ۆالەنسيادا 25 مىڭ ادام نارازىلىق شەرۋىنە شىعىپ، ۇكىمەتتىڭ وتستاۆكاعا كەتۋىن تالاپ ەتتى
استانا. KAZINFORM - ايماق باسشىسى كارلوس مازون مەن ونىڭ ۇكىمەتى جۇزدەگەن ادامنىڭ ءومىرىن قيعان سۋ تاسقىنىندا دەر كەزىندە ارەكەت جاسامادى دەپ ايىپتالدى، دەپ حابارلايدى Euronews.

يسپانيانىڭ مىڭداعان ازاماتى سەنبى كۇنى ۆالەنسيا كوشەلەرىنە شىعىپ، ايماق باسشىسى كارلوس مازون مەن ونىڭ ۇكىمەتىنىڭ وتستاۆكاعا كەتۋىن تالاپ ەتتى. ولار اپاتتى سۋ تاسقىنى كەزىندە ارەكەتتى كەشىكتىرگەنى جانە دەر كەزىندە كومەك كورسەتپەگەنى ءۇشىن ايىپتالىپ وتىر.
بۇل وتكەن جىلدىڭ قازان ايىنان بەرى ۆالەنسيادا ءوتىپ جاتقان ءتورتىنشى مانيفەستاتسيا. وعان 25 مىڭعا جۋىق ادام جينالدى.
كارلوس مازون يسپانيا جۇرتشىلىعىنىڭ ۇلكەن قىسىمىنا ۇشىرادى. ونىڭ باسشىلىعى حالىقتى تابيعي اپات تۋرالى دەر كەزىندە حاباردار ەتپەگەنى ءۇشىن سىنعا الىندى. تۇرعىندار ۇيالى تەلەفوندارىنا توتەنشە جاعداي تۋرالى ەسكەرتۋ سۋ قالا كۆارتالدارىنا اعىپ كەتكەن سوڭ بىرنەشە ساعاتتان كەيىن عانا العانىن ايتىپ شاعىمداندى.
كونسەرۆاتيۆتى حالىقتىق پارتيانىڭ وكىلى مازوندى حالىق سونداي-اق اپاتقا باياۋ جانە رەتسىز ارەكەت ەتكەنى ءۇشىن سىنعا ۇشىرادى.
زارداپ شەككەندەرگە ءبىرىنشى بولىپ ەرىكتىلەر كومەك كورسەتتى. ايماقتىق شەنەۋنىكتەر پوليسيا مەن اسكەري قىزمەتكەرلەردى بىرنەشە كۇن وتكەن سوڭ، فەدەرالدى ۇكىمەت بۇيىرعان كەزدە عانا جۇمىلدىردى.
ايماق تۇرعىندارى سۋ تاسقىنىنان كەيىن ۇكىمەتتىڭ كومەك كورسەتۋ مەن قالپىنا كەلتىرۋ جۇمىستارىن باياۋ جۇرگىزىپ جاتقانىن ايتتى. مازون ءوز كەزەگىندە اپاتتىڭ اۋقىمى كۇتپەگەن جانە ونىڭ اكىمشىلىگى ورتالىق ورگانداردان جەتكىلىكتى اقپارات الماعانىن العا تارتىپ وتىر.
اپاتتى سۋ تاسقىنى 224 ادامنىڭ ءومىرىن قيدى. مىڭداعان ادام باسپاناسىنان ايىرىلدى.
يزرايل يوردان وزەنىنىڭ باتىس جاعالاۋىندا ورنالاسقان بوسقىندار لاگەرىندەگى 20 ءۇيدى جارىپ جىبەرگەنىن جازعان بولاتىنبىز.