پاۆلوداردا جۇسىپبەكتىڭ ءوز قولىمەن جاساعان سيا سورعىشى مەن سىزعىشى ساقتالىپ تۇر
پاۆلودار. KAZINFORM - ۇلت اسىلدارىنىڭ ءبىرى جۇسىپبەك ايماۋىتوۆ زامانىندا ون ساۋساعىنان ونەر تامعان شەبەر بولىپتى. ءوز قولىمەن جاساعان اعاش سىزعىشى، سيا سورعىشى پاۆلودارداعى بۇقار جىراۋ اتىنداعى ادەبيەت جانە ونەر مۋزەيىندەدە قاز-قالپىندا ساقتاۋلى تۇر.
پاۆلودار وبلىستىق بۇقار جىراۋ اتىنداعى ادەبيەت جانە ونەر مۋزەيىن ارالاپ ءجۇرىپ، ج. ايماۋىتوۆقا قاتىستى كەيبىر جادىگەرلەرگە ەرىكسىز نازار اۋداردىق.
اسىرەسە، الاش ارداقتىسى ۇنەمى جانىنان تاستاماعان «ناسيحات» قالتا ساعاتى، قاعاز كەسۋگە ارنالعان سىزعىشتار، «سيۋزاننا» كىلەمى جانە اعاشتان جاسالعان سيا سورعىش.
مۋزەي قىزمەتكەرى ءاليا ساماتوۆا بۇل زاتتاردىڭ كەيبىرىن كەزىندە جۇسىپبەكتىڭ ءوزى جاساپ، كۇندەلىكتى جۇمىسىندا پايدالانعانىن اتاپ ءوتتى.
كونە زاتتار وتە قاراپايىم ءارى ءىس بىلەتىن شەبەر ادامنىڭ قولىنان شىققانى بايقالادى.
بۇل بۇيىمداردى 90-شى جىلدارى مۋزەي اشىلعاندا قالامگەردىڭ قىزى ءمارۋا جۇسىپبەك قىزى قورعا تاپسىرىپتى.
الاشتىڭ اردا ازاماتىنان قالعان قۇندى زاتتاردى ۇرپاقتارى كوزىنىڭ قاراشىعىنداي ساقتاپ، قانشاما ۋاقىت ساندىقتىڭ تۇبىندە جاسىرىپ كەلگەنى تاڭعالدىرادى.
ءمارۋا ايماۋىتوۆا ەستەلىگىندە ايتىپ قالدىرعانداي سىزعىشتار مەن سيا سورعىشتى اكەسى ءوزى جاساپ، ويۋ-ورنەكپەن وقالاعان.
«انامنىڭ ايتۋىنشا، كەي-كەيدە اكەم قاتتى ويعا شومعان ۋاقىتتا وسى سيا سورعىشقا قولىن قويىپ، ءارى-بەرى تەڭسەلتىپ وتىراتىن بولعان. بۇل زاتتى دا ءوز قولىمەن جاساعان. مۇنداعى بەينەلەرگە نازار اۋدارساڭىزدار، وندا بالاسىن تاماقتاندىرىپ وتىرعان قۇستىڭ سۋرەتى بەينەلەنگەن. اكەمنىڭ قولىنان شىققان قانداي تۋىندى بولسىن، ونىڭ اربىرىندە قازاقتىڭ فيلوسوفيالىق تەرەڭ مازمۇنى جاتىر. ال قالتا ساعاتىن جانىنان تاستاماعان. كۇندىز قوعامدىق جۇمىستار اتقارىپ، ءتۇن اۋا شىعارماشىلىقپەن اينالىسقان. اكەمنىڭ ساعاتقا ءجيى قارايتىن ادەتى بولىپتى. ۋاقىتىنىڭ، ءومىرىنىڭ از قالعانىن سەزسە كەرەك…» دەپ كەلتىرەدى ۇلى تۇلعانىڭ ۇرپاعى.
اكەسىنىڭ جاتىن بولمەسىندە ۇنەمى ءىلىنىپ تۇرعان «سيۋزاننا» كىلەمى دە جاقسى ساقتالعان.
ونى كەزىندە بۇقارا قالاسىنان ارنايى الدىرىپتى، بۇقارلىق شەبەرلەردىڭ تۋىندىسى كورىنەدى.
اۆتور
مۇرات اياعان
