پاۆلوداردا وزگە ۇلت وكىلدەرى قازاقشا ءان سالاتىن جاڭا جوبا باستالدى
پاۆلودار. KAZINFORM - پاۆلودار قالاسىنداعى «دوستىق ۇيىندە» وبلىستىق قازاقستان حالقى اسسامبلەياسىنىڭ ەتنومادەني بىرلەستىكتەرى اراسىندا «قازاقشا ءان سالامىز» فەستيۆالى باستالدى. وزگە ۇلت وكىلدەرى ەل اۋزىنداعى تانىمال اندەردى تامىلجىتا شىرقاپ، حالقىمىزدىڭ انشىلىك مادەنيەتىن جاقىننان تاني ءتۇستى.
«قازاقشا ءان سالامىز» فەستيۆالىنىڭ العاشقى جوباسى وڭىردەگى بارلىق ەتنومادەني بىرلەستىكتەردىڭ باسىن قوستى. جالپى سانى 60-تان استام قاتىسۋشى ونەر كورسەتىپ، قازاقتىڭ تانىمال اندەرىن ورىندادى. فەستيۆالدىڭ اتى ايتىپ تۇرعانداي، مۇندا تەك وزگە ۇلت وكىلدەرى قازاق تىلىندەگى اندەردى شىرقادى. اۋەلى قاتىسۋشىلار جەرەبە تارتىسىپ، «اسىل اۋەن»، «شالقىما»، «سىرلى ساز»، «دۋدار-اي» توپتارىنا ءبولىندى. ال مادەني ءىس-شارانىڭ ءوزى «حالىق اندەرى»، «قازاق كومپوزيتورلارىنىڭ اندەرى»، «زاماناۋي اندەر» دەگەن ءۇش كەزەڭنەن تۇردى.
- «قازاقشا ءان سالايىق» جوباسى پاۆلودار وبلىسى اكىمىنىڭ تاپسىرماسى بويىنشا تۇڭعىش رەت وبلىستىق اسسامبلەيادا وتكىزىلىپ وتىر. جوبا ماقساتى - جاستار اراسىندا قازاق مادەنيەتىنە دەگەن قۇرمەت سەزىمىن تاربيەلەۋ، وزگە ەتنوس وكىلدەرى اراسىندا رۋحاني بىرلىك پەن ۇلتارالىق كەلىسىم يدەيالارىن تاراتۋ، مەملەكەتتىك ءتىلدىڭ دامۋىنا ىقپال ەتۋ. بۇل ارقىلى قازاقتىڭ مادەني قۇندىلىقتارى ۇلىقتالادى. ەتنومادەني بىرلەستىكتەردىڭ وكىلدەرى قازاقشا ءان شىرقاپ، رۋحاني ونەرىمىزبەن تانىسادى. بۇل جوبا وڭىردە العاش رەت ۇيىمداستىرىلدى. الداعى رەسپۋبليكا كۇنىندە وزگەشە فورماتتا وتكىزەمىز دەپ جوسپارلاپ وتىرمىز، - دەيدى «قوعامدىق كەلىسىم» مەكەمەسىنىڭ باسشىسى ءنۇريا كوبەنوۆا.
قاتىسۋشىلار جەرەبە تاڭداپ، وزدەرىڭە بەرىلگەن اندەردى ورىندادى. ولاردىڭ قاتارىندا «انا»، «ۇستازىم»، «سارجايلاۋ»، «ارمانداستار»، «ءبىر بالا» تۋىندىلارى بار.
اۆتور
مۇرات اياعان
