پاۆلوداردا ەرتىس وزەنىنىڭ سول جاعالاۋىندا ەكو-قالاشىق سالىنادى

پاۆلودار. KAZINFORM - جوبالاۋشىلار قۇرىلىس وزەننىڭ ەكوجۇيەسىنە نۇقسان كەلتىرمەيدى دەپ سەندىرىپ وتىر. بۇل جەردە شاعىن دەمالىس ۇيلەرى مەن اكۆاپارك سالىنادى.

پاۆلودار قالاسى تۋريستىك الەۋەتىن كۇشەيتۋگە كۇش سالىپ جاتىر. ءىرى جوبانىڭ ءبىرى - ەرتىس وزەنىنىڭ سول جاعالاۋىندا سالىناتىن ەكو-قالاشىق. شاھاردىڭ ءوزى وڭ جاعالاۋدا ورنالاسقاندىقتان ەكو- قالاشىققا بولاشاقتا وزەن ءۇستى ارقىلى جەتۋگە بولادى، سونداي-اق اتامەكەن كەنتى ارقىلى كولىك جولى سالىنۋى مۇمكىن.

وبلىس اكىمى اسايىن بايحانوۆتىڭ ايتۋىنشا، قازىرگى ۋاقىتتا «KAZAKH INVEST «ۇلتتىق كومپانياسى» ا ق- نىڭ قاتىسۋىمەن ينۆەستيتسيالىق كەلىسىم پىسىقتالۋدا.

«ەڭ ماڭىزدىسى - جوبانىڭ ەكولوگيالىق بولىگى. قوقىستى شىعارۋ، سۋمەن جابدىقتاۋ جانە كارىزبەن قامتاماسىز ەتۋ ماسەلەلەرىن پىسىقتاۋ قاجەت»، - دەدى ءوڭىر باسشىسى.

Pavlodarnews.kz سايتىنىڭ حابارلاۋىنشا، جوبانى جەرگىلىكتى كاسىپكەر يليا مۋحورتوۆ جۇزەگە اسىرماقشى. ينۆەستور ەكو-قالاشىق ەرتىس جايىلماسىنىڭ ەكوجۇيەسىنە ەشقانداي زيان كەلتىرمەيدى دەپ وتىر.

«قازىر كوپتەگەن زاماناۋي، ەكولوگيالىق تۇرعىدان تازا قۇرىلىس ماتەريالدارى بار. مىسالى، ءبىز اۋماقتا سەپتيك قويامىز، وزەنگە سارقىندى سۋ قۇيىلمايدى. ءارى بىردە-ءبىر اعاش زارداپ شەكپەيدى. ەكوقالاشىق شامامەن 2,5 گەكتار جەردى الادى. بۇل اۋماقتا «A- Frame» تۇرىندەگى 15 ءۇي جانە اعاش پوديۋمدارداعى گلەمپينگتەر ورنالاستىرىلادى. ءارقايسىسىنا 4-12 ادام سىيادى. جوبا كۇردەلى قۇرىلىستان ەمەس، تەك مودۋلدىك كونسترۋكسيالاردان تۇرادى»، دەيدى كاسىپكەر.

بۇل جەردە زامانعا ساي جاعاجاي جاسالىپ، اكۆاپارك سالۋ ويدا بار. ەكو-قالاشىق قىستا دا قىزمەت كورسەتە الادى.