التىن ۇرلادى دەپ اياۋسىز ازاپتاۋ وقيعاسى: ۇ ق ك بۇرىنعى قىزمەتكەرلەرى ۇكىمدى جەڭىلدەتۋدى سۇرادى
استانا. KAZINFORM – ق ر ۇلتتىق قاۋىپسىزدىك كوميتەتىنىڭ ءتورت قىزمەتكەرىنە «قۇرامىندا التىنى بار شيكىزاتتى ۇرلادى دەپ ايىپتالعان 13 تۇتقىندى اياۋسىز ازاپتادى» دەگەن ايىپ تاعىلىپ، بيىل ساۋىردە اقمولا گارنيزونى اسكەري سوتى ۇكىم شىعارعان بولاتىن.
اپەللياتسيالىق شاعىم تۇسىرگەن سوتتالۋشىلاردىڭ ءىسى بۇگىن استانا قالاسىنداعى اسكەري سوتتا قايتا قارالدى.
ەستەرىڭىزگە سالساق، قوعامدى ەلەڭ ەتكىزگەن وقيعا 2021 -جىلى ناۋرىزدا بولعان ەدى. سول جىلى سەمەيدەگى «الەل» قارجى ينۆەستيتسيالىق كورپوراتسياسى يگەرىپ جاتقان سۋزدال كەنىشى زاۋىتىنان «اسا باعالى مەتالدى جىمقىردى» دەگەن كۇدىكپەن 59 ادام قاماۋعا الىنعان-دى.
«حالىقارالىق قىلمىستىق توپقا» قاتىسى بار دەپ ۇستالعانداردىڭ تۋىستارى ولاردى تەرگەۋ ورىندارى ازاپتاعانى تۋرالى سان مارتە شاعىم جازىپ، 2022 -جىلى سىبايلاس جەمقورلىقپەن كۇرەس اگەنتتىگى ۇ ق ك قىزمەتكەرلەرىنە قاتىستى قىلمىستىق ءىس قوزعاعان. تەرگەۋ بارىسىندا 46 ادام ازاپ كورگەندەر قاتارىندا ايتىلعانىمەن، كەيىن تەك 13 ادام جابىرلەنۋشى بولىپ تانىلدى.
سوتقا دەيىنگى تەرگەۋ دە، سوت تا ۇزاق ءجۇردى. جارتى جىلعا سوزىلعان سوت تەرگەۋىندە ۇ ق ك قىزمەتكەرلەرى كۇدىكتىلەردى استاناداعى تەرگەۋ يزولياتورىنداعى ۇ ق ك قۇرعان ارنايى دالىزدە ازاپتاپ، التىن ۇرلىعىن «مويىنداتقانى» دالەلدەندى.
بەلگىلى بولعانداي، سوتتالۋشىلار سۋ قايناتاتىن قۇرىلعىنى كۇدىكتىلەردىڭ اۋىزدارىنا سالىپ، توكقا قوسقان، رەزەڭكەمەن، جۇدىرىقپەن، تاياقپەن ۇرىپ، ۇستەرىنە سۋىق سۋ قۇيعان. ولاردى 20 ساعات بويى قوزعالىسسىز تۇرۋعا ماجبۇرلەگەن. ەگەر بىرەۋ قوزعالسا، جازالاپ ۇرىپ-سوققان. ادامدار بىرنەشە كۇن ۇيىقتاماعان. بۇل ايعاقتارعا قول قويماس بۇرىن جاسالعان. ال تۇتقىندار ءتىپتى وزدەرىنىڭ نەگە قول قويعانىن دا بىلمەگەن. قابىرعالارى سىنعان، وكشەلەرى جاراقاتتانعان، قۇلاق قالقاندارى جارىلعان ءبىر ادامعا وپەراتسيا جاسالعان. ميدىڭ شايقالۋى بارلىعىندا دەرلىك تىركەلگەن.
ۇ ق ك بۇرىنعى قىزمەتكەرلەرىنە ق ر قىلمىستىق كودەكستىڭ 146-بابى بويىنشا «قاتىگەزدىك، ادامگەرشىلىككە جاتپايتىن نەمەسە قادىر-قاسيەتىن قورلايتىن قارىم-قاتىناس، ازاپتاۋ» بويىنشا ايىپ تاعىلىپ، 22-ساۋىردە اقمولا گارنيزونى اسكەري سوتى ۇ ق ك 5-دەپارتامەنتى 4-باسقارماسىنىڭ پودپولكوۆنيگى ەركىن امانوۆتى 6,5 جىلعا، ۇ ق ك مايورى حاميت ءابدۋعاني، كاپيتان قايرات سارتايەۆ پەن شەكارا قىزمەتى كۇزەتى توبىنىڭ مامانى قۋاندىق مۇحتارحانوۆتى 5 جىلعا بوستاندىعىنان ايىرۋعا ۇكىم شىعاردى. الدىڭعى ۇشەۋىنە 3 جىلعا دەيىن ورگاندا قىزمەت ەتۋگە شەكتەۋ قويىلسا، قۋاندىق مۇحتارحانوۆقا ءومىر بويىنا مەملەكەتتىك قىزمەتتە، قارجى سالاسىندا جۇمىس ىستەۋگە تىيىم سالىندى.
سوتتالۋشىلار سوت ۇكىمى قولىنا تيگەن سوڭ ون بەس كۇن ىشىندە اپەللياتسيالىق شاعىم تۇسىرۋگە مۇمكىندىك الدى. ءسويتتى دە. استانا قالاسىنداعى اسكەري سوتتا سوتتالۋشىلاردىڭ ادۆوكاتتارى جازا تىم قاتاڭ ەكەنىن العا تارتىپ، جەڭىلدەتەتىن فاكتورلاردى اتاپ ءوتتى. ادۆوكاتتار سوتتالۋشىلاردىڭ كىناسىن مويىنداعانىن، تەرگەۋ شارالارىنا قولعابىس كورسەتكەندەرىن، شىعىنداردى وتەگەنىن، كامەلەت جاسقا تولماعان بالالارى بار ەكەنىن العا تارتتى. ءتىپتى، جابىرلەنۋشى تاراپتىڭ ەشقانداي كىنا تاقپايتىنىن جەتكىزدى.
ايتپاقشى، سوتتالۋشىلاردىڭ ادۆوكاتتارى ارنايى ءدالىزدىڭ («سپەتسرودول») پاندەميا كەزىندە قۇرىلعان ارنايى ورىن ەكەنىن جوققا شىعارىپ وتىر. ادۆوكاتتاردىڭ پايىمداۋىنشا، ول جەر كۇدىكتىلەردى ازاپتاۋ ءۇشىن ارنايى قۇرىلعان. ارنايى ءدالىز استانانىڭ بايقوڭىر اۋدانىنداعى الاش شوسسەسى 30/1 مەكەنجايىنداعى №64-مەكەمەنىڭ (تەرگەۋ يزولياتورى) 1-كورپۋسىنىڭ ءۇشىنشى قاباتىندا ورنالاسقان. ول ۇ ق ك جانە استانا قالاسى پروكۋرورى مەن قالالىق قىلمىستىق اتقارۋ جۇيەسى دەپارتامەنتى باسشىلارىمەن بىرگە جاسالعان جوسپارعا ساي ىسكە اسىرىلعان.
سوت پروتسەسى ەرتەڭ جالعاسىن تابادى.
اۆتور
ورالحان قوجانوۆ
