«التىن وردا» بازارىنىڭ اقشا اينالىمىن قاداعالايتىن جاڭا جۇيە ەنگىزىلەدى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءماجىلىس دەپۋتاتتارىنىڭ ساۋالىنا بەرگەن جاۋاپتا بازارداعى كولەڭكەلى ەكونوميكانى قالاي جارىققا شىعاراتىنىن ايتتى.

- «قازاقستان حالىق بانكى» ساۋدا نۇكتەلەرىن جالعا الۋ شوتتارىن ەلەكتروندى تۇردە قويۋ جانە تولەۋ، QR ارقىلى تولەمدەردى قابىلداۋ، ەسەپ ايىرىسۋ-كاسسالىق قىزمەت كورسەتۋدى جۇرگىزۋ، الماتى قالاسىنىڭ 6 بازارىندا سيفرلىق كرەديتتەر بەرۋ تەتىكتەرىن ەنگىزۋ بويىنشا «Digital بازار» پيلوتتىق جوباسىن ىسكە اسىرۋدا. بۇگىندە 1700 دەن اسا كاسىپكەر پيلوتتىق جوبانىڭ قاتىسۋشىسى بولدى، - دەلىنگەن جاۋاپتا.

سونداي-اق، ول جاۋابىندا «التىن وردا» بازارىنىڭ كەلەشەگىنە جەكە توقتالعان.

- «Digital بازار» پيلوتتىق جوباسىن «التىن وردا» بازارىنا ەنگىزۋ جوسپارلانۋدا. 2024-جىلعى جەلتوقساندا مينيسترلىك «التىن وردا» بازارىنىڭ، حالىق بانكىنىڭ وكىلدەرىمەن بىرلەسىپ بازاردى سيفرلاندىرۋ ماسەلەلەرى بويىنشا كەڭەس وتكىزدى. ودان ءارى مينيسترلىك جوعارىدا اتالعان مودۋلدى حالىق بانكىنىڭ دەرەكتەر بازاسىمەن ينتەگراتسيالايدى. بۇل شەشىم اكىمشىلىك جۇكتەمەنىڭ تومەندەۋىنە، ەسەپ ايىرىسۋدىڭ ىڭعايلىلىعىنا جانە باعانىڭ اشىقتىعىنا، جەڭىلدىكتەر مەن باعدارلامالارعا (بونۋستار/كەشبەكتەر) قول جەتكىزۋگە، قىزمەت كورسەتۋ ساپاسىن جاقسارتۋعا اكەلەدى، - دەپ ءتۇسىندىردى سەرىك جۇمانعارين.

ۇكىمەتتىڭ دەرەگى بويىنشا، 2023-جىلى كولەڭكەلى ەكونوميكانىڭ جالپى ىشكى ونىمگە قاتىناسى 17,52 پايىز بولعان. ياعني، 2023-جىلى ج ءى ءو كولەمى 119,8 تريلليون تەڭگە بولسا، كولەڭكەلى ەكونوميكانىڭ كولەمى 20,9 تريلليون تەڭگەگە جەتكەن.

ەسكە سالساق، جىل باسىندا الماتىداعى التىن وردا بازارى كارتوپتى بىردەن 70 تەڭگەگە قىمباتتاتىپ جىبەرگەنى ءمالىم بولعان ەدى.