پاۆلودار پوليتسەيلەرى وڭىردەگى اۆتوجولداردان 3 مىڭعا جۋىق اقاۋدى انىقتادى

پاۆلودار. KAZINFORM - پوليتسيا ماماندارى 25 مىڭ شاقىرىمنان استام اۋماقتى قامتيتىن جالپى پايدالانىمداعى 1339 اۆتوجولدى زەرتتەگەن. انىقتالعان كەمشىلىكتەردى جويۋ بويىنشا جاۋاپتى ورگاندارعا 1339 ۇيعارىم بەرىلدى.

پاۆلودارلىق پويتسەيلەر وبلىستاعى اۆتوجولداردى تەكسەرىپ، 3 مىڭعا جۋىق كەمشىلىكتى انىقتادى. جولداردى قاناعاتتانارلىقسىز ۇستاعانى جانە جولداردا جۇمىس جۇرگىزۋ قاعيدالارىن بۇزعانى ءۇشىن 274 لاۋازىمدى جانە زاڭدى تۇلعا جاۋاپقا تارتىلدا. ولارعا 10 ميلليون تەڭگەدەن استام سوماعا ايىپپۇل سالىندى.

- پوليتسيا اۆتوموبيل جولدارىنىڭ، جول قۇرىلىستارىنىڭ، تەمىرجول وتكەلدەرىنىڭ، جول قوزعالىسىن رەتتەۋدىڭ تەحنيكالىق قۇرالدارىنىڭ جانە جول جۇمىستارى جۇرگىزىلەتىن ورىنداردىڭ پايدالانۋ جاي-كۇيىنە تەكسەرۋ جۇرگىزەدى. جۇرگىزىلگەن تەكسەرۋلەردىڭ باستى ماقساتى - وڭىردەگى جول قوزعالىسىن ۇيىمداستىرۋدى جەتىلدىرۋ جانە جول قاۋىپسىزدىگى دەڭگەيىن ارتتىرۋ بويىنشا ۇيىمداستىرۋشىلىق- پراكتيكالىق شارالاردى ىسكە اسىرۋ جولىمەن جول-كولىك اپاتتارىنىڭ الدىن الۋ جانە ولاردىڭ سالدارىنىڭ اۋىرلىعىن تومەندەتۋ، - دەيدى وڭىرلىك پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى بوريس الىمبايەۆ.

سونداي-اق، كوشە-جول توراپتارى مەن اۆتوموبيل جولدارىن تەكسەرۋ اكتىسى نەگىزىندە مەملەكەتتىك باقىلاۋ جانە قاداعالاۋ ورگاندارى بەرگەن زاڭدى تالاپتاردى نەمەسە ۇسىنىستاردى ورىنداماعانى ءۇشىن زاڭدى تۇلعالار جازالانعان. مىسالى ءۇشىن جولداردا جۇمىس جۇرگىزۋ، جولدار مەن جول قۇرىلىستارىن كۇتىپ ۇستاۋ ەرەجەلەرىن بۇزعانى ءۇشىن «قاجسەرۆيس» كومپانياسىنىڭ پاۆلودار فيليالى 1 ميلليون 200 مىڭ تەڭگە سوماسىنا اكىمشىلىك جاۋاپكەرشىلىككە تارتىلعان.

اۆتور
مۇرات اياعان