الەۋمەتتىك جەلىدە سىنعا ىلىككەن ب ق و تابيعاتتى قورعاۋ پروكۋرورى قىزمەتىنەن بوساتىلدى
ورال. KAZINFORM - ب ق و مامانداندىرىلعان تابيعاتتى قورعاۋ پروكۋرورى ابىلاي بيسقاليەۆ قىزمەتىنەن بوساتىلدى.
ب ق و پروكۋراتۋراسىنىڭ باسپا ءسوز قىزمەتىنەن ءمالىم ەتكەنىندەي، الەۋمەتتىك جەلىدە بەينەجازبا تاراعاننان كەيىن قىزمەتتىك تەكسەرۋ جۇرگىزىلدى.
انىقتالعانىنداي، ا. بيسقاليەۆ 12-تامىز كۇنى جۇمىس ورنىندا بولعان، مەديتسينالىق كۋالاندىرۋ ونىڭ ىشىمدىك ىشپەگەندىگىن كورسەتكەن.
وبەكتيۆتى سەبەپتەرگە بايلانىستى فوتو مەن بەينەجازبانىڭ قاشان تۇسىرىلگەنىن انىقتاۋ مۇمكىن بولمادى. دەگەنمەن اتالمىش جايت قوعامدىق پىكىر تۋعىزىپ، الەۋمەتتىك جەلى قولدانۋشىلارى مەن اقپاراتتىق ينتەرنەت كوزدەرى وقىرماندارىنىڭ كوپتەگەن پىكىرتالاسىنا تۇرتكى بولدى.
«15-تامىز كۇنى قىزمەتتىك تەكسەرۋ ناتيجەسى مەن وبلىس پروكۋراتۋراسى تارتىپتىك كوميسسياسىنىڭ ۇسىنىسىنا سايكەس ا. بيسقاليەۆ قىزمەتىنە تولىق سايكەس ەمەستىگى تۋرالى ەسكەرتۋ تۇرىندەگى تارتىپتىك جاۋاپكەرشىلىككە تارتىلدى. سونىمەن قاتار ا. بيسقاليەۆ مەملەكەتتىك قىزمەتشىگە قويىلاتىن جوعارى تالاپتى تۇسىنە وتىرىپ، باسشىلىق اتىنا ءوزىن قىزمەتىنەن بوساتۋ تۋرالى ءوتىنىش جازدى. 20-تامىزدا ا. بيسقاليەۆ ب ق و مامانداندىرىلعان تابيعاتتى قورعاۋ پروكۋرورى قىزمەتىنەن بوساتىلدى»، - دەپ حابارلادى ۆەدومستۆودان.
