پاۆلودار وبلىسىندا پوليتسيا اۆتوپاركى 215 جاڭا كولىكپەن تولىقتى

كولىك كىلتىن ءتارتىپ ساقشىلارىنا ايماق باسشىسى تابىستادى، دەپ حابارلايدى Pavlodarnews.kz.

وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ مالىمدەۋىنشە، «قۇلاگەر» يپپودرومىندا پاۆلودار وبلىسىنىڭ اكىمى اسايىن بايحانوۆ پوليتسەيلەرگە 215 جاڭا قىزمەتتىك اۆتوماشينالاردىڭ كىلتتەرىن تابىستادى. وندا JAC ،KIA جانە Chevrolet Cobalt ماركالى اۆتوكولىكتەر ۋچاسكەلىك پوليتسيا ينسپەكتورلارى مەن پاترۋلدىك پوليتسيا باتالونى مەن روتاسىنىڭ ينسپەكتورلارى، سونداي-اق قالالىق جانە اۋداندىق پوليتسيا باسقارمالارى مەن بولىمدەرى اراسىندا تاراتىلادى.

- وڭىردە وبلىستىڭ قۇقىق قورعاۋ سالاسىنىڭ ماتەريالدىق-تەحنيكالىق بازاسىن جاقسارتۋ ءۇشىن بارلىق جاعدايلار جاسالۋدا. جاڭا كولىكتەردىڭ كوپشىلىگى العاش رەت اۋىلدىق ەلدى مەكەندەرگە جىبەرىلەتىنى كوڭىل قۋانتادى. قۇقىقتىق ءتارتىپتى قامتاماسىز ەتۋدىڭ باستى شارتتارىنىڭ ءبىرى تۇرعىنداردىڭ سەنىمى بولىپ تابىلادى. سوندىقتان، سىزدەردىڭ ادال ەڭبەكتەرىڭىز بەن قىزمەتتەرىڭىزگە دەگەن جاۋاپكەرشىلىكتەرىڭىز تۇرعىندارىمىزدىڭ قاۋىپسىزدىگىن قامتاماسىز ەتۋدىڭ كەپىلى بولۋعا ءتيىس، - دەدى اسايىن بايحانوۆ.

پوليتسيا اۆتوماشينالارىن ساتىپ الۋ «ونەركاسىپتى دامىتۋ قورى» ا ق ليزينگتىك باعدارلاماسى بويىنشا جۇرگىزىلدى. الىنعان اۆتوموبيلدەر بەلگىلەنگەن ستاندارتتارعا تولىق ساي، قاجەتتى تەحنيكالىق قۇرالدارمەن جابدىقتالعان جانە پاۆلودارلىق قۇقىق قورعاۋشىلارعا قوعامدىق ءتارتىپتى بۇزۋشىلىقتارعا ودان دا جەدەل دەن قويۋعا مۇمكىندىك بەرەدى.

پوليتسەيلەر الدىندا ءسوز سويلەگەن وبلىس باسشىسى سوڭعى جىلدارى وڭىردە بارلىق نەگىزگى باعىتتار بويىنشا قىلمىس دەڭگەيىن تومەندەتۋدىڭ تۇراقتى ءۇردىسى ساقتالعانىن اتاپ ءوتتى. ول قۇقىقتىق ءتارتىپ ساقشىلارى تاۋلىك بويى ازاماتتاردىڭ مەملەكەتتىڭ تىنىشتىعى مەن قاۋىپسىزدىگىن قامتاماسىز ەتەتىنىن، سوندىقتان پوليتسيا قىزمەتكەرلەرى ءۇشىن جاڭا كىلتتەردى تاپسىرۋ قۋانىشتى ەكەنىن اتاپ ءوتتى.

وبلىستىق پوليتسيا دەپارتامەنتىنىڭ باستىعى ۆاسيلي سكليار وبلىس باسشىلىعىنا پوليتسيانى ماتەريالدىق-تەحنيكالىق قامتاماسىز ەتۋگە كوپ كوڭىل بولگەنى ءۇشىن العىسىن ءبىلدىردى، بۇل وڭىردەگى جەدەل جاعدايدى جاقسارتۋعا تىكەلەي اسەر ەتەدى. ول پاۆلودار پوليتسياسى قىلمىسقا قارسى كۇرەستى جۇزەگە اسىرۋ ءۇشىن بارلىق قاجەتتى جاعدايلار مەن مۇمكىندىكتەرگە يە بولا وتىرىپ، وبلىستىڭ ءاربىر تۇرعىنى تىنىش دەمالىپ، ءبىزدىڭ وتانىمىز - قازاقستان رەسپۋبليكاسىنىڭ يگىلىگى ءۇشىن جۇمىس ىستەۋى ءۇشىن قوعامدىق ءتارتىپتى ساقتاۋ بويىنشا بارلىق كۇش-جىگەرىن جۇمسايتىنىنا سەندىردى.

ءىس-شارا سوڭىندا جارىق-دىبىس سيگنالدارى قوسىلعان جاڭا اۆتوكولىكتىڭ سالتاناتتى شەرۋى ءوتتى.