پاۆلوداردا ەت وڭدەيتىن جاڭا كاسىپورىندار سالىنادى

پاۆلودار. KAZINFORM - ەرتىس- بايان ءوڭىرىنىڭ اۋداندارىندا قايتا وڭدەۋ سالاسى كەنجەلەپ تۇر. اسىرەسە، باياناۋىل، ەرتىس اۋداندارىندا اۋىل شارۋاشىلىعى شيكىزاتىن وڭدەپ، دايىن تاۋار شىعاراتىن كاسىپورىندار وتە از.

وڭدەۋ كاسىپورىندارىنا سۇرانىپ تۇرعان ءوڭىردىڭ ءبىرى - باياناۋىل اۋدانى. مۇنداعى مەتاللۋرگيالىق، كومىر ءوندىرىسى سالالارىن ايتپاعاننىڭ وزىندە، مال ونىمدەرىن قايتا وڭدەۋ سەكتورى دامىماي قالعان. اۋداندا شامامەن 100 مىڭعا تارتا قارا مال، 100 مىڭنىڭ ۇستىندە قوي- ەشكى، 70 مىڭداي جىلقى بار.

پاۆلودار وبلىسىنىڭ اكىمى اسايىن بايحانوۆتىڭ ايتۋىنشا، باياناۋىلدا جانە ەرتىس اۋدانىندا الداعى جىلدارى ەت وڭدەۋ كاسىپورىندارى سالىنادى دەپ جوسپارلانعان.

- ەت وڭدەۋ كومبيناتتارى اۋماقتارداعى مالدىڭ سانىنا قاراي قۇرىلاتىن بولادى. ماسەلەن، ەلىمىزدىڭ وڭتۇستىك وڭىرلەرى ءۇشىن كۇنىنە 100 مالدىڭ ەتىن وڭدەيتىن كاسىپورىن ورتاشا بولىپ ەسەپتەلسە، ءبىزدىڭ اۋداندار ءۇشىن ول ەڭ جوعارى نورما بولىپ شىعۋى مۇمكىن. الداعى جىلدارى قوس اۋداندا ينۆەستيتسيالىق قۇنى 5,5 ميلليارد تەڭگە تۇراتىن ەكى ەت كومبيناتىن سالامىز دەگەن جوسپار تۇر. بۇل جەردە «قازاگرونىڭ» كومەگىنە سۇيەنەمىز. ينفراقۇرىلىمى جەرگىلىكتى بيۋدجەت ەسەبىنەن تارتىلادى. بۇل كاسىپورىندار ايماقتىڭ ەكونوميكاسىنا ەلەۋلى تابىس اكەلۋى ءتيىس، - دەپ حابارلادى Kazinform تىلشىسىنە ءوڭىر باسشىسى اسايىن بايحانوۆ.

ەسكە سالا كەتەيىك، ەلىمىزدە 5 جىل ىشىندە اۋىل شارۋاشىلىعى ونىمدەرىن قايتا وڭدەۋدى دامىتۋعا 372 ميلليارد تەڭگە باعىتتالادى.