پاۆلوداردا جۇكتى ايەل كوپىردەن سەكىرمەك بولعان

پاۆلودار. KAZINFORM - پاۆلودار وبلىسىندا پوليتسەيلەر ايەلدى قۇتقارىپ قالدى، دەپ حابارلايدى Polisia.kz.

28-ماۋسىمدا ساعات 06:58 شاماسىندا «102» وپەراتورىنىڭ پۋلتىنە ۋسولكا وزەنىنىڭ كوپىرىندە ايەل ادامنىڭ سەكىرگەلى تۇرعانى تۋرالى حابارلاما كەلدى. وقيعا ورنىنا پاترۋلدىك پوليتسيا باتالونىنىڭ قىزمەتكەرلەرى ەرقانات قۇبايدوللا مەن جاقسىلىق مۇسابايەۆ دەرەۋ جەتتى.

- ءبىز كەلگەندە، قىز كۇيزەلىسكە ۇشىراعان، كوزدەرى جاسقا تولى بولىپ، قورشاۋدىڭ ارتىنا كوتەرىلۋگە ۇلگەرگەن، وسى ۋاقىتتا بىرەۋمەن ەموتسيونالدى تۇردە تەلەفونمەن سويلەسىپ تۇرعان. الىستان ءبىز ونى سوزگە تارتىپ، وعان بۇلاي ىستەۋ دۇرىس شەشىم ەمەس ەكەنىنە سەندىردىك، تۋىستارىنىڭ قانداي جاعدايدا بولاتىن ءتۇسىندىرىپ كوردىك. سودان جانىنا جاقىنداپ، ونىڭ قولىنان ۇستاپ، كوپىردىڭ قاۋىپسىز جاعىنا قايتا كوتەرىلۋگە كوندىردىك. ءبىز ءۇشىن ونسىز دا ءۇمىتسىز تۇرعان قىز بالانى قورقىتىپ الماۋ ماڭىزدى بولدى. سەبەبى، ءبىر سەكۋندتىڭ ىشىندە ورنى تولماس وقيعا ورىن الۋى مۇمكىن ەدى، - دەدى قىزمەت ينسپەكتورى ەرقانات قۇبايدوللا.

بەلگىلى بولعانداي، مۇنداي ارەكەتتىڭ سەبەبى جۇكتى ايەلدىڭ جەكە كۇيزەلىسى بولدى. كەيىن پوليتسيا ونى جەدەل جاردەم دارىگەرلەرىنە تاپسىردى. پوليتسيا ۆەدومستۆوسىندا ءوڭىردىڭ پوليتسەيلەرى كۇن سايىن ازاماتتاردىڭ قاۋىپسىزدىگى مەن تىنىشتىعى ءۇشىن قىزمەت ەتەتىنىن اتاپ ءوتتى. ازاماتتاردى قىلمىستىق شابۋىلداردان قورعاي وتىرا، قيىن ومىرلىك جاعدايعا تاپ بولعاندارعا دا كومەكتەسۋدە. مۇنداي جاعدايلار از ەمەس. وتكەن جىلدارى سول كوپىردە پوليتسەيلەر جاستاردى بىرنەشە رەت ومىرمەن ەسەپ ايىرىسۋ ارەكەتتەرىنەن قۇتقاردى.

- قىزمەت ەتۋ جانە ازاماتتارىمىزعا كومەكتەسۋ - ءبىزدىڭ تىكەلەي مىندەتىمىز. ءبىزدىڭ قاتارىمىزداعى بارلىق پوليتسيا قىزمەتكەرلەرى بۇل كاسىپتىڭ باتىلدىقتى جانە ادامدار ءۇشىن ءومىر مەن دەنساۋلىقتى قاتەرگە تىگۋگە دايىن بولۋدى تالاپ ەتەتىنىن تۇسىنەدى، - دەيدى پوليتسيا قىزمەتكەرلەرى.