التىنبەك قورازبايەۆقا «وتان» وردەنى، تالعات مۇسابايەۆقا حالىق ءارتىسى اتاعى بەرىلەدى

- وسى مەرەكەلىك جيىنعا ءتول مادەنيەتىمىزدىڭ كورنەكتى وكىلى، بەلگىلى سازگەر، ۇستاز التىنبەك قورازبايەۆ قاتىسىپ وتىر. ونىڭ اندەرى بىرنەشە بۋىننىڭ جۇرەگىنە جول تاۋىپ، قازاق ونەرىنىڭ التىن قورىنا قوسىلدى. مەن بۇگىن التىنبەك قورازبايەۆقا ەڭ جوعارى ماراپات - «وتان» وردەنىن تابىستايمىن. قازىر ارامىزدا داڭقتى الپينيست قازبەك ۋاليەۆ وتىر. ول دۇنيە ءجۇزىنىڭ ەڭ بيىك شىڭدارىن باعىندىرىپ، الەمدىك الپينيزمنىڭ اڭىزىنا اينالدى. مەن قازبەك شاكىم ۇلىنىڭ ەرەن ەڭبەگىن ەسكەرە وتىرىپ، ونى Ⅱ دارەجەلى «بارىس» وردەنىمەن ماراپاتتاۋدى ۇيعاردىم. ناتاليا ۆيكتوروۆنا سافيۋلينا جوعارى پەداگوگيكالىق شەبەرلىگىمەن، كاسىبيلىگىمەن جانە سۇيىكتى ىسىنە ادالدىعىمەن كورىندى. جاڭاشىل ۇستاز ەرەكشە بالالاردى وقىتۋدا وزىق تاسىلدەر ەنگىزىپ وتىر. مەملەكەت شىن مانىندە ينكليۋزيۆتى قوعام قالىپتاستىرۋعا ۇلەس قوسىپ جۇرگەن وسىنداي پەداگوگتەردى ءاردايىم قولدايدى. ءبىلىم بەرۋ سالاسىن دامىتۋعا قوسقان ەلەۋلى ۇلەسى ءۇشىن ناتاليا ۆيكتوروۆنا سافيۋليناعا «قازاقستاننىڭ ەڭبەك سىڭىرگەن ۇستازى» اتاعى بەرىلەدى، - دەدى مەملەكەت باسشىسى.

سونداي-اق رۋحانياتىمىزدىڭ ءورىسىن كەڭەيتۋگە زور ۇلەس قوسىپ جۇرگەن ونەرپاز، تانىمال وپەرا ءانشىسى تالعات مارات ۇلى مۇسابايەۆقا «قازاقستاننىڭ حالىق ءارتىسى» اتاعى بەرىلەدى.

- ونەر قايراتكەرلەرىمەن قاتار، مادەنيەت سالاسىن زەرتتەگەن عالىمداردىڭ دا ەڭبەگى زور قۇرمەتكە لايىق. وسى ورايدا، مۋزەي ءىسىن دامىتۋعا جانە تاريحي-مادەني مۇرامىزدى ساقتاۋعا بەلسەنە اتسالىسىپ جۇرگەن بەلگىلى ولكەتانۋشى باۋىرجان وزبەكالى ۇلى جانىبەكوۆكە «قازاقستاننىڭ ەڭبەك سىڭىرگەن قايراتكەرى» اتاعى بەرىلەدى. سونىمەن قاتار ۇلاعاتتى ۇستاز، ونەرتانۋشى عالىم ەلميرا ساكەن قىزى سۇلتانعاليەۆاعا «قۇرمەت» وردەنى تابىستالادى، - دەپ اتاپ ءوتتى توقايەۆ.

بۇدان بۇرىن ۇلىتاۋدان شىققان مەتاللۋرگ «قازاقستان ەڭبەك ەرى» اتانعانىن جازدىق.