پاۆلوداردا 12 ازامات ك س ر و تولقۇجاتىمەن تۇرىپ كەلگەن
پاۆلودار. KAZINFORM - پاۆلودار وبلىسىنىڭ كوشى-قون قىزمەتى 1974 -جىلعى ۇلگىدەگى ك س ر و پاسپورتىمەن تۇرىپ كەلگەن تۇرعىنداردى انىقتادى. ولاردىڭ دەنى - ەرتەرەكتە ت م د ەلدەرىنەن كوشىپ كەلگەن ازاماتتار.
ەرتىس- بايان ءوڭىرىنىڭ پوليتسەيلەرى ق ر ازاماتىنىڭ جەكە باسىن كۋالاندىراتىن قۇجاتتاردى ۋاقتىلى الماعان جانە 18 جاسقا تولعاندا ءتيىستى قۇجاتتالماعان ادامداردى انىقتادى. ولاردىڭ كەيبىرى ەسكى كەڭەستىك تولقۇجاتپەن ءومىر ءسۇرىپ كەلگەن.
- جىل باسىنان ك س ر و ۇلگىسىندەگى ەسكى تولقۇجاتپەن جۇرگەن 12 پاۆلودارلىق انىقتالدى. بۇعان قوسا 18 جاسقا تولسا دا جەكە كۋالىك رەسىمدەمەگەن 20 ازامات، سونداي-اق ازاماتتىعى جوق، ءبىراق كۋالىك رەسىمدەمەگەن 8 تۇرعىن انىقتالدى. ولاردىڭ بارلىعىنا ءتيىستى قۇجاتتارى جاسالدى. قۇجاتى جوق ادامداردىڭ دەنى ت م د- داعى وزگە مەملەكەتتەردەن كەلگەندەر، ولار سول ەلدىڭ جارامدىلىق مەرزىمى وتكەن تولقۇجاتىمەن جۇرگەن. كوبى ك س ر و- نىڭ بۇرىنعى وداقتاس مەملەكەتتەرىنەن كامەلەت جاسىنا تولماي تۇرىپ قازاقستانعا كوشىپ كەلگەن، - دەيدى پاۆلودار وبلىسى پوليتسيا دەپارتامەنتى كوشى-قون قىزمەتىنىڭ باستىعى داۋلەت ىسقاقوۆ.
اتالعان ازاماتتاردىڭ ءتيىستى قۇجاتى بولماعاندىقتان ولار وسى ۋاقىتقا دەيىن ءتۇرلى جاردەماقىلاردان قاعىلىپ، مەملەكەتتىك قىزمەتتەردى الۋدان قيىندىق كورىپ كەلگەن.
ەسكە سالا كەتەيىك، پاۆلودارلىق پوليتسەيلەر ءۇش كۇندە كوشى-قون زاڭناماسىن بۇزۋعا قاتىستى 145 دەرەك تىركەدى.
