پالەستينانى قولداعان ستۋدەنتتەر نارازىلىعى بۇكىل ۇلى بريتانيانى شارپىدى
لوندون. KAZINFORM - ۇلى بريتانيادا ونداعان ءىرى ۋنيۆەرسيتەتتىڭ ستۋدەنتى پالەستينانى قولداپ، نارازىلىق شارالارىن وتكىزىپ جاتىر. ولار وقۋ عيماراتتارىنىڭ الدىنا شاتىر تىگىپ، گازاداعى سوعىستى توقتاتۋدى تالاپ ەتۋدە. ءبىلىم وردالارىنىڭ باسشىلىعى جاستاردى سوتقا بەرەمىز دەپ سەس كورسەتۋدە. جاعدايدىڭ كۇردەلەنگەنى سونشالىق ەلدىڭ پرەمەر-ءمينيسترى بىرنەشە وقۋ ورنىنىڭ باسشىلىعىن كەزدەسۋگە شاقىرىپ، انتيسەميتيزممەن كۇرەس ماسەلەسىن پىسىقتادى، دەپ حابارلايدى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى.
كەمبريدج جانە وكسفورد سياقتى الەمدەگى ەڭ بەدەلدى ۋنيۆەرسيتەتتەردىڭ ستۋدەنتتەرى ءبىلىم الۋدىڭ ورنىنا كوشەگە شىقتى.
وقۋ عيماراتتارىنىڭ جانىندا جاستانىپ جاتىپ الدى. جەرگىلىكتى تۇرعىندار اراسىنان جاناشىرلار تابىلىپ، جاستاردى ازىق-تۇلىكپەن قامتاماسىز ەتۋدە.
نارازى توپ جوعارى وقۋ ورىندارىنىڭ باسشىلىعىنان يزرايلمەن قارجىلىق جانە كاسىبي بايلانىسى تۋرالى اشىق ايتۋدى، سونداي-اق ۋنيۆەرسيتەتتەرىمەن قارىم-قاتىناسىن قايتا قاراۋدى تالاپ ەتەدى.
«حالىق اشتىقتىڭ زاردابىن تارتىپ جاتىر. ءدال قازىر رافاحتاعى 600000 بالانىڭ بارلىعى اش وتىر - يۋنيسەف ستاتيستيكاسى وسىنداي. مەنىڭ ويىمشا، جاعدايدى تەك مويىنداي سالۋ ازدىق ەتەدى. بۇعان قوسا ۇلى بريتانيانىڭ يزرايلگە اسكەري جانە قارجىلىق كومەك كورسەتەتىنىن بىلەسىز. وسىنىڭ بارلىعىن توقتاتىپ، ناقتى ارەكەتتەرگە كوشۋ قاجەت. جاعداي الاڭداتارلىق دەپ ايتۋمەن شەكتەلۋ جەتكىلىكسىز»، - دەيدى اننا سەرافيديۋ ەسىمدى ستۋدەنت.
ءبىلىم الۋشى جاستاردىڭ ءدۇمپۋى بۇكىل ۇلى بريتانيانى شارپىدى.
لوندون، نيۋكاسل، بريستول، ۋوريك، ليدس جانە باسقا دا قالالاردىڭ ستۋدەنتتەرى عيمارات الدىنداعى اشىق الاڭداردا جينالىپ، شاتىرلار قۇردى.
بەلسەندىلەردى قايىرىمدىلىق قورلارى قولداپ، قول ۇشىن سوزۋدا. نارازىلاردىڭ اراسىندا، ءتىپتى، ەتنيكالىق يەۆرەيلەر دە بار.
ستۋدەنتتەر وزدەرىنىڭ قاۋىپسىزدىگى ءۇشىن قورقادى. ءتۇسىرىلىم كەزىندە بەتتەرىن جاسىرىپ، شىن ەسىمدەرىن ايتپاۋعا تىرىسۋدا.
«ءبىز ءبارىمىز شىندىعىندا نە بولىپ جاتقانىنان حاباردارمىز. جاعدايعا كوز جۇما قاراعانىمىز ءوز- ءوزىمىزدى الداۋسىراتقانمەن تەڭ. مەنىڭ ويىمشا، بيلىكتە وتىرعان ادامدار، ءبىزدىڭ ۇكىمەتتەرىمىز ءبارىن تەرىسكە شىعارۋدىڭ شەبەرى بولىپ العان. ءبىز وڭتۇستىك افريكادا نە بولعانىن كوردىك، گەنوتسيدكە ۇشىراعان باسقا حالىقتار تۋرالى دا حاباردارمىز»، - دەيدى ەسىمىن اتاماۋىمىزدى سۇراعان ستۋدەنت.
