پاۆلوداردا اكادەميك قانىش ساتبايەۆ ۇستاعان دومبىرا ساقتالىپ تۇر

қаныш
Фото: anatili.kazgazeta.kz

  پاۆلودار. KAZINFORM -اكادەميك قانىش ساتبايەۆتىڭ باياناۋىلداعى مەموريالدىق مۋزەيى وبلىس ورتالىعىنا «قازاقتىڭ قانىشىنا - 125-جىل» اتتى كوشپەلى كورمەسىن الىپ كەلدى.

قاناعاڭنىڭ جەكە زاتتارى مەن فوتوجادىگەرلەر عالىمنىڭ قيلى تاعدىرىنان سىر شەرتەدى.

بۇراق جىراۋ اتىنداعى ادەبيەت جانە ونەر مۋزەيىندە وتكەن كوشپەلى كورمەدە قانىش يمانتاي ۇلىنىڭ 30 عا جۋىق جادىگەرى ۇسىنىلدى. ونىڭ ىشىندە عالىمنىڭ جەكە پايدالانعان زاتتارى، ايگىلى «الگەبرا» وقۋلىعىنىڭ جاڭارتىلعان نۇسقاسى، دومبىراسى مەن قۇجاتتارى، مينەرالدى تاستار جيىنتىعى بار.

قانىش ساتبايەۆتىڭ رۋحانيات پەن ونەرگە جاقىن جان بولعانىن ەل ىشىندەگى ءتۇرلى اڭگىمەلەر ناقتىلاي تۇسەدى. كەزىندە الەكساندر زاتايەۆيچتىڭ قازاقتىڭ مىڭ ءانى مەن كۇيىن نوتاعا تۇسىرۋىنە قاناعاڭ تۇرتكى بولعان. ءارى زەرتتەۋشىگە ۇلتىمىزدىڭ 25 ءانىن ايتىپ بەرگەن. ونىڭ ىشىندە «ەكى جيرەن»، اقان سەرىنىڭ «ماقپالى»، جاياۋ مۇسانىڭ «باشقۇلبايى»، ەستايدىڭ «قورلانى»، فولكلورلىق مۇرادان «قيسسا ءان سارىنى»، «ارعى جاعى- اي ەرتىستىڭ» تاريحي ءانى، «اجار سارىنى»، «جارىلعاپ سارىنى»، «ءالدي، بوپەم» جانە تاعى باسقالارى بار.

домбыра
Фото: Мұрат Аяған

اكادەميك ءومىرىنىڭ سوڭعى جىلدارى ۇستاعان سارى دومبىرانى ءوزى 50 گە تولعاندا قىزى شامشيابانۋ سىيعا تارتقان ەكەن. سول تويعا كەڭەستىك 15 رەسپۋبليكانىڭ اكادەميكتەرى جينالىپ، قاڭاعاڭا دەگەن ايرىقشا قۇرمەتتەرىن كورسەتسە كەرەك.

- جالپى الماتىنىڭ وزىندە قانىش اتامىزعا ارنالعان ءۇش مۋزەي بار. ايتسە دە، جەكە زاتتارىنىڭ ەڭ باياناۋىلداعى مۋزەيىندە شوعىرلانعان. شامامەن مىڭنىڭ ۇستىندە عالىممەن بايلانىستى زاتتار مەن بۇيىمدار بار. باياناۋىلداعى مۋزەي قاناعاڭ قايتىس بولعان جىلى، اۋداندا پراكتيكادان ءوتىپ جۇرگەن ستۋدەنتتەردىڭ ۇيىتقى بولۋىمەن قازاقستاندا العاشقى بولىپ اشىلعان. العاشقىدا مادەنيەت ۇيىندە كابينەت رەتىندە تۇساۋى كەسىلسە، كەڭەيە كەلە قازىر ۇلكەن ءبىر عيماراتتى الىپ وتىرمىز. مۋزەي اشىلعاندا قىزدارى اكەسىنە قاتىستى دۇنيەلەردىڭ كوبىن تاپسىرعان. ءومىرىنىڭ سوڭعى جىلدارى ۇستاعان زەرلى تاياعى، كوزىلدىرىگى، «ترويكا» كوستيۋم-شالبارى مەن بىلعارى جەڭىل اياق كيىمى، قالامسابىنا دەيىن ءالى كۇنگە جارقىراپ تۇر، - دەيدى ساتبايەۆتىڭ باياناۋىل مەموريالدىق مۋزەيىنىڭ باسشىسى قايىرگەلدى ابىلعازين.

көрме
Фото: anatili.kazgazeta.kz

ەكىنشى دۇنيەجۇزىلىك سوعىستا جاۋعا اتىلعان ءاربىر ون وقتىڭ توعىزى قازاقستاندا، قاناعاڭ باستاعان گەولوگتار ىزدەپ تاپقان مەتالداردان جاسالعانىن مەكتەپ وقۋلىعىنان باستاپ جاقسى بىلەمىز. فاشيستەر ۋكراينانى باسىپ العاندا جوعارعى باس قولباسشىنىڭ تاپسىرماسى بويىنشا عالىم قارساقپايدان 38 كۇننىڭ ىشىندە مارگانەتس كەنىن تاۋىپ، شاحتانى تولىق تسيكلگە قوسقان. وسى جانە وزگە دە ەڭبەكتەرى ءۇشىن كەيىن 4 مارتە لەنين وردەنىمەن، 1 رەت مەملەكەتتىك سىيلىقپەن ماراپاتتالعان. ول كەزدە لەنين وردەنىمەن ەكىنشى مارتە ماراپاتتالعاندا سوتسياليستىك ەڭبەك ەرى اتاعى بەرىلگەن ەكەن. الايدا قانىش يمانتاي ۇلى بايدىڭ تۇقىمى ەكەنى نازارعا الىنىپ، مۇنداي ۇسىنىس جوعارى جاققا جاسالماعان.

ايتا كەتسەك، بۇگىن اقىلبەك كۇرىشبايەۆتى قابىلداعان مەملەكەت باسشىسى قاسىم- جومارت توقايەۆ قازاقستان عىلىم اكادەمياسىنىڭ نەگىزىن قالاعان قانىش ساتبايەۆتىڭ 125-جىلدىعىنا ارنالعان ءىس-شارالاردى جوعارى دەڭگەيدە ۇيىمداستىرۋ ماڭىزدى ەكەنىن ايتتى.

музей
Фото: Мұрат Аяған

بىلتىر ۇكىمەت باسشىسى پاۆلودار اۋەجايىنا اكادەميك قانىش ساتبايەۆتىڭ ەسىمى بەرىلۋى مۇمكىن ەكەنىن جەتكىزگەن.

اۆتور

مۇرات اياعان

سوڭعى جاڭالىقتار