پاۆلوداردا اۋدان اكىمىنىڭ ۇلى 7-سىنىپتا وقيتىن قىزدى ۇرىپ، مۇرنىن سىندىرعان
پاۆلودار. KAZINFORM - بۇل تۋرالى زارداپ شەككەن قىزدىڭ اناسى Instagram-داعى پاراقشاسىندا جاريالادى. ول پروكۋراتۋرا مەن وبلىس اكىمىنەن بۇل ىسكە ارالاسىپ، كىنالى تاراپتى قىلمىستىق جاۋاپكەرشىلىككە تارتۋدى سۇراپ وتىر.
وقيعا 10-قاڭتار كۇنى بولعان. پاۆلودار قالاسىنداعى №8-ليتسەيدىڭ 6-سىنىبىندا وقيتىن ەر بالا 7-سىنىپتاعى قىزدى سوققىنىڭ استىنا الىپ، مۇرنىن سىندىرعان.
ءوزىن تاتيانا دەپ تانىستىرعان قىزدىڭ اناسى بۇل جاعدايعا پروكۋراتۋرا مەن وزگە ورگاندار قۇقىقتىق تۇرعىدان دۇرىس باعا بەرۋدى، ۇلدىڭ اتا-اناسىنا قاتىستى قابىلدانعان اكىمشىلىك قۇقىق بۇزۋشىلىق تۋرالى قاۋلىنىڭ كۇشىن جويۋدى سۇراپ وتىر.
«مەنىڭ 7-سىنىپتا وقيتىن قىزىما 6-سىنىپتا وقيتىن ەر بالا دەنە جاراقاتىن سالىپ، مۇرنىن سىندىرعان. سونداي-اق ول قىزىما جەتى رەت اۋىر سوققى جاساعان. 16-ناۋرىز كۇنى بالامنىڭ مۇرىن سۇيەكتەرى ەكىنشى مارتە تۇزەتىلدى. پروكۋراتۋرا ورگاندارىنان اكىمشىلىك قۇقىق بۇزۋشىلىق تۋرالى قاۋلىنىڭ كۇشىن جويىپ، ەر بالانىڭ اتا-اناسىن ق ر قىلمىستىق كودەكسىنىڭ 140-بابى بويىنشا جاۋاپقا تارتۋدى سۇرايمىن. ماسەلەگە وبلىس اكىمى اسايىن بايحانوۆتىڭ دا نازار اۋدارۋىن وتىنەمىن»، - دەدى زارداپ شەككەن وقۋشىنىڭ اناسى Instagram-داعى بەينەجازباسىندا.
ونىڭ سوزىنشە، 6-سىنىپ وقۋشىسىنىڭ اناسى وڭىرلىك كاسىپكەرلەر پالاتاسىندا جۇمىس ىستەيدى، ول اكىمشىلىك جاۋاپكەرشىلىككە تارتىلعان. ال اكەسى وبلىستاعى اۋدانداردىڭ بىرىندە اۋدان اكىمى بولىپ قىزمەت ەتەتىن كورىنەدى. ەر بالاعا اتا-اناسى دۇرىس تاربيە بەرە الماي وتىر دەپ ەسەپتەيدى.
پاۆلودار وبلىسى پوليتسيا دەپارتامەنتىنەن حابارلاعانداي، وقيعا سالدارىنان قىز اۋرۋحانادا جاتىپ شىققان، ساراپتاما ناتيجەسى كەلتىرىلگەن دەنە جاراقاتىنىڭ جەڭىل دارەجەدە ەكەنىن انىقتاعان. جاس ءوسپىرىم زاڭ الدىندا جاۋاپ بەرەتىن جاسقا جەتپەگەنى سەبەپتى، ونىڭ اتا-اناسىن اكىمشىلىك جاۋاپكەرشىلىككە تارتۋ تۋرالى ءىس ماتەريالى سوتقا جولدانعان. زاڭناماعا سايكەس، اتا-اناسىنىڭ بىرىنە 20 ايلىق ەسەپتىك كورسەتكىش كولەمىندە ايىپپۇل سالۋ نەمەسە 10 تاۋلىككە دەيىن قاماۋعا الۋ تۋرالى قاۋلى شىعارىلۋى كەرەك.
پوليتسياداعىلار زارداپ شەگۋشى تاراپ ماتەريالدىق شىعىن ءوندىرىپ الۋ ءۇشىن ازاماتتىق سوتقا شاعىمدانا الاتىنىن ەسكەرتتى. ال وڭىرلىك ءبىلىم بەرۋ باسقارماسى بۇل وقيعانى نازاردا ۇستاپ وتىرمىز دەپ سەندىردى. مەكتەپ باسشىلىعى ەكى تاراپتىڭ دا اتا-انالارىمەن كەزدەسكەن. ەندىگى رەتتە اتا-انالار بۇل جايتتى قۇقىقتىق تۇرعىدان شەشپەكشى. ءبىلىم بەرۋ باسقارماسى ءوز تاراپىنان قىزمەتتىك تەكسەرىس جۇرگىزىپ، ناتيجەسىنە سايكەس ءىس-شارالار قابىلدايدى.
اۆتور
مۇرات اياعان
