پاۆلوداردا شىبىن-شىركەي قاپتاپ، اۋىل تۇرعىندارىنىڭ قۇتىن قاشىرۋدا

پاۆلودار. KAZINFORM - مامىر ايىنىڭ جاۋىن-شاشىندى ءارى سالقىن بولۋىنان قانسورعىشتاردىڭ جاپپاي قاناتتانۋى بايقالا قويماعان ەدى. ماۋسىم ايىنىڭ العاشقى اپتاسىندا كۇن ىسىپ، شىركەي مەن سارى ماسا قاپتاپ شىعا كەلدى.

شىبىن-شىركەيدىڭ شابۋىلىنا، اسىرەسە ەرتىس وزەنىن بويلاي ورنالاسقان پاۆلودار، اقتوعاي، ەرتىس، تەرەڭكول، جەلەزين اۋداندارىنىڭ حالقى مەن ءتورت تۇلىگى ۇشىراپ جاتىر.

قانسورعىشتار وزەن جايىلماسىنداعى تاياز سۋدان قاناتتانىپ، تۇنگى ۋاقىتتا اۋىلداردا قاپتاپ كەتەدى.

ەرتىس پەن جەلەزين اۋداندارىنىڭ تۇرعىندارى ۇيمەلەپ كەتكەن شىركەي مەن سارى ماساعا قاتىستى شاعىمدارىن جەتكىزدى.

وڭىرلىك جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنىڭ باسشىسى ايگەرىم قابىلتايەۆا ءبىر عانا ەرتىس اۋدانىندا دەزينسەكسيالىق جۇمىستار 10 مىڭ گەكتار اۋماقتا جۇرگىزىلەتىنىن حابارلادى.

فوتو: ۆالەري بۋگايەۆ

- جوسپار بويىنشا ايماقتار اۋەدەن وڭدەلەدى. سۋ ءالى تولىعىمەن قايتپاعان. بىلتىرعى جىلعا قاراعاندا جايىلمانى سۋ باسۋ دەڭگەيى 1,5 ەسە كوپ، اسىرەسە سولتۇستىك وڭىرلەردە ول 90 پايىزعا جەتىپ تۇر. سوندىقتان شىركەيلەردىڭ جاڭا توبى كۇن سايىن ۇشىپ شىعادى. ءبىز اۋەدەن وڭدەۋ تاكتيكاسىن وزگەرتەمىز. عىلىمي توپتىڭ ۇسىنىسىمەن دەزينسەكسيالاۋدىڭ ەكىنشى جانە ءۇشىنشى كەزەڭى كەلەسى اپتادا باستالادى، - دەدى ول.

ال پاۆلودار وبلىسىنىڭ اكىمى اسايىن بايحانوۆ كەلەر جىلى ەرتىس پەن جەلەزين اۋداندارىندا شىبىن-شىركەيگە قارسى وڭدەلەتىن اۋماقتاردى ۇلعايتۋ كەرەك دەگەن پىكىردە.

ەسكە سالا كەتەيىك، بيىل پاۆلودار وبلىسىندا جالپى اۋماعى 127 مىڭ گەكتار القاپتى شىبىن-شىركەيگە قارسى وڭدەۋ جوسپارلانىپ وتىر. بۇل وتكەن جىلمەن سالىستىرعاندا 55,5 مىڭ گەكتارعا كوپ.

اۆتور
مۇرات اياعان