پاۆلودار وبلىسىنان اسكەر قاتارىنا قانشا بوزبالا اتتانعانى بەلگىلى بولدى

پاۆلودار. KAZINFORM - جاس ساربازدار وتان الدىنداعى بورىشىن ۇلتتىق ۇلان، قارۋلى كۇشتەر جانە شەكارا قىزمەتىندە وتەيدى. بيىل پاۆلودار وبلىسىنان اسكەرگە 800-گە جۋىق ادامدى شاقىرۋ جوسپارلانعان.

كۇزگى اسكەرگە شاقىرۋ ناۋقانى 2-قىركۇيەكتە باستالدى. اسكەرگە شاقىرىلۋشىلار مەديتسينالىق تەكسەرۋدەن وتەدى.

- ءبىزدىڭ پاۆلودار وبلىسىنا بەرىلگەن جوسپار بويىنشا شەكارا قىزمەتىنە 80 ازاماتتى شاقىرامىز. قارۋلى كۇشتەر قاتارىنا - 250، ۇلتتىق ۇلان قاتارىنا 270 تەي ازامات الىنۋى كەرەك. ونىڭ ىشىندە مەملەكەتتىك كۇزەت قىزمەتى بار. توتەنشە جاعداي مينيسترلىگىنىڭ قاتارىنا 20 ادام الىنادى. بارلىعى 786 جاس ازاماتتى اسكەر قاتارىنا شاقىرامىز، - دەيدى وڭىرلىك قورعانىس ىستەرى جونىندەگى دەپارتامەنت باستىعىنىڭ ورىنباسارى الماسبەك بۇحاربايەۆ.

بىلتىر كوكتەمدە ەرتىس- بايان وڭىرىنەن 862 جاس سارباز اسكەر قاتارىنا اتتانعان. قازىر ولار ازاماتتىق بورىشىن اتقارىپ ءجۇر. اسكەر قاتارىنا شاقىرىلماس بۇرىن ەل ازاماتتارى باقىلاۋدان وتەدى. ارنايى كوميسسيا دەنساۋلىعى مەن فيزيكالىق دايىندىعىن تەكسەرەدى.

بىلتىردان باستاپ قورعانىس مينيسترلىگىنىڭ بەكىتىلگەن بۇيرىعىنا سايكەس، وتان الدىنداعى بورىشىن وتەپ كەلگەن ازاماتتار ۇلتتىق ءبىرىڭعاي تەست تاپسىرماي بەلگىلى ءبىر جوعارى وقۋ ورىندارىنا تەگىن وقۋعا تۇسە الادى. بۇعان قوسا، بيىلدان باستاپ نەسيەسى بار ساربازدارعا كرەديتتىك دەمالىس قاراستىرىلعان.

ەسكە سالا كەتەيىك، ت ج م-نىڭ اسكەري بولىمدەرىنە قازاق باتىرلارىنىڭ ەسىمى بەرىلەدى.

اۆتور
مۇرات اياعان