقتوعاي اۋدانىنىڭ جالاۋلى اۋىلىندا توتەنشە جاعداي جاريالانعانى تۋرالى حابارلاعانبىز
قۇتقارۋشىلار كۇنى-ءتۇنى ەڭبەكتەنىپ، ۇلكەن قازانشۇڭقىرلار قازىپ، ەلدى مەكەنگە كىرگەن سۋدىڭ ءبىراز بولىگىن اعىزىپ جىبەردى. جاعداي دۇرىستالعان سوڭ اتالعان جالاۋلىداعى توتەنشە جاعداي الىنىپ تاستالدى.
جالاۋلى اۋىلىندا سۋ تاسقىنىنان 14 ۇيگە زاقىم كەلگەن. ارنايى كوميسسيا 5 ءۇيدى جوندەۋگە كەلمەيدى دەپ تانىپ وتىر.
- مۇنداعى سۋ باسقان 9 ءۇيدىڭ يەسى تولىق اقشالاي وتەماقى الدى. ال جوندەۋگە كەلمەيتىن اپاتتى جاعدايداعى 5 ءۇيدىڭ يەسى وسى جازدا جاڭا باسپاناعا قونىستاناتىن بولادى. ولار ءۇشىن جاڭا 5 تۇرعىن ءۇيدىڭ قۇرىلىسىن باستادىق. ۇيلەردى سالۋ بويىنشا بارلىق شىعىنداردى ERG توبى ءوز موينىنا الدى. قۇرىلىستى 3 ايدىڭ ىشىندە اياقتاۋ جوسپارلانىپ وتىر، - دەپ حابارلادى پاۆلودار وبلىسىنىڭ اكىمى اسايىن بايحانوۆ.
ءوڭىر باسشىسىنىڭ ايتۋىنشا، اۋىلدا ءۇش قازانشۇڭقىردىڭ قۇرىلىسى جالعاسۋدا. سونداي-اق، شىلدە ايىنىڭ سوڭىنا دەيىن جالاۋلىدا 6 شاقىرىم بوگەت سالىنادى. بۇل شارالار اۋىلدى قارعىن سۋ باسۋ ماسەلەسىن ءبىرجولا شەشۋگە ارنالعان.
ەسكە سالا كەتەيىك، پاۆلودارلىق قۇتقارۋشىلار سولتۇستىك قازاقستان وبلىسىنا كومەككە اتتاندى.
كەيىنگى 11 جىلدا العاش رەت ەرتىس جايىلماسىنىڭ 90 پايىزىن سۋ باسادى.
