التى رەت ۇيلەنگەن: بالالارىن قورلاعان ەمشىنىڭ قانداي دياگنوزبەن ەسەپتە تۇراتىنى بەلگىلى بولدى
شىمكەنت. KAZINFORM. شىمكەنتتە قامقورلىعىنا جانە اسىراپ العان بالالارىن قورلاعان ەمشى 1995 -جىلدان بەرى پسيحيكالىق اۋىتقۋىنا بايلانىستى ەسەپتە تۇرادى.
قورعاۋشىسىنىڭ ايتۋىنشا، دارىگەرلەر وعان شيزوفرەنيا دياگنوزىن قويعان. جۇيكە جۇيەسىندەگى اۋرۋعا بايلانىستى 6 رەت ۇيلەنگەن ەمشى قازىرگى تاڭدا الماتى وبلىسى تالعان اۋدانىنداعى ستاتسيونارلىق پسيحيكالىق ەمدەۋ ورنىندا جاتىر.
شىمكەنت قالالىق ادۆوكاتتار القاسىنىڭ ادۆوكاتى يبادۋللا نۇرمانوۆ - ەمشىگە مەملەكەت ەسەبىنەن بەرىلگەن قورعاۋشى. ادۆوكات بالالاردىڭ مۇنداي قورلىق كورۋىنە ءبىلىم باسقارماسىن كىنالاپ وتىر.
«بۇل جەردە استانا، الماتى، شىمكەنت ءبىلىم باسقارمالارىنىڭ كەمشىلىكتەرى زور دەپ ايتۋعا بولادى. سەبەبى ۇ. سمانوۆ بۇرىن جاۋاپقا تارتىلعانى، ەسەپتە تۇرعانى بەلگىلى. جاس كەزىنەن باستاپ جۇيكە اۋرۋى بولعان. ءبىراق ولار سونى ەسكەرمەستەن بالالاردى اسىراۋعا بەرگەن. ياعني، تەكسەرۋ فورمالدى تۇردە جۇرگىزىلگەن دەپ ايتساق بولادى. باسقارماداعىلار ونىڭ الىپ كەلگەن قۇجاتتارىن كوردىك دەپ وتىر. «سوتتىلىعى بولماعان، ەسەپتە تۇرماعان» دەگەنمەن شەكتەلگەن. ءبىراق ونىڭ ءۇي جاعدايىن تەكسەرمەگەن. قانداي جاعدايدا تۇرادى؟ قانداي ادامدار؟ بالالاردى اسىراي الا ما؟ بۇل بويىنشا كورشىلەرىمەن سۇحبات جاساماعان. ول جۇيكە اۋرۋىنا بايلانىستى 6 رەت ۇيلەنىپ اجىراسقان»، - دەدى ادۆوكات يبادۋللا نۇرمانوۆ.
ءوز سوزىندە قورعاۋشى سوت وتىرىسى كەزىندە شىمكەنت قالالىق ءبىلىم باسقارماسىنان نەلىكتەن ەمشىنىڭ كورشىلەرىنەن اقپارات الماعانىن سۇراعان. الايدا ولار ءوز قۇزىرەتىنە جاتپايتىنىن ايتقان.
«سوتقا بالا اسىراپ الۋ قۇجاتتارىنا، قاعيدالارىنا مىندەتتى تۇردە وزگەرىس ەنۋ كەرەك، جەكەشە قاۋلى شىعارىڭىز دەپ ۇسىنىس جاسادىم. ويتكەنى ءبىلىم باسقارماسىنداعىلار بالانى اسىراپ الۋعا بەرەتىن كەزدە ول وتباسىنىڭ كورشىلەرىمەن، اعايىن- تۋىسىمەن سۇحبات جۇرگىزىپ، ءبارىن ءبىلىپ الۋى كەرەك. ويتكەنى بۇل اۋىر، اسا اۋىر قىلمىسقا اپارۋى مۇمكىن ەدى.. . قۇدايعا شۇكىر، تەك قانا جەڭىل جاعدايمەن شەكتەلىپ وتىر. وزدەرىڭىز دە ەستىپ جاتىرسىزدار عوي اسىراپ العان اتا-اناسى، وگەي اكە- شەشەسى بالالارعا زورلىق- زومبىلىق جاساپ، پەدوفيليا دەگەن بار. سونداي جاعدايعا جەتپەگەنىنە اللاعا شۇكىر دەيمىز. بۇل جەردە سونىمەن قاتار پوليتسيا تاراپىنان تەكسەرۋ بولدى ما دەپ سۇراق قويدىم. ۋچاسكەلىك ينسپەكتور وڭ مىنەزدەمە بەرگەن ەكەن. سۋديادان پوليتسەيلەردىڭ جاۋاپكەرشىلىگىن قاراۋ تۋرالى جەكە قاۋلى شىعارۋىن سۇرادىم. سەبەبى ولار نەمقۇرايلى قاراعان بولىپ تۇر عوي. جاس بالدارعا، ونىڭ ىشىندە 1 گە تولماعان بالالارعا اۋرۋ ادام قالايشا تاربيە بەرۋى مۇمكىن»، - دەدى ادۆوكات.
يبادۋللا نۇرمانوۆ ەمشىنىڭ وزىمەن كەزدەسىپ، سويلەسپەگەن. تەرگەۋ كەزىندە ەمشىنىڭ 1995 -جىلدان باستاپ ەسەپتە تۇراتىنىن تۋىستارى مەن كورشىلەرى راستاعان. ءبىراق ول بالالاردى اسىراپ الاردا ەسەپتە تۇرمايتىنى جانە سوتتى بولماعانى تۋرالى انىقتامانى قالاي العانى بەيمالىم.
«ەندى ول جاساعانىن مويىندايدى عوي. ءبىراق جاۋابى ەسەپكە الىنبايدى. پسيحياتر ساراپشىلاردىڭ قورىتىندىسىمەن ءوز اركەتىنە، سوزىنە جاۋاپ بەرە المايدى»، - دەدى قورعاۋشى.
ادۆوكاتتىڭ ايتۋىنشا، قازىرگى تاڭدا ەمشىنىڭ ايەلىنىڭ ۇستىنەن ءىس قوزعالىپ، تەرگەۋ امالدارى ءجۇرىپ جاتىر. ءبىراق ناقتى قاي باپپەن ءىس قوزعالعانى بەلگىسىز.
ايتا كەتەيىك، ەمشىگە قاتىستى سوت اكتىسى بۇگىن جاريالانادى.
بۇعان دەيىن شىمكەنتتە جەرگىلىكتى ەمشىنىڭ 6 بالانى اسىراپ الىپ، ولارعا يت پەن مىسىقتىڭ ەتىن بەرگەنىن، ءۇش جىلدان بەرى ازاپتاپ كەلگەنىن جازعان بولاتىنبىز.
ەمشى ىسىنەن سوڭ ءبىلىم سالاسىنىڭ ءبىرقاتار قىزمەتكەرى جازالاندى. سونىمەن قاتار قالالىق دەنساۋلىق ساقتاۋ باسقارماسىنداعىلار بالالاردىڭ قازىرگى جاعدايى تۋرالى ايتىپ بەردى.
اسىراپ العان بالالارىن قورلاعان ەمشىنىڭ 31 جىل بۇرىن ادام ولتىرگەنى راستالدى.
