التايدىڭ كوكتوعاي اۋدانىنان اسىل مەتالداردىڭ 15 ءتۇرلى رۋداسى تابىلدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
7 بالدىق جەر سىلكىنىسىندە وپەراتسيانى جالعاستىرا بەردى - «People.cn»
قىتايلىق دارىگەرلەر 7,1 بالدىق جەر سىلكىنىسى كەزىندە كۇردەلى وپەراتسيا جاساۋدى جالعاستىرا بەردى، دەپ حابارلايدى «People.cn».
قىتايلىق ب ا ق-تىڭ كەلتىرگەن دەرەگىنە سۇيەنسەك، جەر سىلكىنىسى باستالاردان بۇرىن، شينجاڭنىڭ ارال قالالىق اۋرۋحاناسىندا ناۋقاستىڭ باس سۇيەگىن اشىپ، مي حيرۋرگياسىن جۇرگىزىپ جاتقان. بەينەباقىلاۋ كامەراسىنا تۇسكەن ۆيدەودان وپەراتسيا بولمەسىندەگى ەمدەۋ اسپاپتارى جەر سىلكىنگەن كەزدە قوزعالا باستاعانىن كورۋگە بولادى. الايدا، حيرۋرگ ان شۋفاندا، باسقا كومەكشىلەرى دە سابىرلىلىقپەن وپەراتسيا جاساۋدى جالعاستىرا بەرگەن. وپەراتسيا ءساتتى ورىندالىپ شىققان. كۇردەلى وتادان كەيىن، ناۋقاستىڭ جاعدايى تۇراقتالىپ، قازىر دارىگەرلەردىڭ باقىلاۋىندا ەكەن. مەديتسينا قىزمەتكەرلەرىنىڭ بەينەباقىلاۋ كامەراسىنا ءتۇسىپ قالعان بۇل ارەكەتى كوپشىلىكتى سۇيسىندىرگەن.
ايتا كەتەيىك، 23-قاڭتار ساعات 2:09 دا شىڭجاڭنىڭ اقسۋ ايماعىنداعى ءۇشتۇرپان اۋدانىندا 7,1 بالدىق جەر سىلكىنىسى بولعان ەدى. جەر سىلكىنىسىنەن كەيىن كەيبىر اۋدانداردا ەلەكتر قۋاتى ءۇزىلدى.
توتەنشە جاعدايدان كەيىن 12 مىڭ ادام قاۋىپسىز جەرلەرگە ەۆاكۋاتسيالانعان. تۇرعىندار كوبىنە ارنايى تۇرعىزىلعان شاتىرلارمەن بىرگە مەكتەپ جانە سپورت كەشەندەرىنە ورنالاستىرىلعان. جالپى قىتايداعى جەر سىلكىنىسىنەن 3 ادام مەرت بولىپ، تاعى 5 ادام جارالانعان.
وزبەكستان مەن قازاقستان اراسىنداعى تاۋار اينالىمى 4 ميلليارد دوللاردان استى - «ءوز ا»
وزبەكستان مەن قازاقستان اراسىنداعى تاۋار اينالىمىنىڭ كولەمى 4 ميلليارد دوللاردان استى. وتكەن جىلدىڭ قورىتىندىسى بويىنشا قازاقستان وزبەكستاننىڭ نەگىزگى ءۇش سىرتقى ساۋدا ارىپتەستەرىنىڭ ءبىرى بولدى، دەپ جازادى وزبەكستاندىق «ءوز ا» اقپاراتتىق اگەنتتىگى.
اتالعان ب ا ق-مالىمەتنشە، بۇگىندە وزبەكستان الەمنىڭ 198 ەلىمەن ساۋدا-ساتتىق قارىم-قاتىناس ورناتقان. وتكەن جىلدىڭ قاڭتار-جەلتوقسان ايلارىندا وزبەكستاننىڭ سىرتقى ساۋدا اينالىمى 62,6 ميلليارد دوللاردى قۇراپ، 2022 -جىلدىڭ سايكەس كەزەڭىمەن سالىستىرعاندا 23,9 پايىزعا ارتقان.
