پاۆلوداردا ءوز قۇرداسىن اياۋسىز تەپكىلەگەن جاسوسپىرىمدەردىڭ ءىسى سوتقا جىبەرىلدى

بىلتىر پاۆلودار قالاسىندا جاس شامالارى 12-17 جاستاعى ءبىر توپ بالا ءوز قاتارلاسىن اياۋسىز ۇرىپ-سوققانى جەرگىلىكتى قوعامنىڭ اشۋ-ىزاسىن تۋدىرعان. پوليتسيا كامەلەتكە تولماعانداردىڭ ءىسىن ۇزاق تەرگەپ، سوتقا جولدادى، دەپ حابارلايدى Kazinform.

وقيعا 24-شىلدە كۇنى تورايعىروۆ ۋنيۆەرسيتەتىنە قاراستى ستاديون ماڭايىندا بولعان ەدى.

جاس ءوسپىرىمنىڭ باس سۇيەگىنە، دەنەسىنە جاراقات سالىپ، ويلارىنا كەلگەن جاۋىزدىقتى جۇزەگە اسىرعانداردىڭ بارلىعى - كامەلەت جاسىنا تولماعاندار. جابىلا ساباعانى بىلاي تۇرسىن، زارداپ شەگۋشىنى تىرجالاڭاش ەتىپ شەشىندىرىپ، قورلاپ، ونىسىن ۇيالى تەلەفون كامەراسىنا ءتۇسىرىپ العان.

ەڭ سوڭى بەيباستاق قىلىق جاساعاندار بالادان 100 مىڭ تەڭگە تالاپ ەتىپ، بوپسالاعان. بايعۇس بالانى سوڭىنان دوستارى تاۋىپ الىپ، جەدەل جاردەم كولىگىن شاقىرتقان.

- اتالعان قىلمىستىڭ بارلىق ءمان-جايلارى انىقتالدى. قاجەتتى تەرگەۋ ءىس-شارالارى اياقتالىپ، ونىڭ ناتيجەلەرى بويىنشا ماتەريالدار كامەلەتكە تولماعانداردىڭ ىستەرى جونىندەگى سوتقا بەرىلدى، - دەپ حابارلادى پاۆلودار وبلىسى پوليتسيا دەپارتامەنتى باستىعىنىڭ ورىنباسارى راشاد وتەۋوۆ.

قازىرگى ۋاقىتتا ءتيىستى ورگاندارعا قىلمىستىق قۇقىق بۇزۋشىلىق جاساۋعا ىقپال ەتكەن سەبەپتەر مەن جاعدايلاردى جويۋ تۋرالى ۇسىنىس ەنگىزىلدى.

ال بالانى قورلاعان جاسوسپىرىمدەردىڭ اتا-انالارى دا تيىسىنشە جازا ارقالادى.

اۆتور
مۇرات اياعان