پاۆلودار وبلىسىندا وقۋشى «تاپانشامەن» سىنىپتاسىن جاراقاتتادى

استانا. KAZINFORM - پاۆلودار وبلىسىندا وقۋشى «تاپانشامەن» سىنىپتاسىن جاراقاتتادى. 13 جاسار بالا اۋرۋحاناعا جاتقىزىلدى، - دەپ حابارلايدى pavlodarnews.kz.

1-قازاندا جەلەزين اۋدانىنداعى مەكتەپتەردىڭ بىرىندە 5-سىنىپ وقۋشىسى ويىنشىق تاپانشانى سومكەسىنەن شىعارىپ، سىنىپتاستارىنا كورسەتىپ جاتقان كەزدە بايقاۋسىزدا ويىنشىق وقتى 6-سىنىپ وقۋشىسىنىڭ كوز ايماعىنا تيگىزگەن.

ءۇزىلىس ۋاقىتىندا بولعان وقيعا تۋرالى وبلىستىق ءبىلىم بەرۋ باسقارماسى ءمالىم ەتتى.

«اتالعان فاكتى بويىنشا دەرەۋ قىزمەتتىك تەرگەۋ اشىلدى. ناتيجەسىندە، وقۋشىلار جانە اتا-انالارمەن اڭگىمە جۇرگىزىلدى. بالالارىڭىزدى مەكتەپكە جىبەرمەس بۇرىن سومكەسىندەگى قالتالاردا تىيىم سالىنعان زاتتاردىڭ بار-جوعىن تەكسەرۋدى سۇرايمىز!» - دەپ حابارلادى باسقارما.

زارداپ شەككەن وقۋشى الدىمەن اۋداندىق اۋرۋحاناعا، كەيىننەن وبلىستىق اۋرۋحاناعا جەتكىزىلدى. 13 جاسار بالانى تراۆماتولوگيا بولىمشەسىنىڭ كەزەكشى وفتالمولوگ دارىگەرى قاراپ شىقتى.

«كوز الماسىنىڭ كوگەرۋى دياگنوزى قويىلدى، جاعدايى تۇراقتى»، - دەپ حابارلادى وبلىستىق بالالار اۋرۋحاناسى.

وقۋشىنىڭ تۇرعىلىقتى جەرى الىس ەكەنىن ەسكەرە وتىرىپ، ديناميكالىق باقىلاۋ ءۇشىن وفتالمولوگيالىق بولىمشەسىنە جاتقىزىلدى.