ايتا كەتەيىك، قىتاي ساۋدا سەرىكتەس ەلدەر قاتارىندا كوش باستاپ تۇر. وزبەكستانمەن قىتاي اراسىنداعى تاۋار اينالىمى 13,7 ميلليارد دوللاردى (جالپى كولەمنىڭ %21,9) قۇرادى. بۇل كورسەتكىش بويىنشا رەسەي ەكىنشى ورىندا - 9,88 ميلليارد دوللار %15,8.
ۇزدىك ۇشتىكتى قازاقستان 4,39 ميلليارد دوللارمەن %7 قورىتىندىلاعان.
ءوزارا ساۋدا اياسىندا وزبەكستان قازاقستانعا 1372,5 ميلليون دوللاردىڭ ءونىمىن ەكسپورتتادى. ال يمپورت 3026,4 ميلليون دوللاردى قۇرادى.
التايدىڭ كوكتوعاي اۋدانىنان اسىل مەتالداردىڭ 15 ءتۇرلى رۋداسى تابىلدى - «Uukilialtay»
گەولوگتار جوڭعار ويپاتىنىڭ سولتۇستىك- شىعىس شەتىندەگى كوبالت مەتالل رەسۋرستارىن ىزدەۋدە جاڭا جەتىستىكتەرگە قول جەتكىزدى.
قازىرگى ۋاقىتتا قىتايلىق گەولوگتار كوكتوعاي اۋدانىنداعى ءوندىرقارا مىس، التىن، كوبالت كەنىشىندە باستاپقىدا 15 رۋدالىق دەنەنى، ونىڭ ىشىندە 9 التىن رۋدالىق كورپۋسىن جانە 6 مىس، التىن، كوبالت ارالاس رۋداسىن تاپقان، دەپ حابارلايدى «Uukilialtay» اقپاراتتىق پورتالى.
قىتايلىق ب ا ق-تىڭ دەرەگىنشە، كوكتوعاي وكرۋگى التاي ايماعىنىڭ شىعىس شەتىندە ورنالاسقان. گەوتەكتونيكالىق قۇرىلىمى قازاقستان، قىتاي جانە موڭعولياداعى الەمدىك دەڭگەيدەگى ءتۇستى مەتالداردىڭ مينەرالدانۋ بەلدەۋىنىڭ ورتاڭعى بولىگىندەگى اۋدان. كوكتوعاي مينەرالدانۋ گەولوگيالىق جاعدايلارى جوعارى، پايدالى قازبالارعا باي اۋدان سانالادى.
كوكتوعاي اۋدانىندا كەن بايلىعى مول، ءتۇستى مەتالدار، سيرەك كەزدەسەتىن مەتالدار قورى بۇكىل ەل بويىنشا الدىڭعى قاتاردا.
اتالعان اۋداننان قازىرگى ۋاقىتتا ءتورت نەگىزگى پايدالى قازبالاردىڭ 92 ءتۇرى اشىلعان. تەمىر، مىس، موليبدەن، قورعاسىن، مىرىش جانە ت. ب. جالپى اسىل مەتالدار جاعىنان كوكتوعاي شينجاڭدا ءبىرىنشى ورىندا تۇرادى.
كوكتوعايدان تابىلعان اسا سيرەك كەزدەسەتىن ماگنيتتى قاتتى مەتالل رەتىندە كوبالتتىڭ جوعارى تەمپەراتۋرادا جوعارى بەرىكتىگىن ساقتاي الادى. سونداي-اق، كوبالت -ەلەكتر اسپاپتارىندا، ماشينا جاساۋدا جانە باسقا سالالاردا كەڭىنەن قولدانىلادى. كوبالت مەتالىنىڭ رەسۋرستارى سالىستىرمالى تۇردە تاپشى بولعاندىقتان، جاڭا ەنەرگەتيكا جانە باسقا دا بايلانىستى سالالاردىڭ دامۋىمەن ونىڭ نارىقتىق سۇرانىسى وسۋدە جانە ونى دامىتۋ مەن قولدانۋ پەرسپەكتيۆالارى كەڭ.
