پاۆلوداردا قازاق تەاترى رەسپۋبليكالىق سىنشىلار جۇلدەسىنە يە بولدى
پاۆلودار. KAZINFORM - قازاقستان تەاتر سىنشىلارىنىڭ بىرلەستىگى 2024 -جىلعى وتاندىق تەاترلار شىعارماشىلىق ۇدەرىستەرىنىڭ باعىت-باعدارىن، رەپەرتۋارلىق ساياساتىن جانە كوركەمدىك ىزدەنىستەرىن انىقتاۋ ماقساتىندا جۇرگىزىلگەن مونيتورينگ ناتيجەسىن ۇسىندى.
سىنشىلار جۇلدەسىندە پاۆلودار وبلىستىق ج. ايماۋىتوۆ اتىنداعى قازاق مۋزىكا-دراما تەاترى ەكى بىردەي نوميناتسيادا جەڭىمپاز اتاندى.
- «سىنشىلار جۇلدەسى» - قازاقستان تەاترلارىنىڭ بۇگىنگى شىعارماشىلىعى مەن تىنىس- تىرشىلىگىندەگى زاماناۋي ۇردىستەر مەن ۇدەرىستەردى دەر كەزىندە ايقىنداپ، ولارعا باعا بەرۋ ماقساتىندا ءداستۇرلى تۇردە وتكىزىلىپ كەلەدى. بۇل كەشتە تەك ۇزدىكتەر انىقتالىپ قانا قويماي، وتاندىق تەاتر ۇجىمدارىنىڭ جىل قورىتىندىسى ۇسىنىلدى. تەاتر سىنشىلارى جۇرگىزەتىن مونيتورينگ رەسپۋبليكامىزدىڭ تۇكپىر-تۇكپىرىندە ساحنالانعان پرەمەرالاردى قامتيدى، - دەپ اتاپ ءوتتى «قازاقستان تەاتر سىنشىلارى بىرلەستىگىنەن.
پاۆلودارلىق تەاتر «بالالارعا ارنالعان جىل قويىلىمى» نوميناتسياسىن «دجۋديت جاساعان قيىن تاڭداۋ» سپەكتاكل-شوۋىمەن جەڭىپ الدى. سونداي-اق، «بۇقارالىق اقپارات قۇرالدارىمەن ۇزدىك جۇمىس جاساعان تەاتر» نوميناتسياسىندا ۇزدىك شىقتى.
ەسكە سالا كەتەيىك، پاۆلودارداعى قازاق تەاترىندا وتباسى قۇندىلىعىن سيپاتتايتىن ەرەكشە قويىلىم ساحنالاندى.
ال قىركۇيەك ايىندا پاۆلوداردا الاش ارىسى جۇسىپبەك ايماۋىتوۆتىڭ 135 جىلدىق مەرەيتويىنا ارنالعان «ەرتىس- بايان» I رەسپۋبليكالىق تەاتر فەستيۆالى ءوتتى.
پاۆلودارلىق قازاق تەاترى رەسپۋبليكالىق تەاترلار سىنىندا ب. سوقپاقبايەۆ اتىنداعى جۇلدەگە يە بولدى.
