التاي تاۋىندا وسەتىن «بەك» دارىلىك ءشوبىن تەك باقۋات ادامدار پايدالانعان
دۇنيەجۇزى فارماتسەفتيكا سالاسىندا قولداناتىن وسىمدىكتەردىڭ باسىم بولىگى التاي تاۋلارىندا وسەدى.
بۇل تۋرالى ورتالىق ازيا مەملەكەتتەرىنىڭ بۇقارالىق اقپارات قۇرالدارىنا ارنالعان باسپا ءسوز تۋرى كەزىندە التاي ءشوپ-ءدارى مۋزەيىنىڭ وكىلى ايتىپ بەردى، دەپ حابارلايدى Kazinform.
التاي ءشوپ-ءدارى مۋزەيى - تۋريستەر كوپ كەلەتىن نىسانداردىڭ ءبىرى. ءدال وسى جەردە التايدىڭ وسىمدىك دۇنيەسىمەن تولىق تانىسۋعا بولادى.
مۋزەي قىزمەتكەرى مەرەي ەركىننىڭ ايتۋىنشا، التاي - ادام جانىنىڭ عانا ەمەس، ءتانىنىڭ دە ەمشىسى.
التاي تاۋلارىندا 2300 ءتۇرلى وسىمدىك وسەدى. ونىڭ 700 گە جۋىعىنىڭ ەمدىك قاسيەتى بار.
«ءبىزدىڭ مۋزەيدە التاي ايماعىندا وسەتىن مىڭنان استام وسىمدىكتىڭ ۇلگىسى بار. سونىڭ ىشىندە ەرەكشە اتاپ وتكىم كەلەتىنى - بەك ءشوبى. ول تەك التايدا عانا وسەدى. ەرتە زاماندا ونى تەك اۋقاتتى، بايلار عانا تۇتىنعان ەكەن. ونىڭ تامىرى ادام اعزاسىنا وتە پايدالى. يممۋنيتەتتى جاقسارتادى. جىرتقىش اڭداردان ايۋ جەيدى. سوندىقتان بولار سوڭعى جىلدارى سيرەپ كەتتى. وسىنى ەسكەرگەن جەرگىلىكتى بيلىك ونى ءوز قورعاۋىنا الدى. ياعني، ادامدارعا جيناۋعا تىيىم سالىندى»، - دەپ اتاپ ءوتتى مەرەي ەركىن.
سونىمەن قاتار، مۋزەيدەن تەرى، جۇرەك، باۋىر، بۇيرەك اۋرۋلارىنا شيپاسى مول دارىلىك شوپتەردى كەزدەستىرۋگە بولادى.
«بۇدان بولەك، جابايى ساڭىراۋقۇلاقتىڭ 350 گە تارتا ءتۇرى بار. وىڭ 200 دەن استام ءتۇرىن جەۋگە بولادى. ونىڭ ىشىندە 70 تەن كوبىنىڭ ەمدىك قاسيەتى بار. جامان اۋرۋدىڭ الدىن الاتىن ءتۇرىن دە كەزىكتىرۋگە بولادى»، - دەيدى مۋزەي قىزمەتكەرى.
التاي - قىتاي حالىق رەسپۋبليكاسى شىڭجاڭ ۇيعىر اۆتونوميا اۋدانىنىڭ ىلە قازاق اۆتونوميا وبلىسىنا قاراستى ايماق.
باتىسىندا قازاقستانمەن، سولتۇستىگىندە رەسەيمەن، سولتۇستىك-باتىسىندا موڭعوليامەن شەكتەسەدى.
باتىستان شىعىسقا قاراي 2000 شاقىرىمعا سوزىلىپ جاتىر.