ايتا كەتەيىك، كوكتوعاي التاي تاۋىنىڭ شىعىس، جوعارعى جاعىندا ورنالاسقاندىقتان «ءور التاي» ءوڭىرى دەپ تە اتالادى. سونىمەن قاتار كوكتوعاي ۇزاق ۋاقىتتان بەرى قازاقتار مەكەندەپ كەلە جاتقان اۋداننىڭ ءبىرى سانالادى.
عابيت قويشىبايەۆ موڭعوليانىڭ س ق مينيسترلىگىنىڭ مەملەكەتتىك حاتشىسىمەن كەزدەستى - «Kaznews»
ق ر- نىڭ موڭعولياداعى ەلشىسى عابيت قويشىبايەۆ موڭعوليانىڭ سىرتقى قاتىناستار مينيسترلىگىنىڭ مەملەكەتتىك حاتشىسى نيامدورجين انحبايارمەن كەزدەسۋ وتكىزدى، دەپ حابارلايدى موڭعوليالىق «Kaznews» اقپاراتتىق پورتالى.
اتالعان باسىلىمنىڭ مالىمەتىنشە، كەزدەسۋ بارىسىندا تاراپتار قازاقستان مەن موڭعوليا اراسىنداعى ىنتىماقتاستىقتىڭ 2024 -جىلعى كۇن ءتارتىبى بويىنشا پىكىر الماستى. اتاپ ايتقاندا، ولار اعىمداعى جىلى جوسپارلانعان ماڭىزدى ەكىجاقتى ءىس-شارالار كەستەسىن تالقىلادى، ەكى ەلدىڭ ىنتىماقتاستىعىنىڭ شارت- قۇقىقتىق بازاسىن ودان ءارى جەتىلدىرۋ سۇراقتارىن قاراستىردى، سىرتقى ساياسي ۆەدومستۆولاردىڭ ءتۇرلى باعىتتارداعى ءوزارا ىقپالداستىعىن، ونىڭ ىشىندە كونسۋلدىق سالاداعى ءوزارا ءتيىمدى ارەكەتتەستىكتى ودان ءارى نىعايتۋعا كەلىستى.
قاز ۇ ۋ-عا يراننىڭ موبادتار اسسوتسياتسياسىنىڭ پرەزيدەنتى كەلدى - «Parstoday»
24-قاڭتاردا ءال-فارابي اتىنداعى قازاق ۇلتتىق ۋنيۆەرسيتەتى شىعىستانۋ فاكۋلتەتىنە يراننىڭ موبادتار اسسوتسياتسياسىنىڭ پرەزيدەنتى مەحرابان پولادي مىرزا كەلدى.
قۇرمەتتى قوناق شىعىستانۋ فاكۋلتەتىمەن تانىسۋعا ارنايى كەلىپ، تاياۋ شىعىس جانە وڭتۇستىك ازيا كافەدراسى وقىتۋشىلارمەن كەزدەستى. كەزدەسۋ سۇراق-جاۋاپ تۇرىندە ءوتتى. م. پولادي مىرزا وقىتۋشىلاردى قىزىقتىرعان سۇراقتارعا جاۋاپ بەردى، دەپ حابارلايدى «Parstoday» اقپارات اگەنتتىگى.
يراندىق ب ا ق-تىڭ كەلتىرگەن مالىمەتتەرىنە سۇيەنسەك، جالپى، مارتەبەلى مەيمان قازاقستانعا ق ر ع ج ب م ع ك فيلوسوفيا، ساياساتتانۋ جانە ءدىنتانۋ ينستيتۋتى مەن تۇران ۋنيۆەرسيتەتى بىرىگىپ وتكىزەتىن «ەۋرازيا كونتينەنتى حالىقتارىنىڭ ەۆوليۋتسياسى كونتەكستىندەگى ءزورواستريزمنىڭ مادەني- تاريحي مۇراسى» تاقىرىبىنداعى حالىقارالىق كونفەرەنتسياعا قاتىسۋ ماقساتىندا كەلگەن.
بۇل كونفەرەنتسيا 25-قاڭتاردا تۇران ۋنيۆەرسيتەتىندە وتكەن.
