پاۆلودار وبلىسىنىڭ ەلدى مەكەندەرىن تىشقان باسىپ بارادى

پاۆلودار. KAZINFORM - پاۆلودار وبلىسىنىڭ ەلدى مەكەندەرىندە كادىمگى ءۇي تىشقاندارى شامادان تىس كوبەيىپ كەتكەن. قوراجايدان بولەك، ۇيلەرگە كىرىپ، تۇرعىنداردىڭ مازاسىن الىپ تۇر.

كەمىرگىشتەردىڭ قاپتاپ كەتكەنىنە اسىرەسە، ەرتىس، جەلەزين، ماي، تەرەڭكول، پاۆلودار اۋداندارىنىڭ حالقى الاڭداپ وتىر. اۋىل ادامدارى قاقپان، تۇزاق قۇرىپ، اۋلاپ باققانىمەن سانى ودان سايىن ءوسىپ جاتىر.

جەلەزين اۋدانىنداعى ۆەسەلايا روشا اۋىلىنىڭ تۇرعىنى امانجول حاميتتىڭ ايتۋىنشا، كەمىرگىش جانۋاردىڭ كۇرت كوبەيۋى بيىلعى قىركۇيەك ايىنان بايقالا باستاعان.

- ۇيىمىزدە تىشقان دەگەن كوبەيىپ كەتتى. تۇزاق قۇرىپ، قانشاماسىن ۇستاپ جويىپ جاتساق تا ازايار ەمەس. قازىر اۋىل ىشىندەگى كوشەنىڭ وزىندە تىشقاندار ويناق سالىپ جۇرەدى. مىسىقتار ابدەن تويىنىپ، اۋلاعىسى دا كەلمەيتىنى بايقالادى. بۇل جاعداي ۇيىندە قىسقا ازىق ۇستايتىن ادامدارعا، قويماسىندا استىق ساقتايتىن فەرمەرلەرگە قيىن سوعاتىن ءتۇرى بار. جاعداي بۇلاي جالعاسا بەرەتىن بولسا، وڭىردە ەپيدەميولوگيالىق جاعداي ۋشىعىپ، جۇقپالى دەرت تاراۋى دا مۇمكىن. ونىڭ سوڭى جاقسى بولمايدى. تىشقانداردىڭ ادەتتەن تىس قاپتاپ كەتۋىن ومىرىمدە ءبىرىنشى رەت ۇشىراستىرىپ وتىرمىن. ورىس حالقى ەرتەدە كەمىرگىشتەر كوبەيسە، «ۇلكەن اشتىق كەلە جاتىر» دەپ ىرىمدايدى ەكەن. قۇداي بەتىن اۋلاق قىلسىن. ءبىراق بۇل جاعدايعا مەملەكەتتىك ورگاندار نازار اۋدارىپ، ولاردى ۋلاۋ، جويۋ شارالارىمەن اينالىسۋى كەرەك. ەپيدەميولوگ ماماندار جانۋارلاردىڭ شامادان تىس كوبەيۋىنىڭ سەبەبىن زەردەلەپ كورگەنى دۇرىس، - دەيدى تۇرعىن.

ال پاۆلودار وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گۇلنارا اقىلبەكوۆا ازىرشە تۇرعىندار تاراپىنان شاعىم تۇسپەگەنىن جەتكىزدى.

- تىشقان قاپتاپ كەتتى دەگەن ەرتىس، جەلەزين، تەرەڭكول اۋداندارىنا حابارلاسىپ، جەرگىلىكتى سانيتارلىق- ەپيدەميولوگيالىق باقىلاۋ باسقارمالارىنىڭ باسشىلارىنا سۇراۋ سالدىم. ولار جاعدايدىڭ قالىپتى ەكەنىن جەتكىزدى. تۇرعىندار تاراپىنان دا ەشبىر شاعىم بولماعان. كەمىرگىشتەر شىن مانىندە كوبەيىپ جاتسا، وڭىرلەردە ولاردى جويۋ، الدىن الۋ جۇمىستارى جۇرگىزىلۋى كەرەك. بۇعان قاتىستى سانيتارلىق تالاپتار مەن نورمالار بار، - دەيدى ول.

تىشقاندار - تەز جەتىلەتىن، ءوسىمتال جانۋارلار. قورەكتىك ازىق مول بولىپ، قولايلى جاعداي تۋسا، كەيبىر تۇرلەرى جىل بويى كوبەيە بەرەدى.

اۆتور

اسحات رايقۇل