پاۆلوداردا الاياق ەلدىڭ ەسەپشوتىنداعى اقشا جايلى اقپارات جيناپ، 30 دان اسا ادامدى الداعان

 پاۆلودار. KAZINFORM - ول الەۋمەتتىك جەلىلەردە جالعان جارناما بەرىپ، جەكە تۇلعالاردىڭ دەربەس شوتتارى تۋرالى مالىمەت جيناعان. ەلىمىز بويىنشا 30 دان اسا ازامات الاياقتىڭ قۇربانى بولعان.

پوليتسيانىڭ جەدەل ۋاكىلدەرى الاياقتىق جاسادى دەگەن كۇدىكپەن 32 جاستاعى ازاماتتى ۇستادى.

ەر ادام الەۋمەتتىك جەلى رەسۋرستارىندا جيھاز ساتامىن دەگەن جالعان حابارلاما تاراتىپ، وبلىس تۇرعىندارىن الداپ كەلگەن.

«تەرگەۋ بارىسىندا كۇدىكتى Telegram قوسىمشاسىندا كۋرەر جۇمىسىن تاپقانى انىقتالدى. ول جەكە ازاماتتاردىڭ ءتۇرلى بانكتەردەگى شوتى جايلى مالىمەتتەردى وزگەلەرگە بەرىپ وتىرۋعا مىندەتتەنگەن. الگى شوتتارعا اقشالاي قاراجات ءتۇسىپ وتىرۋى ءتيىس ەدى. ال ءار تۇسكەن اقشادان كۇدىكتىگە 30 پايىز ۇلەس ۋادە ەتىلگەن ءارى قوسىمشا شىعىندار ءۇشىن تاعى 10 پايىز تولەنۋى ءتيىس بولعان. پوليتسەيلەر ونىڭ وزگە دە قىلمىستارعا قاتىسى بار-جوعىن تەكسەرۋدە»، - دەپ حابارلايدى پاۆلودار وبلىسى پوليتسيا دەپارتامەنتى باستىعىنىڭ ورىنباسارى بولات نۇرسەيىتوۆ.

كۇدىكتى قاماۋعا الىنىپ، الاياقتىق فاكتىسى بويىنشا سوتقا دەيىنگى تەرگەۋ باستالدى.

اتالعان ازاماتتان الدانۋ فاكتىسى بويىنشا ەلىمىزدىڭ ءار تۇپكىرىنەن 30 دان اسا جەكە شاعىم تۇسكەن.

ازاماتتارعا كەلگەن جالپى شىعىن كولەمى ەسەپتەلىپ جاتىر.