القابيلەر سوتىنا كانديداتتار ءتىزىمىن اكىمدىكتەر جاسايدى

сот
Фото: Kazinform

استانا. KAZINFORM – ق ر جوعارعى سوتى قازاقستان زاڭناماسىنا سايكەس القابيلەر سوتىنا كىمدەر قاتىسا الاتىنىن ءتۇسىندىردى.

«زاڭعا سايكەس 25- جاسقا تولعان جانە اكىمدىكتەر جاسايتىن كانديداتتاردىڭ ءبىرىڭعاي تىزىمىنە ەنگەن كەز كەلگەن قازاقستان ازاماتى القابي بولا الادى. جاس شەگى بەلگىلەندى، وعان جەتكەندە ادامنىڭ بەلگىلى ءبىر ومىرلىك تاجىريبەسى، ءبىلىمى بار جانە ءوز بەتىنشە شەشىم قابىلداي الادى. زاڭ اياسىندا القابيگە قابىلداۋ كەزىندە ۇلتىنا، الەۋمەتتىك نەمەسە مۇلىكتىك جاعدايىنا، دىنگە كوزقاراسىنا، نانىمىنا بايلانىستى شەكتەۋلەرگە تىيىم سالىنعان»، - دەلىنگەن جوعارعى سوتتىڭ Kazinform اگەنتتىگىنە بەرگەن جاۋابىندا.

سوتتىلىعى بار جانە باسقا قىلمىستىق ءىس بويىنشا كۇدىكتى نەمەسە ايىپتالۋشى دەپ تانىلعان ازاماتتار القابيلەر مۇشەسى بولا المايدى. مۇنداي جاعدايلار شەشىم قابىلداۋ كەزىندەگى وبەكتيۆتىلىككە اسەر ەتەتىنى انىق. سونىمەن قاتار، سۋديالار، پروكۋرورلار جانە قۇقىق قورعاۋ ورگاندارىنىڭ قىزمەتكەرلەرى القابيلەردىڭ قىزمەتىن اتقارا المايدى.

«بۇل تالاپ ۇكىمنىڭ ادىلدىگى ءۇشىن جاسالىپ وتىر. ءىس جۇرگىزۋ ءتىلىن مەڭگەرمەگەن ادامدار القابيلەردىڭ قىزمەتىنەن بوساتىلادى. دەنساۋلىققا قويىلاتىن تالاپتار بار، ياعني ۇمىتكەرلەر پسيحيكالىق نەمەسە مىنەز-قۇلىققا قاتىستى دەنساۋلىق ساقتاۋ ۇيىمدارىندا تىركەۋدە تۇرماۋى ءتيىس»، - دەپ اتالىپ وتكەن جوعارعى سوت مالىمەتىندە.

بۇدان بۇرىن حابارلانعانداي، بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ىسىنە قاتىستى سوت 27- ناۋرىزعا بەلگىلەندى.

سوندىقتان باستى سوت وتىرىسىنا القابيلەردىڭ ءبىرىڭعاي تىزىمىنەن 300 كانديداتى شاقىرىلادى.

سوڭعى جاڭالىقتار