«التىن وردا» بازارىنىڭ بۇرىنعى باسشىسى 4 جىلعا سوتتالدى
قونايەۆ. KAZINFORM - الماتى وبلىسىندا «التىن وردا» بازارىنىڭ بۇرىنعى اتقارۋشى ديرەكتورى ەرمەك مارقابايەۆقا قاتىستى سوت ۇكىمى شىقتى.
وعان اسا ءىرى مولشەردە ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىنسىز زاڭسىز ساقتاپ، تاسىمالدادى دەگەن ايىپ تاعىلدى.
الماتى وبلىسى قاراساي اۋداندىق سوتىنىڭ باسپا ءسوز قىزمەتى وتكەن جىلدىڭ جازىندا «الماتى- بىشكەك» اۆتوجولى بويىندا پوليتسيا قىزمەتكەرلەرى اۆتوكولىكتى توقتاتقان كەزدە كولىكتىڭ ارتقى ورىندىعىندا سوتتالۋشى م. بولعانىن حابارلادى. جەكە ءتىنتۋ كەزىندە ودان ىشىندە ۇنتاقتى زات سالىنعان تۇيىنشەك تابىلىپ، تاركىلەنگەن بولاتىن.
«سوت-حيميالىق ساراپتامانىڭ قورىتىندىسىنا سايكەس، بۇل سالماعى 1,796 گرامم بولاتىن (اسا ءىرى كولەمدە) پسيحوتروپتىق زات - مەفەدرون بولىپ شىقتى»، - دەلىنەدى سوتتىڭ حابارلاماسىندا.
پروكۋرور سوتتالۋشىنى قىلمىستىق كودەكستىڭ 296-بابى 4-بولىگىمەن كىنالى دەپ تانىپ، ونى 5 جىلعا باس بوستاندىعىنان ايىرۋدى سۇرادى. سوتتالۋشى م. كىناسىن مويىنداماي، ايعاق بەرۋدەن باس تارتتى.
«سوتتالۋشى م. -نىڭ كىناسى قىلمىستىق ءىس ماتەريالدارىمەن، ونىڭ ىشىندە قاماۋعا الۋ جانە سوتتا قارالعان جەكە ءتىنتۋ بەينەجازبالارى، پسيحوتروپتىق زاتتىڭ وزىنە جاسالعان قول الاقاندارىنىڭ جاعىندىلارىن، تىرناق بولىكتەرىن جانە شالبار قالتاسىنىڭ بولىگىن سوت-حيميالىق زەرتتەۋ ناتيجەسى بويىنشا دالەلدەندى جانە راستالدى. وندا پسيحوتروپتىق زات - مەفەدرون بار قاباتتار، سونداي- اق ءىس بويىنشا جينالعان باسقا دا دالەلدەمەلەر انىقتالدى»، - دەپ حابارلادى اۋداندىق سوتتىڭ باسپا ءسوز قىزمەتى.
سوت جازا تاعايىنداۋ كەزىندە سوتتالۋشىنىڭ جاس بالاسى بولۋىن قىلمىستىق جاۋاپكەرشىلىك پەن جازانى جەڭىلدەتەتىن ءمان-جاي دەپ تانىدى. قىلمىستىق جاۋاپكەرشىلىكتى نەمەسە جازانى اۋىرلاتاتىن ءمان-جايلار انىقتالعان جوق.
«سوت ۇكىمىمەن م. ق ك- ءنىڭ 296-بابىنىڭ 4-بولىگىندە كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلىپ، 4 جىل مەرزىمگە باس بوستاندىعىنان ايىرۋ جازاسى تاعايىندالدى. ۇكىم زاڭدى كۇشىنە ەنگەن جوق»، - دەپ حابارلادى قاراساي اۋداندىق سوتىنىڭ باسپا ءسوز قىزمەتى.
ەسكە سالساق، وتكەن جىلى ماۋسىم ايىندا «التىن وردا» بازارى ديرەكتورى ورىنباسارىنىڭ ۇستالعانى تۋرالى بەينەروليكتەر الەۋمەتتىك جەلىدە تاراعان ەدى.
