پاۆلودار وبلىسىندا 15 باس جىلقى ۇرلادى دەگەن كۇدىكپەن ءبىر توپ ادام ۇستالدى
پاۆلودار. KAZINFORM - پاۆلودار وبلىسىنىڭ اققۋلى اۋدانىندا 15 باس جىلقىنى ۇرلادى دەگەن كۇدىكپەن ءبىر توپ ەر ادام ۇستالدى. كۇدىكتىلەردىڭ ءبىرى ۋاقىتشا ۇستاۋ يزولياتورىنا قامالدى.
پاۆلودار وبلىسى پوليتسيا دەپارتامەنتىنىڭ مالىمەتىنشە، جەدەل-ىزدەستىرۋ ءىس- شارالارى بارىسىندا مال ۇرلىعىنا قاتىسى بار دەگەن كۇدىككە ىلىنگەن ادامدار انىقتالعان.
ءتارتىپ ساقشىلارىنىڭ مالىمەتىنشە، جىلقىلار يەلەرىنىڭ قاراۋىنسىز جايىلىمدا جۇرگەن جەرىنەن ۇرلانعان.
- قازىرگى ۋاقىتتا وقيعانىڭ بارلىق ءمان-جايىن انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلىپ جاتىر. سونداي-اق كۇدىكتىلەردىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە،- دەدى پاۆلودار وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ باستىعى جاسۇلان تانجانوۆ.
پوليتسيا ءتورت تۇلىك يەلەرىنە مال قاۋىپسىزدىگىنە مۇقيات بولۋدى ەسكەرتەدى. اتاپ ايتقاندا، مالدى قاراۋسىز قالدىرماۋ، جايىلىمداردى تۇراقتى باقىلاۋ، جانۋارلاردى سايكەستەندىرۋ قۇرالدارىن پايدالانۋ جانە مۇمكىندىك بولسا، مال ۇستالاتىن ورىندارعا بەينەباقىلاۋ كامەرالارىن ورناتۋ ۇسىنىلادى.
بۇعان دەيىن دە پاۆلودار وبلىسىندا مال ۇرلىعىنا كۇدىكتى توپ ۇستالعانىن جازعانبىز.