ستۋدەنتتەر تالاپتارىمىز ورىندالمايىنشا لاگەرلەردى بوساتپايمىز دەپ وتىر.
جاعدايدىڭ شەكتەن تىس شىعىپ كەتكەنى سونشالىق، ۇكىمەت باسشىسى ۇلى بريتانياداعى ون جەتى وقۋ ورنىنىڭ ۆيتسە-كانتسلەرلەرىن كەزدەسۋگە شاقىردى.
تالقىلاۋلاردىڭ نەگىزگى تاقىرىبى انتيسەميتيزممەن كۇرەستىڭ ءتيىمدى جولدارى جانە يەۆرەي ستۋدەنتتەردىڭ قاۋىپسىزدىگى بولدى.
ريشي سۋناك ءسوز بوستاندىعى دەگەنىمىز باسقالاردى قورقىتۋعا وكىلەتتىك بەرۋمەن پارا پار ەمەس دەپ مالىمدەدى.
ول جوعارى وقۋ ورىندارىنىڭ باسشىلارىنا جىگەرلىك تانىتۋعا جانە نارازىلىق بىلدىرۋشىلەردىڭ ايتقانىمەن جۇرمەۋگە كەڭەس بەردى.
«ۋنيۆەرسيتەتتەر كامپۋستاردا بەلەڭ العان انتيسەميتيزم ماسەلەسىن ءجىتى باقىلاۋدا ۇستاپ وتىر. كەزدەسۋدە ءبىز ماڭىزدى شەكارالاردى قالاي قويۋ كەرەكتىگى تۋرالى ناقتى نۇسقاۋلىقتار الدىق. حالىق نارازىلىق بىلدىرگەن كەزدە زاڭعا قايشى ارەكەت ەتپەسە دەيمىز»، - دەيدى سەنت-ەندريۋس ۋنيۆەرسيتەتىنىڭ ۆيتسە-كانتسلەرى دەيم ساللي مەپستوۋن.
كەيبىر ساراپشىلار كامپۋستاردا انتيسەميتيزم بەلەڭ الدى دەگەن اقپاراتتى جوققا شىعاردى.
ولاردىڭ پىكىرىنشە، ستۋدەنتتەر 60 جىل بۇرىن ۆەتنام سوعىسى كەزىندەگىدەي وزدەرىنىڭ ازاماتتىق ۇستانىمدارىن بىلدىرۋدە.
يزرايلدىڭ ساياساتىن مويىنداماي، گازا سەكتورىنداعى ارەكەتتەرىن ايىپتاپ جاتقان ەۆرەي ستۋدەنتتەرى كوپ دەيدى ساراپشىلار.
«يسلاموفوبيا ۇلى بريتانيادا انتيسەميتيزمگە قاراعاندا الدەقايدا ۇلكەن پروبلەما. قازىرگى ۇكىمەتتەگىلەر سوقىر سەنىمگە سۇيەنىپ، يزرايلدى قولدايدى جانە انتيسەميتيزمنىڭ بوياۋىن ساياسي ماقساتتا قويۋلاندىرىپ، اسىرا سىلتەپ وتىر. ەرەۋىلگە شىققانداردىڭ اراسىندا ەۆرەي ستۋدەنتتەردىڭ كوپ ەكەندىگىن ولار ەسكەرمەيدى»، - دەيدى تاريحشى اۆي شلايم.
نارازى ستۋدەنتتەردىڭ قوزعالىسى بۇكىل ەۋروپاعا تارادى. ارالارىندا پوليتسيامەن قاقتىعىسقا ءتۇسىپ، قاماۋعا الىنعاندار دا بار.
جاقىندا نيدەرلاند ەلىندە، گەرمانيا، فرانسيا، شۆەيتساريا جانە اۆستريادا جاڭا شەرۋلەر لەگى باستالدى.
ا ق ش كامپۋستارىنداعى ەرەۋىلدەردى قايتالاعان ستۋدەنتتەر ءدارىس زالىنىڭ ەسىكتەرىن ىشتەن جاۋىپ الىپ، شىقپاي قويدى.
ۋنيۆەرسيتەت مۇلىگىنە زيان كەلتىرىپ، ساباقتاردىڭ وتۋىنە كەدەرگى جاساعانداردىڭ ۇستىنەن قىلمىستىق ءىس قوزعالدى.
اۆتور
عالىمجان قارامان ۇلى