ەر ادام 6-قاباتتان قۇلاعان بالانى جەرگە تۇسىرمەي قاعىپ العان - «جەنمين جيباو»
قىتايدىڭ فۋجيان ولكەسى پۋچىن اۋدانىندا ەر ادام 6-قاباتتان قۇلاعان بالانى جەرگە تۇسىرمەي قاعىپ العان، دەپ حابارلايدى قىتايدىڭ «جەنمين جيباو» اقپاراتتىق پورتالى.
اتالعان ب ا ق-تىڭ مالىمەتىنشە، فۋجيان ولكەسى پۋچىن اۋدانى يۋيجين حۋافۋ شاعىن اۋدانىندا 3 جاستاعى ۇل بالا ابايسىزدا 6-قاباتتان قۇلاپ كەتكەن. وسىنداي قاۋىپتى ساتتە، جولدان ءوتىپ بارا جاتقان سۋي ليانحاي ەسىمدى ەر ادام بالانى جەرگە تۇسىرمەي قاعىپ العان.
باقىلاۋ كامەراسىنان بايقالعانىنداي، بالا الدىمەن ەكىنشى قاباتتاعى جارناما تاقتاسىنىڭ ۇستىنە قۇلاپ تۇسكەن. سۋي ءبىر جاعىنان تەلەفون سوعىپ تۇرسا، ەندى ءبىر جاعىنان قۇلاپ كەلە جاتقان بالانى جەرگە تۇسىرمەي قولىمەن ۇستاپ قالعان.
«اسا قاۋىپتى ساتتە، ول ومىرىنە تونگەن قاۋىپكە قاراماي، قۇلاعان بالانى قوس قولىمەن قاعىپ الادى. دەر كەزىندە قۇتقارعاندىقتان، بالانىڭ ومىرىنە قاۋىپ تونبەگەن، ەر ادامدا جارالانباعان»، دەپ جازادى قىتايلىق ب ا ق.
قازاق، تۇرىك ەلدەرىنىڭ اۋىل شارۋاشىلىعىندا ىنتىماقتاستىق ورناماق - «TRT»
تۇركيا رەسپۋبليكاسى اۋىل شارۋاشىلىعى ءمينيسترىنىڭ ورىنباسارى ەبۋبەكير گيزليگيدەر باستاعان تۇرىك دەلەگاتسياسى مەن ق ر اۋىل شارۋاشىلىعى ۆيتسە-ءمينيسترى ءابىلحايىر تامابەك تۇقىم شارۋاشىلىعى جانە يرريگاتسيالىق جۇيەلەر ماسەلەلەرىن كوتەردى. كەزدەسۋ استانادا وتكەن.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
ۇيىمداستىرىلعان كەزدەسۋلەر بارىسىندا قازاقستان مەن تۇركيا اراسىنداعى ىنتىماقتاستىق پەن بىرلەسكەن جوبالار تالقىلاندى.
تۇركيالىق باسىلىمنىڭ دەرەگىنشە، تۇرىك دەلەگاتسياسىنا ەكونوميكالىق ءوسۋ مونيتورينگى جانە مەملەكەتتىك باعدارلامالاردى ورىنداۋ جونىندەگى قۇرالدار جيىنتىعى بولىپ تابىلاتىن «Smart Data Ukimet» جوباسى تانىستىرىلدى. بۇدان ءارى تۇركيادان كەلگەن ارىپتەستەرگە «قازاقستان عارىش ساپارى» تانىستىرىلىپ، قازاقستاندا پايدالانىلمايتىن اۋىل شارۋاشىلىعى جەرلەرى قالاي انىقتالاتىنى، اتاپ ايتقاندا، جەردى عارىش قاشىقتىعىنان زوندتاۋ ارقىلى انىقتالاتىنى ايتىلدى.
ەبۋبەكير گيزليگيدەر قازاقستاننىڭ اۋىل شارۋاشىلىعى ءمينيسترى ايداربەك ساپاروۆپەن دە كەزدەسىپ، تۇقىم شارۋاشىلىعى جانە ينۆەستيتسيا سالاسىنداعى ىنتىماقتاستىقتى تالقىلادى.
اۆتور
بەيسەن سۇلتان ۇلى
